శంకర్ గౌడ్‌ది ఆత్మహత్యకు ప్రభుత్వమే కారణం: బీఆర్ఎస్

వరంగల్ జిల్లా నర్సంపేటలో ఆర్టీసీ డ్రైవర్ శంకర్ గౌడ్ మృతి ఘటనపై రాజకీయ ఉద్రిక్తత పెరిగింది. తాజా పరిణామాల్లో బీఆర్‌ఎస్ నేతలు ప్రభుత్వంపై తీవ్ర ఆరోపణలు చేశారు. శంకర్ గౌడ్ మృతి ఆత్మహత్య కాదని, ప్రభుత్వ నిర్లక్ష్యం కారణమని బీఆర్‌ఎస్ వర్కింగ్ ప్రెసిడెంట్ కేటీఆర్ ఆరోపించారు. ఆర్టీసీ కార్మికుల సమస్యలు చాలా కాలంగా పరిష్కారం కాలేదని, అదే ఒత్తిడితో ఈ ఘటన జరిగిందని ఆయన అన్నారు. అంతేకాకుండా సంస్థను కాపాడటం కోసం కోలా శంకర్ గౌడ్ చేసిన ప్రాణ త్యాగానికి నివాళులు అర్పించారు మాజీ మంత్రి హరీష్ రావు. ఈ ఘటన తర్వాత శంకర్ గౌడ్ పార్థివదేహాన్ని నర్సంపేట డిపోకు తీసుకెళ్లి నివాళులు అర్పించాలనుకున్నా అనుమతి ఇవ్వలేదని ఆగ్రహం వ్యక్తం చేశారు.

మాజీ ఎమ్మెల్యే పెద్ది సుదర్శన్ రెడ్డి సహా పలువురు బీఆర్‌ఎస్ నేతలు, కార్మికులు, సంఘాల నాయకులను పోలీసులు అరెస్ట్ చేసినట్టు చెప్పారు. రాష్ట్రంలోని పలు ప్రాంతాల్లో కూడా ఇలాంటి చర్యలు జరిగాయని పేర్కొన్నారు. అరెస్టు చేసిన వారిని వెంటనే విడుదల చేయాలని డిమాండ్ చేశారు. శంకర్ గౌడ్ కుటుంబానికి ప్రభుత్వం కోటి రూపాయల పరిహారం ఇవ్వాలని, కుటుంబంలో ఒకరికి ఉద్యోగం కల్పించాలని కోరారు. కుటుంబానికి అన్ని విధాలుగా సహాయం చేయాల్సిన అవసరం ఉందని తెలిపారు.

ఆర్టీసీ కార్మికులు సమ్మె చేస్తున్నప్పటికీ ప్రభుత్వం స్పందించలేదని విమర్శించారు. ఎన్నికల సమయంలో ఇచ్చిన హామీలు అమలు కాలేదని, అందుకే కార్మికుల్లో నిరాశ పెరిగిందని చెప్పారు. ఆర్టీసీని బలహీనపరిచే చర్యలు ఆపి, కార్మికులతో చర్చలు జరపాలని సూచించారు. న్యాయమైన డిమాండ్లను త్వరగా పరిష్కరించాలని కోరారు.

ఒకే రోజులో ముగ్గురు ఆర్టీసీ డ్రైవర్లు ఆత్మహత్య ప్రయత్నాలు చేసిన ఘటనను తీవ్రంగా ప్రస్తావించారు. ఈ సంఘటన రాష్ట్రంలో ఆందోళన కలిగించే విషయమని అన్నారు. కార్మికులు ఆత్మహత్యల వంటి చర్యలకు దూరంగా ఉండాలని, మనోధైర్యంతో పోరాటం కొనసాగించాలని బీఆర్‌ఎస్ నేతలు పిలుపునిచ్చారు. వారి పోరాటానికి పూర్తి మద్దతు ఉంటుందని తెలిపారు. ప్రభుత్వం వెంటనే చర్యలు తీసుకుని సమస్యలను పరిష్కరిస్తే పరిస్థితులు మెరుగుపడే అవకాశం ఉందని సూచనలు వినిపిస్తున్నాయి.