NEET పరీక్షల్లో ఇక లీక్‌లకు చెక్?.. కేంద్ర సంస్కరణలపై సీజేఐ నిఘా

భవిష్యత్తులో NEET పరీక్ష ప్రశ్నపత్రాల లీక్‌లు జరగకుండా కేంద్ర ప్రభుత్వం తీసుకునే చర్యలను తాము నిశితంగా పర్యవేక్షిస్తామని సుప్రీంకోర్టు స్పష్టం చేసింది. తాత్కాలిక చర్యలతో సమస్య పరిష్కారం కాదని, శాశ్వత సంస్కరణలు అవసరమని కోర్టు పేర్కొంది. జస్టిస్ పి.ఎస్. నరసింహ, జస్టిస్ అలోక్ అరధేలతో కూడిన ధర్మాసనం ఈ వ్యాఖ్యలు చేసింది. ఫెడరేషన్ ఆఫ్ ఆల్ ఇండియా మెడికల్ అసోసియేషన్ (FAIMA) సహా పలు పిటీషన్లపై విచారణ సందర్భంగా ఈ ఆదేశాలు వెలువడ్డాయి.

సంస్థాగత సంస్కరణలకే ప్రాధాన్యం..

పేపర్ లీక్‌లను అరికట్టేందుకు ఏటా తాత్కాలిక ఏర్పాట్లు చేయడం సరైంది కాదని కోర్టు అభిప్రాయపడింది. ఈసారి ప్రశ్నపత్రాల రవాణాకు వైమానిక దళాన్ని వినియోగించడం కూడా తాత్కాలిక చర్యేనని పేర్కొంది. ఇలాంటి పరిస్థితులు మళ్లీ రాకుండా శాశ్వత వ్యవస్థను రూపొందించాలని కేంద్రానికి సూచించింది.

సమగ్ర నివేదిక ఇవ్వాలని కేంద్రానికి ఆదేశం..

రాధాకృష్ణన్ కమిటీ సిఫార్సుల అమలు, పరీక్షల్లో పారదర్శకత కోసం తీసుకున్న చర్యలు, ఐఐటీ తరహా విధానాలను ఎలా అమలు చేస్తారనే అంశాలపై సమగ్ర అఫిడవిట్ దాఖలు చేయాలని సుప్రీంకోర్టు కేంద్రాన్ని ఆదేశించింది. భవిష్యత్తులో పేపర్ లీక్‌లను పూర్తిగా అరికట్టేందుకు చేపట్టే అన్ని చర్యలను కూడా ఆ నివేదికలో వివరించాలని సూచించింది.

డేటా భద్రత, సైబర్ సెక్యూరిటీపై దృష్టి..

కంప్యూటర్ ఆధారిత పరీక్షల భద్రత ఎలా ఉంటుంది? డేటా బదిలీ, నిల్వ, రక్షణ ఎలా జరుగుతుంది? సైబర్ సెక్యూరిటీ బాధ్యత ఎవరిది? వంటి అంశాలపై కూడా పూర్తి వివరాలు ఇవ్వాలని ధర్మాసనం కోరింది.

డేటా భద్రతకు అత్యంత ప్రాధాన్యం ఇవ్వాలని, పరీక్షల వ్యవస్థను పూర్తిగా భద్రంగా మార్చాల్సిన అవసరం ఉందని స్పష్టం చేసింది.

కేంద్రం హామీ..

కేంద్రం తరఫున హాజరైన సొలిసిటర్ జనరల్ తుషార్ మెహతా మాట్లాడుతూ, రాధాకృష్ణన్ కమిటీ సిఫార్సులను పూర్తిగా ఆమోదించామని తెలిపారు. విద్యార్థుల భవిష్యత్తు దృష్ట్యా ప్రభుత్వం ఇప్పటికే సంస్కరణలను అమలు చేస్తోందని కోర్టుకు వివరించారు.

27న తదుపరి విచారణ..

కేంద్రం దాఖలు చేసే అఫిడవిట్‌ను పరిశీలించిన తర్వాత తదుపరి చర్యలపై నిర్ణయం తీసుకుంటామని సుప్రీంకోర్టు తెలిపింది. ఈ కేసు విచారణను జూలై 27కు వాయిదా వేస్తూ, నీట్ పరీక్షల వ్యవస్థలో పూర్తి స్థాయి సంస్కరణలు జరిగే వరకు ఈ అంశాన్ని నిరంతరం పర్యవేక్షిస్తామని స్పష్టం చేసింది.