ప్రియాంకచోప్రా ‘సిటాడెల్ 2’ సిరీస్ రివ్యూ

ప్రపంచాన్ని పాలించేది ప్రజాస్వామ్యమని పాఠ్యపుస్తకాలు చెబుతాయి. కానీ నిజానికి ప్రపంచాన్ని నడిపేది డబ్బు… ఆ డబ్బు వెనక దాక్కున్న పిశాచాలు. అలాంటి పిశాచాల గుంపే “మాంటికోర్”.

దేశాధినేతలు మారిపోతారు… ప్రభుత్వాలు కూలిపోతాయి… యుద్ధాలు మొదలవుతాయి… స్టాక్ మార్కెట్లు రాత్రికి రాత్రే కుప్పకూలిపోతాయి. బయటకు చూస్తే ఇవన్నీ రాజకీయ నిర్ణయాల్లా కనిపిస్తాయి. కానీ వెనక కూర్చుని బటన్ నొక్కేది మాత్రం సూట్ వేసుకున్న బిలియనీర్లు. వాళ్లకు దేశం అంటే బిజినెస్… మనుషులు అంటే డేటా.

ఆ మాఫియాకు ఎదురు నిలవడానికి “సిటాడెల్” అనే గూఢచారి వ్యవస్థ పుట్టింది. ప్రభుత్వాలకు కూడా పూర్తిగా జవాబు చెప్పని సీక్రెట్ నెట్‌వర్క్ అది. ప్రపంచంలోనే అత్యంత ప్రమాదకరమైన ఏజెంట్లు అందులో పనిచేస్తుంటారు. మేసన్ కేన్… నాడియా… బెర్నార్డ్. వాళ్లు దేశాలను కాపాడిన వాళ్లు. కానీ తమ జీవితాలను మాత్రం కాపాడుకోలేకపోయిన వాళ్లు.

ఎందుకంటే ప్రతి పెద్ద యుద్ధం వెనక ఒక చిన్న ద్రోహం ఉంటుంది. మేసన్ జీవితంలో ఆ ద్రోహం పేరు — దాలియా. తన తల్లి. ఆమె మాంటికోర్ కోసం పనిచేస్తోందని తెలియకుండా, సిటాడెల్ ఏజెంట్ల సీక్రెట్ లిస్ట్ ఆమె చేతిలో పెడతాడు మేసన్. అంతే… ఒక రాత్రిలో ప్రపంచవ్యాప్తంగా ఏజెంట్లు వేటకుక్కల్లా చంపబడతారు. కొందరిని కాల్చేస్తారు… కొందరిని పేల్చేస్తారు… ఇంకొందరిని వాళ్ల సొంత ప్రభుత్వాలే దేశద్రోహుల్లా చూపించి మట్టుబెడతాయి. సిస్టమ్ కూలిపోతుంది. ఆ తర్వాత అందరూ చెల్లాచెదురు అయ్యిపోతారు.

మేసన్ “సాధారణ భర్త”గా సెటిల్ అవుతాడు. ఉదయం కాఫీ… సాయంత్రం కుటుంబం… మధ్యలో అప్పుడప్పుడు గిల్ట్. దేశాలను కాపాడిన మనిషి చివరికి గ్రోసరీ బ్యాగులు మోసే స్థితికి వస్తాడు. జీవితం కూడా కొన్నిసార్లు క్రూరమైన సెటైర్ వేస్తుంది.

నాడియా మాత్రం తన కూతురితో దాక్కుని జీవిస్తుంది. బయటకు చూస్తే సాధారణ తల్లి. కానీ అవసరం వస్తే ఐదు సెకన్లలో ఐదుగురిని చంపగల మహిళ.

ఇక బెర్నార్డ్ పరిస్థితి ఇంకా దారుణం. పౌలో బ్రాగా అనే బిలియనీర్ అతన్ని బందీగా పెట్టుకుంటాడు. ప్రపంచంలో డబ్బున్న వాళ్లకు దేవుడు కావాలనిపించదు… దేవుడిని కంట్రోల్ చేసే టెక్నాలజీ కావాలనిపిస్తుంది. అదే పౌలో ప్లాన్. మనిషి మెదడులో చిప్ పెట్టి, అతన్ని రిమోట్ కంట్రోల్ బొమ్మలా మార్చే “మైండ్ కంట్రోల్ ప్రోగ్రామ్” తయారు చేయిస్తాడు. ఎన్నికల్లో గెలవడం పాత ఫ్యాషన్ అయిపోయింది కాబోలు… ఇప్పుడు అధ్యక్షుడిని నేరుగా హత్య చేయించడమే ట్రెండ్.

కానీ బెర్నార్డ్ అక్కడి నుంచి తప్పించుకుంటాడు. అతనికి సహాయం చేసేది హచ్ అనే మాజీ సీఐఏ ఏజెంట్. సిస్టమ్ మీద నమ్మకం పోయిన మనిషి. బ్యాడ్జ్ తీసేసినా, కోపం మాత్రం తీసేయలేని వ్యక్తి. ఇద్దరూ కలిసి మళ్లీ పాత టీమ్‌ను కూడగట్టడానికి బయలుదేరుతారు. కానీ సమస్య మాంటికోర్ మాత్రమే కాదు. మేసన్‌కు తనమీదే నమ్మకం లేదు. నాడియాకు మేసన్‌పై నమ్మకం లేదు. బెర్నార్డ్ చెప్పే ప్రతి మాట వెనక ఇంకో అబద్ధం ఉందేమో అన్న అనుమానం అందరికీ ఉంది. ఈ ప్రపంచంలో గూఢచారుల కంటే ప్రమాదకరమైనది ఒకటే — వాళ్ల జ్ఞాపకాలు.

ఇక మరోవైపు మాంటికోర్ తమ చివరి ఆటకు సిద్ధమవుతుంది. ఒక హత్యతో ప్రపంచాన్ని మంటల్లో నెట్టేయాలని చూస్తుంది. దేశాలు యుద్ధానికి దిగితే… ఆయుధాలు అమ్మేది వాళ్లే. ప్రజలు చస్తే… షేర్లు పెరగేది వాళ్లవే. చివరికి మేసన్ ముందు ఒకే ప్రశ్న నిలుస్తుంది — ప్రపంచాన్ని కాపాడటానికి తన తల్లిని చంపగలడా? అక్కడినుంచి మొదలవుతుంది అసలు ఆట. ఈ స్పై థ్రిల్లర్ ఎలాంటి మలుపు తీసుకుంది అనేది స్క్రీన్ పై చూడాల్సిన విషయం.

విశ్లేషణ

“సిటాడెల్” సీజన్ 2 చూసేటప్పుడు మొదటిగా అర్థమయ్యే విషయం ఏంటంటే — ఈసారి సిరీస్ తనను తాను చాలా సీరియస్‌గా తీసుకోవడం తగ్గించిందని. సీజన్ 1 మొత్తం “ఇది చాలా ఇంటెలిజెంట్ స్పై డ్రామా” అని బలవంతంగా నమ్మించే ప్రయత్నం చేసింది. ప్రతి ట్విస్ట్‌ను ప్రపంచ చరిత్ర మార్చే రివీల్‌లా చూపించింది. కానీ ఆడియన్స్ మాత్రం మూడు ఎపిసోడ్‌ల ముందే ఏం జరగబోతుందో గెస్ చేసేశారు. ఒక స్టేజ్‌కి వెళ్లాక అది స్పై థ్రిల్లర్ కంటే “ఎవరైనా షాక్ అవుతున్నట్టు యాక్ట్ చేయండి” అనే వర్క్‌షాప్‌లా అనిపించింది.

కానీ సీజన్ 2 అక్కడి నుంచే యూటర్న్ తీసుకుంది. ఈసారి టోన్ పూర్తిగా మారింది. ఇది “జాసన్ బోర్న్” మూడ్‌లో ఉండదు. “జాన్ విక్” స్టైల్‌లో కూడా కాదు. ఇది ఎక్కువగా “ఓషన్స్ ఎలెవన్” ఒక వైపు… “జేమ్స్ బాండ్” మరోవైపు నిలబడి, మధ్యలో వోడ్కా తాగుతూ మాట్లాడుకుంటున్నట్టుంటుంది. స్క్రీన్‌ప్లే కూడా అదే ఎనర్జీని ఫాలో అవుతుంది. ఒక వైపు ప్రపంచాన్ని కూల్చే కుట్రలు… మరోవైపు CIA ఏజెంట్లు పిల్లల కామిక్ క్యారెక్టర్లలా తికమక పడటం.

ఒక సీన్‌లో ప్రపంచ స్థాయి హత్య కుట్ర గురించి మాట్లాడుతుంటే… పక్కనే ఇంకొకరు కాఫీ కోసం ఆర్గ్యూ చేస్తుంటారు. అదే ఈ సీజన్ టోన్.కానీ ఇక్కడే సిరీస్ పెద్ద సమస్య కూడా మొదలవుతుంది. మేసన్, నాడియా పాత్రలు ఇంకా సీజన్ 1 ట్రామాలోనే ఇరుక్కుపోయాయి. వాళ్ల జీవితాలు చీలిపోయాయి. ద్రోహాలు, కుటుంబ సమస్యలు, గిల్ట్, నమ్మక ద్రోహం… ఇవన్నీ మోస్తున్నారు. అలాంటి పాత్రలను ఒక్కసారిగా “చిరునవ్వులు చిందించే ఫన్ స్పైస్”గా మార్చితే ఆడియన్స్ నవ్వరు… కన్ఫ్యూజ్ అవుతారు. అందుకే వాళ్లు ఇంకా భారంగా ఉంటారు. దాంతో కొన్ని సార్లు రెండు వేర్వేరు సిరీస్‌లు ఒకేసారి చూస్తున్న ఫీలింగ్ వస్తుంది.

ఒకటి —

“ప్రపంచ బాధను మోస్తున్న భావోద్వేగ గూఢచారుల కథ.”

మరొకటి —

“బడ్జెట్ ఎక్కువ దొరికిన స్పై ఫన్ రైడ్.”

ఈ రెండింటిని కలపాలని స్క్రీన్‌ప్లే చాలా ప్రయత్నిస్తుంది. కొన్నిసార్లు వర్కౌట్ అవుతుంది. కొన్నిసార్లు మాత్రం సీన్‌లు ఒకదానితో ఒకటి మాట్లాడుకోకుండా ఎడిట్ టేబుల్ మీద బలవంతంగా కలిపినట్టుంటాయి.

కానీ ఒక విషయం ఒప్పుకోవాలి. ఈసారి సిరీస్ “మేము చాలా స్మార్ట్” అనే అహంకారాన్ని వదిలేసింది. అదే దీన్ని బెటర్ చేసింది. ఇప్పుడు దీని ఫోకస్ ఒక్కటే — మూమెంట్. కెమెరా కూడా మూడు ఎనర్జీ డ్రింక్స్ తాగినట్టుగా పరిగెడుతుంది.

టెక్నికల్ గా హై స్టాండర్డ్స్ లో ఉంది. నటనా చెప్పుకోదగిన స్దాయిలోనే ఉంది.

ఫైనల్ థాట్

ఈ సీరిస్ లో లాజిక్ కంటే స్పీడ్ ఎక్కువ… డెప్త్ కంటే స్టైల్ ఎక్కువ… డ్రామా కంటే డ్రామాటిక్ ఫేసులు ఎక్కువ. ఫైనల్‌గా చెప్పాలంటే —

ఇది స్పై థ్రిల్లర్ కంటే… అందమైన వాళ్లు ప్రపంచాన్ని కాపాడే పేరుతో తమ పర్సనల్ ఇష్యూలు సాల్వ్ చేసుకునే ఖరీదైన వ్యవహారం! ఓ సారి చూసేయచ్చు.

కొన్ని అభ్యంతరకర సీన్స్ ఉన్నాయి. ఫ్యామిలీతో చూసేటప్పుడు జాగ్రత్త

ఎక్కడ చూడచ్చు

అమెజాన్ ప్రైమ్ లో తెలుగులో ఉంది.