హార్ముజ్ తెరిస్తే అణు ఒప్పందం పై ఒత్తిడి తగ్గుతుంది: ట్రంప్

పూర్తి, తుది అణు ఒప్పందంపై పట్టుబట్టడానికి బదులుగా, ఈ ప్రాంతంలో తమ సైనిక చర్యను ముగించడానికి, ప్రస్తుత కాల్పుల విరమణను పొడిగించడానికి, కీలకమైన ఈ చమురు మార్గం గుండా నౌకాయానాన్ని పునరుద్ధరించడాన్ని ట్రంప్ ప్రభుత్వం అంగీకరించవచ్చని ఆ నివేదిక పేర్కొంది.

అమెరికా అధికారులను ఉటంకిస్తూ, ది వాల్ స్ట్రీట్ జర్నల్ నివేదించిన ప్రకారం, ట్రంప్ ఇటువంటి ఫలితం కోసం వారాలుగా సిద్ధమవుతున్నారు. టెహ్రాన్‌తో కొత్త అణు ఒప్పందాన్ని కుదుర్చుకోకుండానే తాను యుద్ధం నుంచి వైదొలగగలనని తన సీనియర్ సహాయకులకు ఆయన చెప్పినట్లు సమాచారం.

ఇరాన్ ఈ జలమార్గాన్ని తిరిగి తెరవడానికి అనేక షరతులను ముందుకు తెచ్చింది. వాటిలో బిలియన్ల డాలర్ల చెల్లింపులు, అమెరికా నావికా దిగ్బంధనాన్ని ముగించడం, ఈ ప్రాంతం నుంచి అమెరికా బలగాలను ఉపసంహరించుకోవడం, ఆంక్షలను ఎత్తివేయడం, స్తంభింపజేసిన ఇరాన్ ఆస్తులను విడుదల చేయడం వంటివి ఉన్నాయి.

ది వాల్ స్ట్రీట్ జర్నల్ ప్రకారం, ఈ డిమాండ్లు వాషింగ్టన్‌కు దౌత్యపరమైన అవకాశాలను తగ్గించాయి. టెహ్రాన్ త్వరిత పరిష్కారం కోరడం కంటే సుదీర్ఘ ఘర్షణకు సిద్ధమవుతున్నట్లు సూచిస్తున్నాయి. ఇరాన్ - ఒమన్ మధ్య ఉన్న ఇరుకైన సముద్ర మార్గమైన హార్ముజ్ జలసంధి, టెహ్రాన్‌కు అత్యంత బలమైన ఒత్తిడి సాధనాల్లో ఒకటిగా మారింది.

ఇరాన్ క్షిపణి, డ్రోన్ దాడుల ద్వారా వాణిజ్య రవాణాను అడ్డుకోగలిగింది. దీనివల్ల నౌకాయానంలో జాప్యం జరిగి, అది ప్రపంచ మార్కెట్లను ప్రభావితం అయ్యాయి. ఇవి పరోక్షంగా అమెరికాకు ఇబ్బంది కలిగించాయి. దాని పరపతిని గణనీయంగా తగ్గించింది.

ఫిబ్రవరిలో యుద్ధం ప్రారంభమైన తర్వాత టెహ్రాన్ ఈ జలమార్గాన్ని మూసివేసింది. అమెరికన్ యుద్ధనౌకలు, మిత్ర దేశాల నౌకలను దాని గుండా వెళ్ళడానికి అనుమతించేది లేదని స్పష్టం చేసింది. అదే సమయంలో, ఈ మార్గాన్ని ఉపయోగించే వాణిజ్య నౌకల నుంచి డబ్బులు వసూలు చేయాలని కూడా ఆ దేశం భావిస్తోంది. ది వాల్ స్ట్రీట్ జర్నల్ ఉటంకించిన అమెరికా అధికారుల ప్రకారం, వాషింగ్టన్ ఈ ఆంక్షలను, సుంకాలు విధించడానికి ఇరాన్ చేసిన ఏ ప్రయత్నాన్నైనా తిరస్కరించింది.

ఇటీవలి వారాల్లో ఈ జలసంధి ఇప్పటికే పూర్తిగా తెరిచే ఉందని ట్రంప్ పదేపదే పేర్కొన్నారు. కానీ అవన్నీ అబద్దాలని రుజువయ్యాయి. ఇరాన్‌పై "భారీ బాంబు దాడుల ప్రచారం" గురించి హెచ్చరిస్తూ ఆయన బెదిరింపులు కూడా జారీ చేశారు. అయితే, నివేదిక ప్రకారం, టెహ్రాన్ "సుదీర్ఘమైన, తీవ్రమైన సంఘర్షణకు" సిద్ధంగా ఉన్నట్లు కనిపిస్తోంది.

సంఘర్షణను ముగించాలన్న అమెరికా అధ్యక్షుడి ఆత్రుతకు, మూడు నెలల కన్నా తక్కువ వ్యవధిలో జరగనున్న అమెరికా మధ్యంతర ఎన్నికలతో కూడా సంబంధం ఉండవచ్చు. ఫిబ్రవరి చివర్లో యుద్ధం ప్రారంభం కావడానికి ముందు ఉన్న ధరల కన్నా ఇప్పుడు పెట్రోల్ ధరలు చాలా ఎక్కువగా ఉండటం ట్రంప్‌కు ఆందోళన కలిగించే అంశం కావచ్చు.

హార్ముజ్ జలసంధికి సంబంధించిన డిమాండ్లను టెహ్రాన్ ప్రతిఘటిస్తూనే ఉండటంతో, ఇరాన్‌పై మరో పెద్ద సైనిక దాడి నుంచి ట్రంప్ వెనక్కి తగ్గుతున్నట్లు కనిపిస్తోంది. వాషింగ్టన్ ఆర్థిక ఒత్తిడిని పెంచేందుకు ప్రయత్నిస్తున్నట్లు తెలుస్తోంది.

ఇరాన్‌పై తీవ్ర ఉద్రిక్తతను పెంచుతామని వారాల తరబడి బెదిరించిన తర్వాత, ఆదివారం ఆక్సియోస్‌తో జరిపిన ఒక సంక్షిప్త ఫోన్ ఇంటర్వ్యూలో ట్రంప్ గమనించదగ్గ రీతిలో సంయమనం పాటించారు. కొత్త సైనిక హెచ్చరికలు జారీ చేయడానికి బదులుగా, ఇరాన్ క్షీణిస్తున్న ఆర్థిక పరిస్థితిని పర్యవేక్షిస్తూ తన ప్రభుత్వం మితమైన విధానాన్ని అవలంబిస్తోందని ఆయన అన్నారు.

“మేము దీనిని మితంగా నిర్వహిస్తున్నాము. మేము వారితో పాక్షికంగా మాత్రమే చర్చలు జరుపుతున్నాము. ఇరాన్‌లో భారీ ద్రవ్యోల్బణం, వారి వద్ద డబ్బు లేకపోవడం వంటి వాస్తవాలను మేము గమనిస్తున్నాము,” అని ట్రంప్ అన్నారు.

ఇరాన్ ఆర్థికంగా “చాలా దయనీయ స్థితిలో” ఉందని, తన సైనికులకు జీతాలు చెల్లించడానికి కూడా డబ్బు లేదని ట్రంప్ అన్నారు. అమెరికా నావికా దిగ్బంధనం టెహ్రాన్ ఆర్థిక వ్యవస్థపై మరింత ఒత్తిడిని పెంచిందని ఆయన అన్నారు. మరో భారీ సైనిక చర్యను వాయిదా వేసి, దానికి బదులుగా ఆర్థిక, దౌత్యపరమైన ఒత్తిడిని పెంచడానికి అనుమతించాలని తన గల్ఫ్ మిత్రదేశాలు తనను ఒప్పించాయని అమెరికా అధ్యక్షుడు పదేపదే చెబుతున్నారు.