దోపిడీలు, దహనాలు, దమనకాండ.. ఫ్రాన్స్ లో రాజ్యమేలుతున్న అరాచకం

అక్టోబర్ 17న ఫ్రాన్స్‌లోని పలు నగరాల్లో నిరసనలు ప్రారంభం అయ్యాయి. అధికారుల అంచనా ప్రకారం సుమారు 5.5 లక్షల మంది ఈ ఆందోళనల్లో పాల్గొనగా, నిర్వాహకులు ఆ సంఖ్య 8 లక్షల వరకు ఉంటుందని తెలిపారు. మొదట నిరసనలుగా ప్రారంభమైన ఆందోళనలు, కొన్ని ప్రాంతాల్లో హింసాత్మకంగా మారాయి. ముసుగులు ధరించిన వ్యక్తులు దుకాణాలను ధ్వంసం చేయడంతో పాటు ప్రభుత్వ భవనాలకు నిప్పంటించారు.

మధ్య ఫ్రాన్స్‌లోని లిమోజ్ నగరంలో 19వ శతాబ్దానికి చెందిన సిటీ హాల్‌కు నిప్పంటించడంతో భవనం పైకప్పు కూలిపోయింది. పారిస్, మార్సెయి, లియోన్, బోర్డియో నగరాల్లోనూ దుకాణాలు దోపిడీకి గురయ్యాయి. పారిస్‌లోని ప్లాస్ డి లా రిపబ్లిక్ ప్రాంతంలో ధ్వంసమైన దుకాణాలు, పగిలిన అద్దాలు, చెల్లాచెదురైన రాళ్లు కనిపించాయి. పారిస్ ప్రాంతంలోనే 855 మందిని అరెస్టు చేయగా, వారిలో 557 మందిని పోలీసుల అదుపులో ఉంచారు. నిరసనల సందర్భంగా గుండెపోటుతో ఒక వ్యక్తి మరణించినట్లు పోలీసులు తెలిపారు.

ఈ ఘటనలపై ఫ్రాన్స్ అంతర్గత వ్యవహారాల మంత్రి లారెంట్ నునెజ్ స్పందిస్తూ, నిరసన తెలిపే హక్కు ప్రాథమిక హక్కు అయినప్పటికీ, హింసకు పాల్పడటం, ఆస్తులను ధ్వంసం చేయడం ఆమోదయోగ్యం కాదని పేర్కొన్నారు. హింసకు పాల్పడినవారిలో తీవ్ర వామపక్ష గ్రూపులకు చెందినవారు, దోపిడీలకు దిగిన ఇతర వ్యక్తులు ఉన్నారని అధికారులు ఆరోపించారు.

మరోవైపు, ఈ ఘటనలు వచ్చే ఏడాది జరగనున్న అధ్యక్ష ఎన్నికల నేపథ్యంలో రాజకీయ వివాదానికి దారితీశాయి. తీవ్ర వామపక్ష నేత జీన్-లూక్ మెలెన్‌షాన్ నిరసనల్లో పాల్గొన్నప్పటికీ, దోపిడీలు, విధ్వంసానికి తమ ఉద్యమంలో చోటు లేదని స్పష్టం చేశారు. ప్రధాని సెబాస్టియన్ లెకోర్ను ప్రభుత్వ తీరుపై ఆయన విమర్శలు చేశారు. మరోవైపు, తీవ్ర మితవాద నేత మెరైన్ లీ పెన్ నిరసనల సమయంలో జరిగిన విధ్వంసాన్ని ఖండిస్తూ, ప్రజల కొనుగోలు శక్తి కోసం సాగిన ఆందోళనలను అల్లరి మూకలు దెబ్బతీశాయని విమర్శించారు.

అమెరికా అధ్యక్షుడు డొనాల్డ్ ట్రంప్ కూడా ఫ్రాన్స్‌లో పరిస్థితులపై స్పందిస్తూ, వలసలను ప్రస్తావించారు. అయితే, ఫ్రాన్స్ అధికారులు ఈ హింసాత్మక ఘటనలకు వలసదారులను కారణంగా పేర్కొనలేదు.

ఇదిలా ఉండగా, పారిస్ మేయర్ ఇమ్మాన్యుయేల్ గ్రెగోయిర్ నష్టపోయిన వ్యాపార సంస్థలకు సహాయం అందించేందుకు ప్రత్యేక అత్యవసర విభాగాన్ని ఏర్పాటు చేస్తున్నట్లు ప్రకటించారు. నగరాల్లో జరిగిన నష్టాన్ని అంచనా వేయడంతో పాటు వ్యాపార కార్యకలాపాలు సురక్షితంగా కొనసాగేందుకు చర్యలు తీసుకోవాల్సిన అవసరం ఉందని ఆయన పేర్కొన్నారు.

ఈ నేపథ్యంలో అధ్యక్షుడు మాక్రాన్ ఉన్నతాధికారులతో అత్యవసర సమావేశం నిర్వహించి, ఆదివారం రాత్రి 8 గంటలకు దేశ ప్రజలను ఉద్దేశించి ప్రసంగించనున్నారు. హింసకు పాల్పడినవారిపై చర్యలు, ప్రజా ఆస్తుల రక్షణ, నిరసనల నిర్వహణలో భద్రతా ఏర్పాట్లపై ప్రభుత్వం ఎలాంటి నిర్ణయాలు తీసుకుంటుందన్నది ఇప్పుడు కీలకంగా మారింది.