దానం వర్సెస్ విజయారెడ్డి? కోర్టులో కొత్త పంచాయితీ!

ర‌చ్చ‌ - రాజ‌కీయం @ 5 పి.ఎం.

1) దానం వర్సెస్ విజయారెడ్డి? కోర్టులో కొత్త పంచాయితీ!

2) SLBC, కాళేశ్వరంలోకి ఆర్మీ ఇంజినీర్ల ఎంట్రీ..

3) కుషాయిగూడలో హిట్‌ అండ్‌ రన్‌.. కార్మికులపైకి దూసుకొచ్చిన కారు

1) దానం వర్సెస్ విజయారెడ్డి? కోర్టులో కొత్త పంచాయితీ!

ఖైరతాబాద్ ఉప ఎన్నిక వ్యవహారం మరోసారి హాట్‌టాపిక్‌గా మారింది. దానం నాగేందర్ అనర్హతతో ఖాళీ అయిన ఖైరతాబాద్ స్థానానికి ఉప ఎన్నిక జరగాల్సి ఉండగా.. ఇప్పుడు ఆ ఎన్నికకు బ్రేక్ వేయాలంటూ హైకోర్టులో పిటిషన్ దాఖలైంది. కాంగ్రెస్ నేత, పీజేఆర్ కుమార్తె విజయారెడ్డి ఈ పిటిషన్ వేశారు.

అసలు విజయారెడ్డి ఏం కోరుతున్నారు?

2024లో దానం నాగేందర్ ఎన్నికను సవాల్ చేస్తూ తాను దాఖలు చేసిన ఎన్నికల పిటిషన్ ఇంకా పెండింగ్‌లో ఉందని విజయారెడ్డి కోర్టు దృష్టికి తీసుకెళ్లారు. ఆ కేసులో తుది తీర్పు వచ్చే వరకు ఖైరతాబాద్‌కు ఉప ఎన్నిక నిర్వహించకూడదని ఆమె కోరారు. అంతేకాదు.. అప్పటి వరకు ఉప ఎన్నిక నోటిఫికేషన్ జారీ చేయకుండా ఎన్నికల సంఘాన్ని ఆదేశించాలని హైకోర్టును అభ్యర్థించారు. ఈ పిటిషన్‌లో ఈసీతో పాటు దానం నాగేందర్‌ను ప్రతివాదులుగా పేర్కొన్నారు.

దానం నాగేందర్‌పై అనర్హత వేటు పడటంతో ఖైరతాబాద్ అసెంబ్లీ సీటు ఖాళీ అయింది. హైకోర్టు తీర్పును సుప్రీంకోర్టు కూడా సమర్థించడంతో ఉప ఎన్నికకు మార్గం సుగమమైంది. అనంతరం అసెంబ్లీ సెక్రటేరియట్ సీటు ఖాళీగా ఉన్నట్లు గెజిట్ నోటిఫికేషన్ జారీ చేసింది.

అయితే.. ఇప్పుడు విజయారెడ్డి దాఖలు చేసిన పిటిషన్‌తో ఉప ఎన్నిక ప్రక్రియపై న్యాయపరమైన ప్రశ్న తలెత్తింది. మరోవైపు కాంగ్రెస్‌లోనూ పోటీ! ఉప ఎన్నిక వస్తే కాంగ్రెస్ టికెట్ కోసం విజయారెడ్డి, దానం నాగేందర్ పేర్లు చర్చలో ఉన్నాయి. వీరిద్దరి మధ్య చాలాకాలంగా రాజకీయ విభేదాలు ఉన్నాయి. ఇటీవల కూడా కాంగ్రెస్‌లో ఖైరతాబాద్ అభ్యర్థిత్వంపై పలువురి పేర్లు చర్చకు వచ్చాయి. ఇప్పుడు విజయారెడ్డి ఏకంగా ఉప ఎన్నిక నోటిఫికేషన్‌ను నిలిపివేయాలని కోర్టును ఆశ్రయించడం ఆసక్తికరంగా మారింది.

ఇక కీలక ప్రశ్న ఒక్కటే..విజయారెడ్డి పిటిషన్‌పై హైకోర్టు ఏం నిర్ణయిస్తుంది? ఉప ఎన్నిక నోటిఫికేషన్‌పై స్టే వస్తుందా? లేక ఖైరతాబాద్ ఉప ఎన్నిక ప్రక్రియ యథావిధిగా ముందుకు సాగుతుందా? ఇదే ఇప్పుడు ఖైరతాబాద్ రాజకీయాల్లో హాట్‌టాపిక్‌గా మారింది.

2) SLBC, కాళేశ్వరంలోకి ఆర్మీ ఇంజినీర్ల ఎంట్రీ..

రెండు దశాబ్దాలుగా కొనసాగుతున్న SLBC టన్నెల్ పనులు, మరోవైపు కాళేశ్వరం ప్రాజెక్టులో దెబ్బతిన్న మేడిగడ్డ, అన్నారం, సుందిళ్ల బ్యారేజీల పునరుద్ధరణ. ఈ రెండు కీలక ప్రాజెక్టుల పనుల్లోకి ఇప్పుడు ఆర్మీ ఇంజినీర్లు రాబోతున్నారు. అసలు ఆర్మీ ఇంజినీర్లను ఎందుకు తీసుకొస్తున్నారు? వాళ్లు ఏం చేయబోతున్నారు? ప్రభుత్వానికి వీళ్ల సేవలు ఎలా ఉపయోగపడతాయి?

SLBC విషయానికి వస్తే..

శ్రీశైలం లెఫ్ట్ బ్యాంక్ కెనాల్.. అంటే SLBC. సుమారు 44 కిలోమీటర్ల పొడవైన ఈ టన్నెల్‌లో ఇప్పటివరకు దాదాపు 35 కిలోమీటర్ల పనులు పూర్తయ్యాయి. మిగిలిన పనులను 2028 జూన్ నాటికి పూర్తి చేయాలని ప్రభుత్వం లక్ష్యంగా పెట్టుకుంది. అయితే ఇది సాధారణ టన్నెల్ కాదు. భూగర్భంలో తవ్వకాలు, రాళ్ల స్వభావం, వెంటిలేషన్, నీటి సమస్యలు, కార్మికుల భద్రత, ఇలా అనేక సాంకేతిక సవాళ్లు ఉన్నాయి.

ముఖ్యంగా 2025 ఫిబ్రవరిలో SLBC టన్నెల్‌లో కొంత భాగం కూలిపోవడంతో ఎనిమిది మంది ప్రాణాలు కోల్పోయారు. దీంతో టన్నెల్ పనుల్లో భద్రత, క్షేత్రస్థాయి పర్యవేక్షణ మరింత కీలకంగా మారింది.ఈ నేపథ్యంలో ముగ్గురు ఆర్మీ అధికారుల్లో ఒకరిని SLBC టన్నెల్‌లోని రెండు తవ్వకాల ప్రాంతాల పనుల పర్యవేక్షణకు కేటాయించనున్నారు. అంటే.. టన్నెల్ పనుల పురోగతి, భద్రత, క్షేత్రస్థాయి సమన్వయం వంటి అంశాల్లో ఆర్మీ ఇంజినీర్ పాత్ర కీలకంగా ఉండనుంది.

ఇక కాళేశ్వరం విషయానికి వస్తే..మేడిగడ్డ, అన్నారం, సుందిళ్ల బ్యారేజీల పునరుద్ధరణ ప్రభుత్వం ముందున్న మరో పెద్ద సవాలు.

ఈ మూడు బ్యారేజీలకు సంబంధించిన మట్టి, కాంక్రీట్, ఫౌండేషన్ పరీక్షలు National Dam Safety Authority (NDSA) సిఫారసుల మేరకు జరుగుతున్నాయి. పరీక్షల ఫలితాలను IIT బొంబాయి తదితర సంస్థలు పరిశీలిస్తున్నాయి.

ఆ ఫలితాల ఆధారంగా తుది పునరుద్ధరణ డిజైన్లు సిద్ధం చేయాల్సి ఉంది. ఈ రిపేర్, రిహాబిలిటేషన్ పనులను పర్యవేక్షించేందుకు మరో ఇద్దరు ఆర్మీ ఇంజినీర్లను కేటాయించనున్నారు.మరి ఆర్మీ ఇంజినీర్ల అవసరం ఎందుకు వచ్చింది?ఇక్కడే అసలు విషయం ఉంది.

ప్రభుత్వం చెబుతున్న ప్రకారం.. క్లిష్టమైన పరిస్థితుల్లో పనిచేసిన అనుభవం, సాంకేతిక పరిజ్ఞానం, క్రమశిక్షణ, క్షేత్రస్థాయి పర్యవేక్షణ, మిషన్-ఓరియెంటెడ్ విధానం ఆర్మీ ఇంజినీర్లలో ఉంటాయి.

అయితే సాధారణ ఇరిగేషన్ ఇంజినీర్‌కు, ఆర్మీ ఇంజినీర్‌కు మధ్య తేడా ఏంటి?

టన్నెల్ నిర్మాణం, భూగర్భ పనులు, కఠినమైన పరిస్థితుల్లో ఆపరేషన్లు, భద్రత, వేగంగా నిర్ణయాలు తీసుకోవడం వంటి అంశాల్లో ఆర్మీ ఇంజినీర్ల అనుభవం ఎంతవరకు ఉపయోగపడుతుంది?ఈ విషయాన్ని తెలంగాణ ఇంజినీర్స్ ఫోరం కన్వీనర్, రిటైర్డ్ ఇరిగేషన్ ఇంజనీర్ టి. లక్ష్మీనారాయణతో ఫెడ‌ర‌ల్ తెలంగాణా మాట్లాడింది.

ఈ నిర్ణయం వెనుక ప్రభుత్వం చెబుతున్న ప్రధాన లక్ష్యాలు రెండు.

1. 2028 జూన్ నాటికి SLBC టన్నెల్ పనులను పూర్తి చేయడం.

2. మేడిగడ్డ, అన్నారం, సుందిళ్ల బ్యారేజీలను సురక్షితంగా పునరుద్ధరించడం.

అయితే ఈ నిర్ణయానికి మరో ఆసక్తికరమైన కోణం కూడా ఉంది. మంత్రి ఉత్తమ్‌కుమార్‌రెడ్డి, ఆర్మీ చీఫ్ జనరల్ ధీరజ్ సేథ్ ఇద్దరూ నేషనల్ డిఫెన్స్ అకాడమీ పూర్వ విద్యార్థులు. ఉత్తమ్ ఎయిర్‌ఫోర్స్ స్ట్రీమ్‌లో, ధీరజ్ సేథ్ ఆర్మీ స్ట్రీమ్‌లో శిక్షణ పొందారు. ఉత్తమ్‌కుమార్‌రెడ్డి ఢిల్లీలో ఆర్మీ చీఫ్‌ను కలిసి తెలంగాణకు ఆర్మీ ఇంజినీర్లను డిప్యుటేషన్‌పై పంపాలని కోరారు. ఆ తర్వాత ఆర్మీ హెడ్‌క్వార్టర్స్ నుంచి ముగ్గురు అధికారుల పేర్లు వచ్చినట్లు మంత్రి తెలిపారు.

అంతేకాదు.. కల్నల్ పరిక్షిత్ మెహ్రా గతంలో తెలంగాణ ప్రభుత్వంతో డిప్యుటేషన్‌పై పనిచేసిన అనుభవం కూడా ఈ నిర్ణయంలో కీలకంగా మారిందని ఉత్తమ్‌కుమార్‌రెడ్డి చెప్పారు.

ఆయన SLBC, కాళేశ్వరం పనులతో అనుసంధానమై పనిచేసిన అనుభవం ఆధారంగానే మరింత మంది ఆర్మీ ఇంజినీర్లను కోరినట్లు మంత్రి వెల్లడించారు.అంటే.. ఆర్మీ ఇంజినీర్లను తీసుకురావడానికి ప్రభుత్వం చెబుతున్న ప్రధాన కారణాలు

1. టెక్నికల్ నైపుణ్యం,

2. క్లిష్ట పరిస్థితుల్లో పనిచేసిన అనుభవం,

3. పర్యవేక్షణ,

4. భద్రత,

5. పనుల వేగం.

అదే సమయంలో ఉత్తమ్‌కుమార్‌రెడ్డికి ఆర్మీ చీఫ్‌తో ఉన్న పూర్వ పరిచయం.. ఆర్మీ ఇంజినీర్లను డిప్యుటేషన్‌పై తీసుకురావడంలో అధికారిక సమన్వయానికి ఉపయోగపడిన అంశంగా కనిపిస్తోంది.

కాళేశ్వరం ప్రాజెక్టు ఇప్పటికే రాజకీయంగానూ కీలక అంశంగా ఉంది. గత నిర్మాణంలో ఎదురైన నాణ్యత, భద్రత, జాప్యంపై వచ్చిన విమర్శల నేపథ్యంలో.. ఇప్పుడు పునరుద్ధరణ పనుల్లో సాంకేతిక పర్యవేక్షణకు ప్రభుత్వం ప్రాధాన్యం ఇస్తోంది.

మరి ఆర్మీ ఇంజినీర్ల రాకతో SLBC, కాళేశ్వరం పనులు ఎంత వేగంగా ముందుకు వెళ్తాయి? SLBC టన్నెల్ విషయంలో 2028 జూన్ గడువును ప్రభుత్వం అందుకోగలదా? మేడిగడ్డ, అన్నారం, సుందిళ్ల బ్యారేజీల పునరుద్ధరణ ఎంతవరకు సురక్షితంగా, సాంకేతికంగా పూర్తవుతుంది? ఇదే ఇప్పుడు కీలకంగా మారింది.

3) కుషాయిగూడలో హిట్‌ అండ్‌ రన్‌.. కార్మికులపైకి దూసుకొచ్చిన కారు

అర్ధరాత్రి.. పని ముగించుకుని ఇంటికి వెళ్తున్న కార్మికులపైకి వెనుక నుంచి దూసుకొచ్చిన కారు! హైదరాబాద్‌ కుషాయిగూడలో జరిగిన ఈ హిట్‌ అండ్‌ రన్‌ ఘటన కలకలం రేపుతోంది. ఈసీఐఎల్‌లోని న్యూ చైతన్య కాలేజ్‌ సమీపంలో, దేవి మొబైల్‌ షాప్‌ ఎదురుగా ఈ ప్రమాదం జరిగింది. తెల్లవారుజామున సుమారు 12:30 గంటలకు ఘటన జరిగినట్లు పోలీసులు తెలిపారు.

బిహార్‌కు చెందిన కొందరు కార్మికులు.. పని ముగించుకుని రోడ్డుపై నడుచుకుంటూ ఇంటికి వెళ్తున్నారు. అదే సమయంలో వెనుక నుంచి వేగంగా వచ్చిన ఓ కారు వారిని ఢీకొట్టింది.ప్రమాదంలో ఏడుగురు గాయపడగా.. ముగ్గురికి తీవ్ర గాయాలయ్యాయి. గాయపడిన వారిని తొలుత ఈసీఐఎల్‌లోని ఆస్పత్రులకు తరలించి చికిత్స అందించారు.

ప్రమాదం తర్వాత కారు ఆపకుండా డ్రైవర్ అక్కడి నుంచి వెళ్లిపోయాడు. దీంతో పోలీసులు సీసీటీవీ ఫుటేజీ ఆధారంగా దర్యాప్తు ప్రారంభించారు.కారు హ్యుందాయ్ వెర్నాగా, నంబర్ AP 10 AU 1232గా గుర్తించారు. సీసీటీవీ, ఇతర ఆధారాలతో డ్రైవర్‌ను గుర్తించిన పోలీసులు.. 36 ఏళ్ల సాఫ్ట్‌వేర్‌ ఇంజినీర్‌ పవన్‌ కుమార్‌ను అరెస్ట్‌ చేశారు. కారులో ఉన్న మరో వ్యక్తిని కూడా పోలీసులు అదుపులోకి తీసుకున్నారు.

అయితే ఈ కేసులో మరో కీలక అంశం.. డ్రైవర్‌ మద్యం సేవించి ఉన్నాడా? పోలీసులకు డ్రంక్‌ డ్రైవింగ్‌పై అనుమానం ఉంది. పవన్‌ కుమార్‌ రక్త నమూనాలను ఎఫ్‌ఎస్‌ఎల్‌ పరీక్షలకు పంపారు. కాబట్టి మద్యం సేవించి డ్రైవ్‌ చేశాడని ఇప్పుడే నిర్ధారించలేం. ఎఫ్‌ఎస్‌ఎల్‌ నివేదిక తర్వాతే దీనిపై స్పష్టత రానుంది.

ఇక గాయపడిన వారిలో అజయ్‌ కుమార్‌, బిపిన్‌ కుమార్‌ యాదవ్‌, రాజేశ్‌ యాదవ్‌ తీవ్రంగా గాయపడిన వారిగా పోలీసులు గుర్తించారు.మొత్తంగా.. పని ముగించుకుని ఇంటికి వెళ్తున్న కార్మికులను వెనుక నుంచి కారు ఢీకొట్టడం.. డ్రైవర్‌ ఆపకుండా వెళ్లిపోవడం.. సీసీటీవీ ఆధారంగా అతడిని పోలీసులు గుర్తించి అరెస్ట్‌ చేయడం ఈ కేసులో కీలక పరిణామాలు.ఇప్పుడు అసలు ప్రశ్న.. ప్రమాదానికి కచ్చితమైన కారణమేంటి? డ్రైవర్‌ నిజంగానే మద్యం సేవించి ఉన్నాడా?ఈ ప్రశ్నలకు ఎఫ్‌ఎస్‌ఎల్‌ నివేదిక, పోలీసుల దర్యాప్తు సమాధానం చెప్పాల్సి ఉంది.