ఫ్రాన్స్ లో పతాక స్థాయికి చేరిన ఆందోళనలు
కఠిన చర్యలు తప్పవని హెచ్చరించిన అధ్యక్షుడు మాక్రాన్
ఫ్రాన్స్‌లో మొదలైన నిరసనలు తీవ్ర హింసాత్మకంగా మారాయి. పెరుగుతున్న జీవన వ్యయం, పాఠశాలల్లో సిబ్బంది కొరత, నిధుల లేమికి వ్యతిరేకంగా ప్రారంభమైన ఆందోళనలు దేశవ్యాప్తంగా ఉద్రిక్తతలకు దారితీశాయి.
పారిస్‌తో పాటు పలు నగరాల్లో వాహనాలకు నిప్పు పెట్టడం, దుకాణాలను దోచుకోవడం, ప్రభుత్వ భవనాలపై దాడులు చేయడం వంటి ఘటనలు చోటుచేసుకున్నాయి. ఈ అల్లర్లలో కనీసం 1,200 మందిని పోలీసులు అరెస్ట్ చేయగా, 150 మంది పోలీసు అధికారులు గాయపడ్డారు.
పారిస్‌లో తీవ్ర ఉద్రిక్తతలు
రాజధాని పారిస్‌లోని ప్లేస్ డీ లా రిపబ్లిక్ పరిసరాల్లో సాయంత్రం వరకు నిరసనకారులు, పోలీసుల మధ్య ఘర్షణలు కొనసాగాయి. ఆందోళనకారులు పోలీసులపై రాళ్లు, బాణాసంచా, ఇతర వస్తువులను విసిరారు. వాహనాలు, చెత్తబుట్టలకు నిప్పు పెట్టడంతో వీధుల్లో దట్టమైన నల్లటి పొగ కమ్ముకుంది. పలు దుకాణాల్లో దోపిడీలు జరిగాయి. పరిస్థితిని అదుపులోకి తీసుకొచ్చేందుకు పోలీసులు బాష్పవాయువు, నీటి ఫిరంగులను ప్రయోగించడంతో పాటు కొందరిపై లాఠీచార్జి చేశారు.
అయితే, పారిస్‌లో ప్రధాన ప్రదర్శన ప్రారంభంలో చాలావరకు శాంతియుతంగానే సాగింది. వాయువ్య పారిస్ వైపు కదిలిన నిరసనకారులు జాతీయ జెండాలను ప్రదర్శిస్తూ, జాతీయ గీతాన్ని ఆలపిస్తూ, సంగీత వాయిద్యాలను వాయించారు. పరిస్థితుల్లో మార్పు రావాలని కోరుకుంటున్నప్పటికీ తమ ప్రయత్నాలకు ఫలితం కనిపించడం లేదని కొందరు యువ నిరసనకారులు బీబీసీకి తెలిపారు.
ఇతర నగరాలకూ వ్యాపించిన హింస
పారిస్‌కే పరిమితం కాని అశాంతి దేశంలోని ఇతర ప్రాంతాలకూ విస్తరించింది. లియోన్‌లోని పర్యాటక కార్యాలయంలో అగ్నిప్రమాదం సంభవించింది. ఈ ఘటనను నగరానికి విషాదకరమైన పరిణామంగా మేయర్ గ్రెగోరీ డూసెట్ అభివర్ణించారు. లిమోజెస్‌లోని టౌన్‌హాల్‌లో భారీ అగ్నిప్రమాదం జరగడంతో భవనం పైకప్పులో కొంత భాగం కూలిపోయింది.
మార్సెయిల్‌లో నిరసనకారులు కొద్దిసేపు సిటీ హాల్‌లోకి ప్రవేశించడంతో పాటు దుకాణాలు, మున్సిపల్ పోలీస్ స్టేషన్‌పై దాడులు చేశారు. అక్కడ జరిగిన నష్టాన్ని మేయర్ బెనోయిట్ పాయన్ పరిమితమైనదిగా పేర్కొంటూనే, ఈ ఘటనలను తీవ్రంగా తప్పుబట్టారు.
రెన్నెస్, టౌలౌస్, మాంట్‌పెల్లియర్, గ్రెనోబుల్ నగరాల్లో ముసుగులు ధరించిన గుంపులు హింసకు పాల్పడినట్లు అంతర్గత వ్యవహారాల మంత్రిత్వ శాఖ వెల్లడించింది. అవిగ్నాన్, పా, వాలెన్స్ వంటి ప్రాంతాల్లోనూ భవనాలు దెబ్బతిన్నాయి. పారిస్‌లో దుస్తులు, ఆహార దుకాణాలపై దాడులు జరగగా, లిల్లేలోని యాపిల్ స్టోర్‌లోకి చొరబడిన నిరసనకారులు అక్కడి వస్తువులను దోచుకున్నారు.
పాఠశాల సమస్యలతో మొదలైన ఉద్యమం
సెకండరీ పాఠశాలల్లో సిబ్బంది కొరత, సౌకర్యాల క్షీణతపై విద్యార్థుల్లో నెలకొన్న అసంతృప్తి ఈ ఆందోళనలకు ప్రధాన కారణంగా మారింది. సెప్టెంబర్ మధ్య నుంచి విద్యార్థి సంఘాలు పాఠశాలలను దిగ్బంధించడం ప్రారంభించాయి. అనంతరం కార్మిక సంఘాలు, ఇతర సంస్థలు కూడా ఈ ఉద్యమంలో భాగమయ్యాయి.
అధిక వేతనాలు, మెరుగైన పెన్షన్లు, నిత్యావసరాల ధరలు తగ్గించడం, ప్రజల అవసరాలకు అనుగుణంగా ప్రభుత్వ సేవలను పరిరక్షించడం వంటి డిమాండ్లతో కార్మిక సంఘం సీజీటీ శనివారం నాటి ప్రదర్శనలకు మద్దతు తెలిపింది. దేశవ్యాప్తంగా ఐదు లక్షల మందికి పైగా ఈ ఆందోళనల్లో పాల్గొన్నట్లు ఆ సంఘం అంచనా వేసింది.
2018లో ప్రారంభమైన ఎల్లో వెస్ట్ ఉద్యమానికి చెందిన మద్దతుదారులు కూడా ప్రస్తుత నిరసనల్లో పాల్గొంటున్నారు. అప్పటి ఉద్యమానికి గుర్తుగా ఫ్లోరోసెంట్ పసుపు రంగు చొక్కాలను ధరిస్తున్నారు. విద్యార్థులు, కార్మిక సంఘాల సభ్యులతో పాటు ఇతర వర్గాల ప్రజలు కూడా ఆందోళనల్లో భాగమయ్యారు.
ప్రభుత్వం కఠిన చర్యలకు సిద్ధం
ప్రభుత్వ భవనాలు, వ్యాపార సంస్థలపై దాడులకు పాల్పడిన వారిపై విచారణ జరిపి చర్యలు తీసుకుంటామని ఫ్రాన్స్ అధ్యక్షుడు ఇమ్మాన్యుయేల్ మాక్రాన్ ప్రకటించారు. మరోవైపు, పాఠశాలల్లో సిబ్బంది కొరతను అధిగమించేందుకు మూడు వేల మంది ఉపాధ్యాయులను నియమించాలని ప్రభుత్వం ప్రణాళికలు సిద్ధం చేస్తోంది.
అయినప్పటికీ, జీవన వ్యయం, విద్యా రంగ సమస్యలు, ప్రభుత్వ విధానాలపై అసంతృప్తి నేపథ్యంలో నిరసనలు కొనసాగుతున్నాయి. శాంతిభద్రతలను కాపాడటం, ప్రజల ఆందోళనలకు పరిష్కారాలు చూపడం ఫ్రాన్స్ ప్రభుత్వానికి కీలక సవాలుగా మారింది
