ఇథనాల్ వల్ల చక్కెర కొరత రాలేదు: కేంద్రం

"ఇటీవల చక్కెర ధరల పెరుగుదలకు, ఇథనాల్ ఉత్పత్తి కోసం చక్కెరను మళ్లించడమే కారణమని చెప్పడం సరికాదు," అని వినియోగదారుల వ్యవహారాలు, ఆహారం, ప్రజా పంపిణీ మంత్రిత్వ శాఖ ఒక ప్రకటనలో తెలిపింది.

తక్కువ దేశీయ ఉత్పత్తి, పండుగ సీజన్ డిమాండ్ నిల్వల కారణంగానే ధరలను అదుపులో ఉంచడానికి ప్రభుత్వం నిల్వలపై పరిమితులు విధించి, సుంకరహిత దిగుమతులను అనుమతించిందని ఆయన పేర్కొన్నారు.

పెట్రోల్‌లో కలపడం కోసం ఇథనాల్ తయారీకి మళ్లించే చక్కెర వాటా, వాస్తవానికి 2022-23లో సుమారు 12 శాతం ఉండగా, 2025-26 సీజన్ నాటికి అది 9 శాతానికి తగ్గిందని, అదే సమయంలో దేశ ఇథనాల్ ఉత్పత్తిలో దాదాపు ముప్పావు వంతు ఇప్పుడు ధాన్యాల నుంచి, ముఖ్యంగా మొక్కజొన్న నుంచి వస్తోందని వెల్లడించారు.

జూలై 20న కిలో రూ. 48.18గా ఉన్న చిల్లర చక్కెర ధరలు ఆగస్టు 20 నాటికి కిలో రూ. 55.70కి పెరిగిన నేపథ్యంలో ఈ వివరణ వచ్చింది. ఊహించిన దానికంటే తక్కువ చక్కెర ఉత్పత్తి, పండుగ సీజన్‌కు ముందు పెరిగిన డిమాండ్, వాతావరణ సంబంధిత పంట నష్టం, ప్రపంచవ్యాప్తంగా సరఫరాలు తగ్గడం వల్ల ధరలు పెరిగాయని ప్రభుత్వం పేర్కొంది.

ధరల పెరుగుదలను అరికట్టడానికి డిమాండ్ తగ్గ సప్లై కోసం ప్రభుత్వం దేశవ్యాప్తంగా చక్కెర డీలర్లపై నవంబర్ 30 వరకు 400 టన్నుల నిల్వల పరిమితిని విధించింది. సెప్టెంబర్ 1 నుంచి బల్క్ వినియోగదారులు కూడా 15 రోజుల వినియోగానికి మించి నిల్వలు ఉంచుకోకుండా నిషేధం విధించింది. ప్రభుత్వం 10 లక్షల టన్నుల ముడి చక్కెర సుంకరహిత దిగుమతులను కూడా ఆమోదించింది. నిల్వలు, కృత్రిమ కొరతను తనిఖీ చేయడానికి కేంద్ర, రాష్ట్ర ప్రభుత్వాల సంయుక్త బృందాలచే మిల్లులలోని నిల్వల భౌతిక తనిఖీకి ఆదేశించింది.

చెరకు పండించే రాష్ట్రాల ప్రాథమిక అంచనా సుమారు 34.3 మిలియన్ టన్నులు కాగా, ప్రస్తుత సీజన్‌లో దేశీయ చక్కెర ఉత్పత్తి సుమారు 30.6 మిలియన్ టన్నులుగా ఉంటుందని అంచనా వేస్తున్నట్లు మంత్రిత్వ శాఖ తెలిపింది.

చెరకు పంటకు సోకుతున్న రెడ్ రాట్, టాప్ బోరర్ వ్యాధులు, అలాగే అధిక వర్షాల వల్ల ఏర్పడిన నీటి నిల్వలే ఈ కొరతకు కారణమని పేర్కొంది. అక్టోబర్‌లో కొత్త క్రషింగ్ సీజన్ ప్రారంభమయ్యే వరకు దేశీయ డిమాండ్‌ను తీర్చడానికి ప్రస్తుత నిల్వలు సరిపోతాయని ఆ ప్రకటనలో తెలిపింది.

ప్రపంచ మార్కెట్ కూడా సరఫరా కొరతను ఎదుర్కొంటోంది. 2026-27లో సుమారు 3.3 మిలియన్ టన్నుల చక్కెర కొరత ఉంటుందని ప్రభుత్వం అంచనా వేస్తుండగా, అంతర్జాతీయ చక్కెర ధరలు జూన్ 30న టన్నుకు 474 డాలర్ల నుంచి ఆగస్టు 20 నాటికి టన్నుకు 552 డాలర్లకు, అంటే 16 శాతానికి పైగా పెరిగాయి.

ఇథనాల్ కార్యక్రమం చక్కెర పరిశ్రమలోని నిర్మాణాత్మక మిగులును పరిష్కరించడంలో, మిల్లుల ఆర్థిక స్థితిని బలోపేతం చేయడంలో రైతులకు చెల్లింపులను మెరుగుపరచడంలో సాయపడిందని ప్రభుత్వం తెలిపింది.

భారత్ సాధారణంగా ఏటా 32-34 మిలియన్ టన్నుల చక్కెరను ఉత్పత్తి చేస్తుండగా, దేశీయ వినియోగం సుమారు 28-29 మిలియన్ టన్నులుగా ఉంది. మిగులు సంవత్సరాల్లో, అదనపు నిల్వలు మిల్లుల వద్ద నిర్వహణ మూలధనాన్ని స్తంభింపజేసి, చెరకు రైతులకు చెల్లింపులలో జాప్యానికి దోహదపడతాయి.

ఆగస్టు 20 నాటికి, 2025-26 సీజన్‌కు సంబంధించిన చెరకు బకాయిలలో 97 శాతం చెల్లించినట్లు ప్రభుత్వం తెలిపింది. పరిశ్రమ ఆర్థిక పరిస్థితి మెరుగుపడటంతో ప్రభుత్వ మద్దతుపై ఆధారపడటం తగ్గిందని, 2014 నుంచి 2021 మధ్య సుమారు రూ. 14,600 కోట్ల సబ్సిడీలు అందించినట్లు పేర్కొంది.

అయితే 2021-22 నుంచి అటువంటి సబ్సిడీ ఏదీ ప్రకటించబడలేదని కూడా అది పేర్కొంది. అక్టోబర్ 15 నుంచే క్రషింగ్ ప్రారంభించాలని ప్రభుత్వం రాష్ట్రాలకు, మిల్లులకు సూచించింది. దీనివల్ల అక్టోబర్ చక్కెర ఉత్పత్తి సాధారణ 300,000-400,000 టన్నులతో పోలిస్తే 1 మిలియన్ టన్నులకు పైగా పెరుగుతుందని.. ఇది పండుగ సీజన్‌లో సరఫరాలను బలోపేతం చేయడానికి సాయపడుతుందని అంచనా.