సనత్‌నగర్ బాలుడు వహీద్ హత్య కేసులో నిందితుడికి ఉరిశిక్ష

హైదరాబాద్ సనత్‌నగర్‌లో 2023లో జరిగిన బాలుడి హత్య కేసులో మూడు సంవత్సరాలకు న్యాయం జరిగింది. నిందితుడికి కోర్టు ఉరిశిక్ష విధించింది. సంచలనం రేపిన సనత్‌నగర్ 8 ఏళ్ల బాలుడు అబ్దుల్ వహీద్ ఖాన్ హత్య కేసులో మేడ్చల్–మల్కాజ్గిరి 3వ అదనపు కోర్టు 12 మే 2026న తీర్పు వెలువరించింది. ప్రధాన నిందితుడు ఇమ్రాన్ అలీ ఖాన్ అలియాజ్ ఫిజాకు ఉరిశిక్ష విధిస్తూ జస్టిస్ ఎం వెంకటేశ్వరరావు, జస్టిస్ జీవీ రామకృష్ణ రావు బెంచ్ తీర్పిచ్చింది. అదే విధంగా బాలుడి మృతదేహాన్ని తరలించడంలో సహకరించిన ఆటో డ్రైవర్ మొహమ్మద్ రఫీక్‌కు జీవిత ఖైదు ఖరారైంది.

కేసు ఎలా ప్రారంభమైంది?

సనత్‌నగర్ పరిధిలోని అల్లావుద్దీన్ కోటి ప్రాంతంలో నివసించే అబ్దుల్ వసీం ఖాన్ కుమారుడు అబ్దుల్ వహీద్ ఖాన్ నాలుగో తరగతి చదువుతున్నాడు. 2023 ఏప్రిల్ 20న రంజాన్ సమయంలో నమాజ్‌కు వెళ్లిన బాలుడు తిరిగి ఇంటికి రాలేదు. కుటుంబ సభ్యులు చుట్టుపక్కల వెతికినా ఆచూకీ లభించకపోవడంతో రాత్రి పోలీసులకు ఫిర్యాదు చేశారు. పోలీసులు సీసీటీవీ ఫుటేజ్ పరిశీలించగా, స్థానికంగా నివసించే ట్రాన్స్‌జెండర్ ఇమ్రాన్ అలీ ఖాన్ బాలుడిని ఇంట్లోకి పిలిచిన దృశ్యాలు కనిపించాయి. బాలుడు లోపలికి వెళ్లినా తిరిగి బయటకు రాలేదని అధికారులు గుర్తించారు.

హత్యకు అసలు కారణం

మొదట ఈ హత్యను నరబలి కోణంలో ప్రచారం జరిగింది. అమావాస్య రోజున ఘటన జరగడం, క్షుద్రపూజల ప్రచారం రావడంతో ప్రాంతంలో భయాందోళనలు నెలకొన్నాయి. అయితే దర్యాప్తులో ఆ ప్రచారంలో నిజం లేదని పోలీసులు స్పష్టం చేశారు. డీసీపీ టి. శ్రీనివాసరావు వెల్లడించిన వివరాల ప్రకారం, బాలుడి తండ్రి వసీం ఖాన్‌కు, ఇమ్రాన్‌కు మధ్య చిట్టీ డబ్బుల వివాదం ఉంది. వసీం కుటుంబానికి చెందిన ఆసిమ్ ఇమ్రాన్ వద్ద రూ.5 లక్షల చిట్టీ వేసినట్లు తెలిసింది. అందులో రూ.4 లక్షల చెల్లింపులో ఆలస్యం కావడంతో ఇరువురి మధ్య గొడవలు జరిగాయి. అదే కోపంతో ప్రతీకారం తీర్చుకోవాలని ఇమ్రాన్ నిర్ణయించుకున్నట్లు పోలీసులు తెలిపారు.

హత్య ఎలా జరిగిందంటే..

ఏప్రిల్ 20న సాయంత్రం ఇమ్రాన్.. బాలుడిని ఓఆర్ఎస్ ప్యాకెట్ తీసుకురమ్మని చెప్పినట్లు దర్యాప్తులో తేలింది. బాలుడు ప్యాకెట్ తీసుకువచ్చిన తర్వాత ఇంట్లోకి వెళ్లాడు. అక్కడే ఇమ్రాన్ బాలుడి గొంతు నులిమి, తర్వాత కత్తితో గొంతు కోసి హత్య చేసినట్లు పోలీసులు వెల్లడించారు. హత్య అనంతరం మృతదేహాన్ని ప్లాస్టిక్ కవర్‌లో చుట్టారు. శరీరాన్ని బకెట్‌లో పెట్టేందుకు చేతులు, కాళ్లు విరిచినట్లు దర్యాప్తులో బయటపడింది. అనంతరం ఆటో డ్రైవర్ మొహమ్మద్ రఫీక్ సహాయంతో బకెట్‌ను ఆటోలో తీసుకెళ్లి మూసాపేట–ఫతేనగర్ పరిధిలోని నాలాలో పడేసినట్లు పోలీసులు గుర్తించారు.

కేసు టైమ్‌లైన్ ఇలా...

ఏప్రిల్ 20, 2023 – గురువారం

సాయంత్రం బాలుడు నమాజ్‌కు వెళ్లాడు.

ఇమ్రాన్ బాలుడిని పిలిచి ఓఆర్ఎస్ ప్యాకెట్ తెప్పించాడు.

బాలుడు ఇంట్లోకి వెళ్లిన తర్వాత కనిపించలేదు.

కుటుంబ సభ్యులు వెతికి రాత్రి పోలీసులకు ఫిర్యాదు చేశారు.

ఏప్రిల్ 21, 2023 – శుక్రవారం

సీసీటీవీ ఫుటేజ్‌లో బాలుడు ఇమ్రాన్ ఇంట్లోకి వెళ్లిన దృశ్యాలు బయటపడ్డాయి.

ఇమ్రాన్ బకెట్‌తో ఆటోలో వెళ్తున్న దృశ్యాలు కూడా లభించాయి.

తెల్లవారుజామున 3 గంటల సమయంలో మూసాపేట నాలాలో బకెట్‌లో బాలుడి మృతదేహం దొరికింది.

పోలీసులు ఇమ్రాన్, ఆటో డ్రైవర్ రఫీక్‌ను అదుపులోకి తీసుకున్నారు.

ప్రాంతంలో ఉద్రిక్తత

బాలుడి హత్య వార్త బయటకు రావడంతో అల్లావుద్దీన్ కోటి ప్రాంతంలో ఉద్రిక్త పరిస్థితులు నెలకొన్నాయి. స్థానికులు ఇమ్రాన్ ఇంటిపై దాడికి ప్రయత్నించారు. పోలీసులు అక్కడికి చేరుకుని పరిస్థితిని అదుపులోకి తీసుకొచ్చారు. కొంతమంది స్థానికులు నరబలి జరిగిందని ఆరోపించారు. అయితే అలాంటి ఆధారాలు లభించలేదని పోలీసులు స్పష్టం చేశారు. ఆర్థిక వివాదమే హత్యకు కారణమని మరోసారి వెల్లడించారు.

మాజీ మంత్రి తలసాని పరామర్శ

ఘటన తర్వాత మాజీ మంత్రి తలసాని శ్రీనివాస్ యాదవ్ బాధిత కుటుంబాన్ని పరామర్శించారు. బాలుడి హత్య చాలా బాధాకరమని పేర్కొన్నారు. నిందితులకు కఠిన శిక్ష పడేలా చర్యలు తీసుకుంటామని హామీ ఇచ్చారు. ఫాస్ట్‌ట్రాక్ కోర్టు ద్వారా వేగంగా విచారణ జరిపేలా చూస్తామని తెలిపారు.

కోర్టు తీర్పు

కేసులో సీసీటీవీ ఫుటేజ్, కాల్ డేటా రికార్డులు, సాంకేతిక ఆధారాలను పోలీసులు కోర్టులో సమర్పించారు. విచారణ పూర్తయ్యాక ప్రధాన నిందితుడు ఇమ్రాన్ అలీ ఖాన్‌కు ఉరిశిక్ష విధించారు. నేరానికి సహకరించిన ఆటో డ్రైవర్ రఫీక్‌కు జీవిత ఖైదు ఖరారైంది. తీర్పు అనంతరం బాలుడి తండ్రి వసీం ఖాన్ స్పందించారు. తన కుమారుడికి చివరకు న్యాయం జరిగిందని తెలిపారు. కేసును ఛేదించిన పోలీసులకు, తీర్పు ఇచ్చిన న్యాయవ్యవస్థకు ఆయన కృతజ్ఞతలు తెలిపారు.