ఎర్రవల్లి భూముల సర్వేలో కొత్త ట్విస్ట్

సిద్దిపేట జిల్లా గజ్వేల్‌ నియోజకవర్గం ఎర్రవల్లిలో భూముల సర్వే మరో మలుపు తిరిగింది. కేసీఆర్‌ ఫామ్‌హౌస్‌ సమీపంలోని సర్వే నంబర్‌ 325లో 388 ఎకరాల భూమిని రెవెన్యూ అధికారులు సర్వే చేస్తున్నారు. ఈ సమయంలో శివారు వెంకటాపూర్‌ గ్రామస్థులు ఆందోళనకు దిగారు. ఈ భూముల్లో తమకూ హక్కులు ఉన్నాయని వారు చెబుతున్నారు. 388 ఎకరాల్లో ఎర్రవల్లి గ్రామస్థులకు 250 ఎకరాలు మాత్రమే ఉన్నాయని వెంకటాపూర్‌ వాసులు పేర్కొంటున్నారు. మిగిలిన భూమిలో తమకూ వాటా ఉందని చెబుతున్నారు.

కాస్రా, సిత్వార్‌ రికార్డుల ఆధారంగా సర్వే చేయాలని డిమాండ్‌ చేస్తున్నారు. గతంలో అధికారులు, సిబ్బంది చేసిన తప్పిదాల వల్లే భూ రికార్డుల్లో మార్పులు జరిగాయని వారు ఆరోపిస్తున్నారు. ప్రస్తుత సర్వేలో తమకు అన్యాయం జరగకుండా చూడాలని అధికారులను కోరుతున్నారు. మరోవైపు సర్వే నంబర్‌ 325లో వ్యవసాయం చేస్తున్న రైతులకు రెవెన్యూ అధికారులు నోటీసులు ఇస్తున్నారు. విడతల వారీగా ఈ ప్రక్రియ కొనసాగుతోంది. మొత్తం 215 మంది రైతులకు నోటీసులు ఇవ్వాలని అధికారులు నిర్ణయించారు.

ఇందులో భాగంగా ఇవాళ 50 మంది రైతులకు నోటీసులు జారీ చేశారు. ఈ నెల 21 నుంచి సర్వే నాలుగు విడతల్లో కొనసాగనుంది. 21న రైతులు తమ భూముల వద్దకు వచ్చి వివరాలు తెలియజేయాలని నోటీసుల్లో అధికారులు సూచించారు. దీంతో ఎర్రవల్లి భూముల సర్వేపై స్థానికంగా మరింత ఆసక్తి నెలకొంది. సర్వే పూర్తయిన తర్వాత భూముల హక్కులు, రికార్డులపై మరింత స్పష్టత వచ్చే అవకాశం ఉంది.