‘‘ఇరాన్ కు నష్టపరిహారం ఇస్తామనే వార్త అబద్దం’’

"అణ్వాయుధాన్ని ఎప్పటికీ తయారు చేయబోమని ఉండబోమని ఇరాన్ అంగీకరించింది! అలాగే, అమెరికా ఇరాన్‌కు 300 మిలియన్ డాలర్లు చెల్లిస్తోందన్న కథనం ఫేక్ న్యూస్, దీనిని డెమోక్రాట్లు ప్రచారం చేస్తున్నారు!!!" అని తన సొంత సోషల్ మీడియా ట్రూత్ లో ట్రంప్ ట్వీట్ చేశారు.

గల్ఫ్‌లో ఇటీవల జరిగిన ఘర్షణను ముగించే లక్ష్యంతో అమెరికా, ఇరాన్‌లు ఒక ప్రాథమిక ఒప్పంద పత్రంపై సంతకాలు చేశాయన్న వార్తల నేపథ్యంలో ట్రంప్ ఈ వ్యాఖ్యలు చేశారు. అయితే, ఈ ఒప్పందం వివరాలు ఇంకా అస్పష్టంగానే ఉన్నాయి.

శాశ్వత కాల్పుల విరమణపై చర్చలు ఇంకా కొనసాగుతున్నాయి. అంతకుముందు, యుద్ధాన్ని ముగించడానికి వాషింగ్టన్, టెహ్రాన్‌లు ఒక ప్రాథమిక ఒప్పందంపై సంతకాలు చేశాయని ట్రంప్ ప్రకటించారు. ఇరాన్ అధ్యక్షుడు మసూద్ పెజెష్కియన్ కూడా ఈ ఒప్పంద పత్రాన్ని అంగీకరిస్తూ, పోరాటాన్ని ముగించే దిశగా ఇది ఒక "ముఖ్యమైన అడుగు" అని పేర్కొన్నారు.

అయితే, శాశ్వత కాల్పుల విరమణ ఒప్పందం ఇంకా ఖరారు కాలేదని ఆయన నొక్కి చెప్పారు. సంతకం చేసిన పత్రం కేవలం ఒకటిన్నర పేజీలు మాత్రమే ఉందని, ఇది ఒక వివరణాత్మక ఒప్పందం కాకుండా ఒక విస్తృత చట్రంగా పనిచేస్తుందని వాన్స్ చెప్పారు. ఈ ఒప్పందంలో ఇరాన్‌ పై విధించిన ఆంక్షల ఉపశమన ప్యాకేజీ కూడా ఉంది. దీనికి సంబంధించిన మరిన్ని వివరాలు రాబోయే రోజుల్లో వెల్లడవుతాయని భావిస్తున్నారు.

G7 శిఖరాగ్ర సమావేశం కోసం ఫ్రాన్స్‌కు చేరుకున్న అనంతరం మాట్లాడిన ట్రంప్, ఈ ఒప్పందంపై శుక్రవారం జెనీవాలో లాంఛనంగా సంతకం చేస్తారని, ఈ కార్యక్రమంలో అమెరికాకు ఉపాధ్యక్షుడు జేడీ వాన్స్ ప్రాతినిధ్యం వహిస్తారని చెప్పారు. సంతకాల కార్యక్రమానికి తన హాజరుపై అడిగిన ప్రశ్నకు సమాధానంగా, "నేను పాల్గొనవచ్చు, పాల్గొనకపోవచ్చు" అని అధ్యక్షుడు అన్నారు. అవగాహన ఒప్పందం పూర్తి పాఠం "త్వరలోనే... అంటే శుక్రవారం తర్వాత ఎప్పుడైనా" విడుదల చేస్తారని ట్రంప్ చెప్పారు.

మీడియా ఇంటర్వ్యూలలో వాన్స్ మాట్లాడుతూ, శాంతి ఒప్పందంపై ఆదివారం డిజిటల్‌గా సంతకం చేశారని, దాని పూర్తి పాఠం ఈ వారం చివరలో బయటకు వచ్చే అవకాశం ఉందని చెప్పారు. "మేము నిన్న (ఆదివారం) ఇప్పటికే ఒప్పందంపై డిజిటల్‌గా సంతకం చేశాము" అని ABC న్యూస్‌లోని 'గుడ్ మార్నింగ్ అమెరికా' కార్యక్రమంలో వాన్స్ అన్నారు.

పాకిస్థాన్, ఖతార్‌లతో సహా మధ్యవర్తుల ద్వారా ఈ ఒప్పందం కుదిరింది. అమెరికా, ఇరాన్‌ల మధ్య ఒప్పందంపై సంతకాల కార్యక్రమాన్ని జూన్ 19న స్విట్జర్లాండ్‌లో తమ దేశం నిర్వహిస్తుందని పాకిస్థాన్ ప్రధాన మంత్రి షెహబాజ్ షరీఫ్ సోమవారం తెలిపారు.

శుక్రవారం నాటికి హార్ముజ్ జలసంధి పూర్తిగా తెరుచుకుంటుందని, చమురు, గ్యాస్ సరఫరాలు అత్యంత వేగంగా జరిగేలా చూసేందుకు భారీ ట్యాంకర్ల రాకపోకలకు ప్రాధాన్యత ఇస్తామని ఒక సీనియర్ అమెరికా అధికారి చెప్పినట్లు న్యూయార్క్ టైమ్స్ పేర్కొంది.