పాకిస్థాన్లో ఘోర ప్రమాదం.. లోయలో పడిన బస్సు, 40 మంది మృతి
పాకిస్థాన్లో ఘోర బస్సు ప్రమాదం చోటుచేసుకుంది. బ్రేకులు విఫలమయ్యాయని అనుమానిస్తున్న ప్రమాదంలో బస్సు లోయలో పడిపోవడంతో 40 మంది మృతి చెందగా, 8 మంది గాయపడ్డారు.
పాకిస్థాన్లోని ఖైబర్ పఖ్తూన్ఖ్వా రాష్ట్రంలో ఘోర రోడ్డు ప్రమాదం జరిగింది. బలూచిస్తాన్లోని క్వెట్టా నుంచి పెషావర్కు వెళ్తున్న ప్రయాణికుల బస్సు లోయలో పడిపోవడంతో మహిళలు, పిల్లలు సహా 40 మంది మృతి చెందారు. మరో 8 మంది గాయపడ్డారు. ఈ ప్రమాదం డేరా ఇస్మాయిల్ ఖాన్ జిల్లాకు చేరుకున్న తర్వాత జరిగింది. బస్సులో మొత్తం 48 మంది ప్రయాణికులు ఉన్నట్లు అధికారులు తెలిపారు.
ప్రాథమిక విచారణలో, కొండ ప్రాంతంలోని ప్రమాదకర మలుపు వద్ద బస్సు బ్రేకులు విఫలం కావడంతో డ్రైవర్ నియంత్రణ కోల్పోయి, బస్సు లోయలో పడిపోయినట్లు అధికారులు భావిస్తున్నారు. అయితే ప్రమాదానికి అసలు కారణాలపై పూర్తి స్థాయిలో దర్యాప్తు కొనసాగుతోంది.
మృతులు, గాయపడిన వారి వివరాలను గుర్తించే పనిలో అధికారులు నిమగ్నమయ్యారు. సహాయక బృందాలు వెంటనే ఘటనాస్థలికి చేరుకుని సహాయక చర్యలు చేపట్టాయి.
ఖైబర్ పఖ్తూన్ఖ్వాలో పర్వత ప్రాంత రహదారులు, అధ్వాన్నమైన రోడ్లు, వాహనాల నిర్వహణలో లోపాలు, ట్రాఫిక్ నిబంధనల ఉల్లంఘనలు వంటి కారణాలతో తరచూ ఇలాంటి ప్రమాదాలు జరుగుతున్నాయని అధికారులు తెలిపారు.
ఈ ఘటనపై పాకిస్థాన్ రాష్ట్రపతి ఆసిఫ్ అలీ జర్దారీ తీవ్ర దిగ్భ్రాంతి వ్యక్తం చేశారు. గాయపడిన వారికి అత్యుత్తమ వైద్యం అందించాలని అధికారులను ఆదేశించారు.
