రిజర్వేషన్ల 50 శాతం సీలింగ్ ఎత్తేయాలి: మహేష్ గౌడ్

రిజర్వేషన్లలో ఉన్న 50 శాతం సీలింగ్‌ను ఎత్తివేయాలని డిమాండ్ చేస్తూ కాంగ్రెస్ పార్టీ ఉద్యమబాట పట్టనుంది. ఈ విషయాన్ని తెలంగాణ కాంగ్రెస్ అధ్యక్షుడు బొమ్మ మహేష్ కుమార్ గౌడ్ వెల్లడించారు. ఈ విషయంలో కేంద్రంపై ఒత్తిడి తీసుకస్తామని తెలిపారు. ఓబీసీ కులాల పూర్తి లెక్కలు తేలితే రిజర్వేషన్లపై ఉన్న పరిమితిని తొలగించే అవకాశం ఉంటుందని టీపీసీసీ అధ్యక్షుడు మహేష్ కుమార్ గౌడ్ తెలిపారు. గాంధీ భవన్‌లో జరిగిన సమావేశంలో ఆయన ఈ అంశంపై మాట్లాడారు.

దేశంలో ఓబీసీలు ఎంతమంది ఉన్నారు? ఏ కులం ఎంత వెనుకబడి ఉంది? అనే లెక్కలు స్పష్టంగా ఉండాలని మహేష్ కుమార్ గౌడ్ అన్నారు. కులాల జనాభా వివరాలు లేకుండా సామాజిక న్యాయం సాధ్యం కాదని పేర్కొన్నారు. రిజర్వేషన్లపై సుప్రీంకోర్టు 50 శాతం సీలింగ్ విధించిందని ఆయన గుర్తు చేశారు. ఈ పరిమితిని ఎత్తివేయాలని కాంగ్రెస్ వర్కింగ్ కమిటీ నిర్ణయించిందని తెలిపారు. ఓబీసీ కులాల డేటా పూర్తిగా ఖరారైతే 50 శాతం సీలింగ్‌ను తొలగించే అవకాశం ఉంటుందని చెప్పారు.

మహిళా రిజర్వేషన్లపైనా ప్రభావం

మహిళా రిజర్వేషన్లలో ఓబీసీ మహిళలకు రిజర్వేషన్ దక్కకపోయే అవకాశం ఉందని మహేష్ కుమార్ గౌడ్ ఆందోళన వ్యక్తం చేశారు. అందుకే ఓబీసీల పూర్తి జనాభా లెక్కలు తేలడం అవసరమని చెప్పారు. ఓబీసీ సామాజిక న్యాయం అంశం పదేళ్లుగా ముందుకు సాగడం లేదని అన్నారు. కేంద్ర ప్రభుత్వం వెంటనే ఓబీసీ కులగణన చేపట్టాలని డిమాండ్ చేశారు. తెలంగాణ కులగణనను మోడల్‌గా.. తెలంగాణలో సీఎం రేవంత్ రెడ్డి శాస్త్రీయంగా కుల సర్వే నిర్వహించారని మహేష్ కుమార్ గౌడ్ చెప్పారు. రాష్ట్రంలో జరిగిన కులగణన దేశానికి మోడల్‌గా మారిందని పేర్కొన్నారు.

కుల సంఘాలతో మాట్లాడి తెలంగాణలో 134 ఓబీసీ కులాలను గుర్తించామని తెలిపారు. గతంలో కేంద్ర ప్రభుత్వం నిర్వహించిన సోషియో ఎకనమిక్ సర్వేలో 46 లక్షల కులాల వివరాలు వచ్చాయని గుర్తు చేశారు. అలాంటి లెక్కలు కచ్చితమైన ఓబీసీ జనగణన కాదని అన్నారు. జనాభా లెక్కలతో పాటు ఓబీసీ కులగణన చేపట్టాలని కాంగ్రెస్ పార్టీ గత ఐదేళ్లుగా కేంద్రంపై ఒత్తిడి తెస్తోందని మహేష్ కుమార్ గౌడ్ చెప్పారు. కొప్పుల రాజు, కాంగ్రెస్ వర్కింగ్ కమిటీ సభ్యులు కూడా ఈ అంశాన్ని ముందుకు తీసుకెళ్తున్నారని తెలిపారు.

ఓబీసీ కులగణనపై పార్లమెంట్‌లో కాంగ్రెస్ కేంద్ర ప్రభుత్వాన్ని నిలదీసిందని అన్నారు. ఫ్యామిలీ సర్వేతో పాటు ఓబీసీ కులగణన చేస్తామని అమిత్ షా చెప్పినప్పటికీ, సంబంధిత ఫామ్‌లో ఓబీసీ ప్రస్తావన లేదని ఆయన పేర్కొన్నారు. ఓబీసీల హక్కుల కోసం దేశవ్యాప్తంగా ఉద్యమాన్ని తీసుకెళ్లాలని కాంగ్రెస్ భావిస్తోందని మహేష్ కుమార్ గౌడ్ తెలిపారు. ఇందులో భాగంగా 100 రోజుల పాటు ‘బీసీ హక్కుల గర్జన’ కార్యక్రమం నిర్వహించబోతున్నట్లు చెప్పారు.

కాంగ్రెస్ అధ్యక్షుడు మల్లికార్జున ఖర్గే, రాహుల్ గాంధీ ఇద్దరూ ఓబీసీ కులగణనపై ప్రధాని మోదీకి లేఖలు రాశారని తెలిపారు. తెలంగాణలో జరిగిన కులగణనను దేశవ్యాప్తంగా అమలు చేయాలని ఏఐసీసీ ప్రచారం చేస్తోందన్నారు. కులాల మధ్య ఉన్న అడ్డుగోడల వల్ల దేశంలో సమానత్వం సాధ్యం కాలేదని మహేష్ కుమార్ గౌడ్ అన్నారు. కులాల వారీగా లెక్కలు తేలితే ఏ వర్గం ఎంత వెనుకబడి ఉందో స్పష్టంగా తెలుస్తుందని చెప్పారు.

దేశంలో 50 శాతం జనాభా వద్ద కేవలం 3 శాతం సంపద ఉందని ఆయన పేర్కొన్నారు. పెద్ద కాంట్రాక్టులు ఎవరి చేతుల్లోకి వెళ్తున్నాయో కూడా చూడాల్సిన అవసరం ఉందన్నారు. సరైన కులగణన, కచ్చితమైన గణాంకాలు సాధించడమే తమ లక్ష్యమని మహేష్ కుమార్ గౌడ్ తెలిపారు. ఓబీసీల పూర్తి జనాభా లెక్కలు తేలడం, రిజర్వేషన్లపై 50 శాతం పరిమితిని తొలగించడం, సామాజిక న్యాయాన్ని ముందుకు తీసుకెళ్లడం వంటి అంశాలను దేశవ్యాప్త చర్చగా మార్చేందుకు కాంగ్రెస్ కార్యక్రమాలు చేపడుతోందని వివరించారు.