భయంలో టాలీవుడ్...నెట్ ప్లిక్స్ కొత్త ప్లాన్ తో భారీ దెబ్బ?

టాలీవుడ్ గడ్డపై ఆధిపత్యం ఎవరిది? ఇన్నాళ్లూ కేవలం సెల్ ఫోన్ స్క్రీన్లకే పరిమితమైన ఓటీటీ దిగ్గజం నెట్‌ఫ్లిక్స్, ఇప్పుడు ఏకంగా మన ఊళ్లలోని థియేటర్ల మీద కన్నేసింది. హైదరాబాద్ గుండెకాయ లాంటి చోట 41,000 చదరపు అడుగుల భారీ ఆఫీసును సెట్ చేసినప్పుడే ఏదో జరుగుతుందని అంతా ఊహించారు గానీ, ఇప్పుడు ఆ సంస్థ వేస్తున్న అడుగులు చూస్తుంటే టాలీవుడ్ పెద్దలకు చెమటలు పడుతున్నాయి.

హైదరాబాద్ కేంద్రంగా నెట్‌ఫ్లిక్స్ ఇప్పుడు ఒక భారీ సామ్రాజ్యాన్ని నిర్మించే పనిలో పడింది. కేవలం సినిమాలు కొని స్ట్రీమింగ్ చేయడమే కాకుండా, స్వయంగా థియేటర్ల బిజినెస్‌లోకి దిగాలని చూస్తోంది. ముఖ్యంగా చిన్న పట్టణాల్లో థియేటర్లను నిర్మించడం లేదా లీజుకు తీసుకోవడం ద్వారా గ్రౌండ్ లెవల్ నుండి పట్టు సాధించాలని ప్లాన్ చేస్తోంది. ఇప్పటివరకు ఏ ఓటీటీ సంస్థ సాహసించని విధంగా, నెట్‌ఫ్లిక్స్ ఇప్పుడు ఎగ్జిబిషన్ , డిస్ట్రిబ్యూషన్ రంగాల్లోకి దూకుతుండటం వెనుక ఉన్న అసలు మాస్టర్ ప్లాన్ ఏంటి?

కంట్రోల్ అంతా వాళ్ల చేతుల్లోనేనా?

నెట్‌ఫ్లిక్స్ ఆలోచన ఏంటంటే.. తాము నిర్మించే లేదా కొనే సినిమాలను నేరుగా తమ థియేటర్లలోనే రిలీజ్ చేయడం. దీనివల్ల కంటెంట్ తయారీ నుండి థియేటర్లో ప్రదర్శన వరకు మొత్తం వ్యవస్థపై వారికే పట్టు దొరుకుతుంది. ఇది గనుక జరిగితే లోకల్ డిస్ట్రిబ్యూటర్ల పరిస్థితి అగమ్యగోచరంగా మారుతుంది. ఇప్పటికే ఓటీటీల వల్ల థియేటర్లకు వచ్చే జనం తగ్గారనే ఆందోళనలో ఉన్న ఎగ్జిబిటర్లకు, ఇది గోరుచుట్టుపై రోకటిపోటులా మారింది.

ఇది సాధారణంగా సినిమాలు ప్రదర్శించడానికి మాత్రమే కాదు… సినిమాలను డిస్ట్రిబ్యూట్ చేయడం, తమ ఒరిజినల్ కంటెంట్‌ను పెద్ద తెరపై రిలీజ్ చేయడం, మొత్తం సినిమా సైకిల్‌పై కంట్రోల్ సాధించడం అనే వాటిపై దృష్టి పెట్టబోతోందని తెలుస్తోంది. ఇన్నాళ్లూ OTT ప్లాట్‌ఫార్మ్స్ థియేటర్ ఓనర్‌షిప్‌లోకి రావడం ఇండియాలో పెద్దగా జరగలేదు. అందుకే ఇది ఒక గేమ్-చేంజర్ లాంటి డెవలప్‌మెంట్.

నెట్‌ఫ్లిక్స్ స్ట్రాటజీ ఎలా మారింది?

మొదట్లో:

భారీ డిజిటల్ రైట్స్ కొనుగోలు, ప్రొడ్యూసర్లకు భారీ అడ్వాన్స్‌లు

తర్వాత:

థియేటర్ , OTT గ్యాప్ తగ్గించడం (4 వారాల మోడల్)

ప్రేక్షకులను థియేటర్ల నుండి OTT వైపు మళ్లించడం

ఇప్పుడు:

కంటెంట్‌ను కఠినంగా రిస్ట్రిక్ట్ చేయడం, ధరలు తగ్గించడం, ఇప్పుడు థియేటర్‌లను కూడా నియంత్రించాలనే ప్రయత్నం. అంటే “Production, Distribution, Exhibition” మొత్తం చైన్‌ను కంట్రోల్ చేయాలనే లక్ష్యం.

వణుకుతున్న థియేటర్ యజమానులు!

గతంలో సినిమాలకు భారీ రేట్లు ఇచ్చి డిజిటల్ రైట్స్ కొన్న నెట్‌ఫ్లిక్స్, ఇప్పుడు ఆ రేట్లను గణనీయంగా తగ్గించేసింది. అంతేకాదు, సినిమా రిలీజ్ అయిన నాలుగు వారాల్లోనే ఓటీటీలోకి రావాలనే నిబంధన పెట్టి థియేటర్ల బిజినెస్‌ను దెబ్బతీసింది. ఇప్పుడు ఏకంగా తామే థియేటర్ల ఓనర్లుగా మారితే, ఇండస్ట్రీలో ఒక కొత్త రకమైన గుత్తాధిపత్యం ఏర్పడుతుందనే భయం కనిపిస్తోంది. చిన్న సినిమాలకు ఇది వరమా లేక శాపమా అనేది తేలాల్సి ఉంది.

కంటెంట్ మీద ప్రభావం

నెట్‌ఫ్లిక్స్ డేటా ఆధారంగా: ఏ కంటెంట్ వర్క్ అవుతుందో అది మాత్రమే ప్రోత్సహించే అవకాశం. లోకల్ కల్చర్, రిస్కీ స్టోరీలు తగ్గిపోవచ్చు. సృజనాత్మకతకు హాని కలిగే ప్రమాదం.

ప్రేక్షకులకు లాభాలు

1. చిన్న పట్టణాల్లో మంచి థియేటర్లు

నెట్‌ఫ్లిక్స్ మల్టీప్లెక్స్ స్టాండర్డ్ థియేటర్లు తీసుకురాగలదు

గ్రామీణ ప్రాంతాల్లో సినిమా అనుభవం మెరుగవుతుంది

2. కొత్త రకాల రిలీజ్ మోడల్స్

థియేటర్ + OTT హైబ్రిడ్ రిలీజ్

కొత్త కంటెంట్‌ను పెద్ద తెరపై చూసే అవకాశం

3. ఒరిజినల్ కంటెంట్ థియేటర్లలో

ఇప్పటి వరకు OTTలో మాత్రమే ఉన్న కంటెంట్

ఇప్పుడు బిగ్ స్క్రీన్‌పై కూడా చూడొచ్చు

4. టికెట్ ప్రైసింగ్‌లో మార్పులు

డైనమిక్ ప్రైసింగ్ రావచ్చు

కొన్ని ప్రాంతాల్లో తక్కువ ధరలు కూడా ఉండే అవకాశం

మరో విప్లవమా లేక వినాశనమా?

నెట్‌ఫ్లిక్స్ ఎంట్రీతో చిన్న పట్టణాల్లో థియేటర్ల వసతులు పెరుగుతాయని కొందరు ఆశాభావం వ్యక్తం చేస్తుంటే, ఇండస్ట్రీ వర్గాలు మాత్రం తీవ్ర ఆందోళనలో ఉన్నాయి. ఒకే సంస్థ చేతిలోకి మొత్తం వ్యవస్థ వెళ్తే, రేపు క్రియేటివ్ ఫ్రీడమ్ దెబ్బతినే అవకాశం ఉంది. ఏదేమైనా, టాలీవుడ్ ఇప్పుడు ఒక ఊహించని మలుపులో ఉంది. నెట్‌ఫ్లిక్స్ వేస్తున్న ఈ ఎత్తుగడలు టాలీవుడ్ రూపురేఖలను ఎలా మార్చబోతున్నాయో చూడాలి. ఇండస్ట్రీలో కొత్త యుద్ధం మొదలైందని మాత్రం అర్థమవుతోంది!