మొయినాబాద్ డ్రగ్స్ కేసు: రోహిత్ రెడ్డికి బెయిల్

మొయినాబాద్ ఫాంహౌస్ డ్రగ్స్ కేసులో తాజా పరిణామం చోటుచేసుకుంది. తాండూరు మాజీ ఎమ్మెల్యే పైలట్ రోహిత్ రెడ్డికి తెలంగాణ హైకోర్టు బెయిల్ మంజూరు చేసింది. దీంతో ఆయన రేపు, ఏప్రిల్ 29న చంచల్‌గూడ జైలు నుంచి విడుదలయ్యే అవకాశం ఉందని సమాచారం. ఈ కేసు మార్చి 14న రాత్రి మొదలైంది. ఆ రోజు మొయినాబాద్‌లోని ఫాంహౌస్‌పై పోలీసులు దాడులు నిర్వహించారు. అక్కడ డ్రగ్స్, మద్యం వినియోగం జరిగినట్లు గుర్తించారు. కొకైన్, మద్యం బాటిళ్లు, ఒక ఫైర్ ఆర్మ్‌ను పోలీసులు స్వాధీనం చేసుకున్నారు.

దాడుల అనంతరం పోలీసులు పైలట్ రోహిత్ రెడ్డి, ఆయన సోదరుడు రితేష్ రెడ్డి, వ్యాపారవేత్త నమిత్ శర్మను అరెస్ట్ చేశారు. ముగ్గురిని జైలుకు పంపించారు. అయితే ఈ కేసులో రోహిత్ రెడ్డి తరఫున మాత్రమే న్యాయవాదులు హైకోర్టులో బెయిల్ పిటిషన్ దాఖలు చేశారు. కోర్టు ఆయనకు బెయిల్ మంజూరు చేసింది. పార్టీలో పాల్గొన్న 11 మందికి డ్రగ్స్ పరీక్షలు నిర్వహించగా, వారిలో ఆరుగురికి పాజిటివ్‌గా తేలింది. ఫాంహౌస్‌లో జరిగిన ఘటనపై పోలీస్ అధికారి ఫిర్యాదు నమోదు చేసినట్లు తెలిసింది.

అక్కడి నుంచి ఒక రివాల్వర్, లైవ్ రౌండ్, ఖాళీ కార్ట్రిడ్జ్‌లు స్వాధీనం చేసినట్లు వివరాలు వెల్లడయ్యాయి. రోహిత్ రెడ్డి డ్రైవర్ వద్ద కూడా కొకైన్ లభించినట్లు పోలీసులు గుర్తించారు. అలాగే పెద్ద మొత్తంలో విదేశీ మద్యం బాటిళ్లను సీజ్ చేశారు. పార్టీలో పాల్గొన్న పలువురిపై కేసులు నమోదు చేసి అదుపులోకి తీసుకున్నారు. ఈ ఘటనలో ఒక నెలకు పైగా జైలులో ఉన్న రోహిత్ రెడ్డికి ఇప్పుడు బెయిల్ లభించింది. కేసుకు సంబంధించి మరింత దర్యాప్తు కొనసాగుతున్నట్లు పోలీసులు తెలిపారు.