ఆకాశాన్ని అందుకుంటున్న ముడి చమురు ధరలు

చికాగో మర్కంటైల్ ఎక్స్ఛేంజ్‌లో ట్రేడింగ్ తిరిగి ప్రారంభమైన తర్వాత అంతర్జాతీయ ప్రమాణం అయిన బ్రెంట్ క్రూడ్ బ్యారెల్ ధర $114 దాటిపోయింది. శుక్రవారం నాడు ముగింపు ధర $92.69 ఉండగా, రెండు రోజుల్లోనే ఏకంగా ఇది 23% పెరిగింది. యునైటెడ్ స్టేట్స్‌లో ఉత్పత్తి చేయబడిన తేలికపాటి, ముడి చమురు అయిన వెస్ట్ టెక్సాస్ ఇంటర్మీడియట్ కూడా బ్యారెల్‌కు $114 కు అమ్ముడు పోతోంది. ఇది శుక్రవారం ముగిసిన $90.90 కంటే 25% ఎక్కువ.

ఇరాన్ తన పౌర లక్ష్యాలపై దాడులు చేస్తోందని బహ్రెయిన్ ఆరోపించింది. ముఖ్యంగా డీశాలినేషన్ ప్లాంట్ లక్ష్యంగా బాంబు దాడులు చేస్తోందని విమర్శించింది. రాత్రిపూట ఇజ్రాయెల్ కూడా టెహ్రాన్ లోని కీలక లక్ష్యాలపై దాడులు చేసింది. ముఖ్యంగా ముడి చమురు కేంద్రాలపై మిస్సైల్స్ ప్రయోగించింది.

US ముడి చమురు ధర 36% పెరగడం, గత వారం బ్రెంట్ క్రూడ్ 28% పెరగడంతో ఈ పెరుగుదల సంభవించింది. యుద్ధం ఇప్పుడు రెండవ వారంలోకి అడుగుపెడుతుండడంతో, పెర్షియన్ గల్ఫ్ నుంచి చమురు, గ్యాస్ ఉత్పత్తి, తరలింపుకు కీలకమైన దేశాలు, ప్రదేశాలు చిక్కుకున్నాయి.

స్వతంత్ర పరిశోధన సంస్థ రిస్టాడ్ ఎనర్జీ ప్రకారం, దాదాపు 15 మిలియన్ బ్యారెళ్ల ముడి చమురు, అంటే ప్రపంచంలోని చమురులో దాదాపు 20% సాధారణంగా ప్రతిరోజూ హార్ముజ్ జలసంధి ద్వారా రవాణా అవుతాయి. ఇరాన్ క్షిపణి, డ్రోన్ దాడుల ముప్పు కారణంగా సౌదీ అరేబియా, కువైట్, ఇరాక్, ఖతార్, బహ్రెయిన్, యునైటెడ్ అరబ్ ఎమిరేట్స్, ఇరాన్ నుంచి చమురు, గ్యాస్‌ను తీసుకువెళ్లే ట్యాంకర్లు ఈ జలసంధి ద్వారా ప్రయాణించకుండా ఆగిపోయాయి.

ముడి చమురును ఎగుమతి చేసే సామర్థ్యం తగ్గినందున నిల్వ ట్యాంకులు నిండిపోవడంతో ఇరాక్, కువైట్, యుఎఈ తమ చమురు ఉత్పత్తిని తగ్గించాయి. యుద్ధం ప్రారంభమైనప్పటి నుంచి ఇరాన్, ఇజ్రాయెల్, యునైటెడ్ స్టేట్స్ కూడా చమురు, గ్యాస్ సౌకర్యాలపై దాడి చేశాయి. ఇది సరఫరా ఆందోళనలను మరింత తీవ్రతరం చేసింది. చివరిగా రష్యా- ఉక్రెయిన్ మధ్య యుద్ధం తీవ్రతరం అయిన తరువాత ముడి చమురు బ్యారెల్ ధరలు విపరీతంగా పెరిగాయి.

మార్చి 1న ఇజ్రాయెల్ - అమెరికా ఇరాన్‌పై దాడి చేసినప్పటి నుంచి ప్రపంచవ్యాప్తంగా చమురు ధరలు పెరగడం ఆర్థిక మార్కెట్లను కుదిపేసింది. అధిక ఇంధన ఖర్చులు ద్రవ్యోల్బణానికి కారణమవుతాయని, ఆర్థిక వ్యవస్థ ప్రధాన చోదక శక్తి అయిన అమెరికా వినియోగదారుల ఖర్చు తగ్గడానికి దారితీస్తుందనే ఆందోళనలను రేకెత్తించింది.