ఇద్దరు పిల్లలను హత్య చేసిన తండ్రి ఆత్మహత్య

మహబూబాబాద్ జిల్లా తొర్రూరు పట్టణ శివారులో గుండెలవిసే విషాదం జరిగింది. కన్నతండ్రే కాలయముడుగా మారి తన ఇద్దరు పసిబిడ్డలను పొట్టనబెట్టుకున్నాడు. ఆపై తాను కూడా ప్రాణాలు తీసుకున్న ఈ ఘటన మంగళవారం నాడు వెలుగులోకి రావడంతో స్థానికంగా తీవ్ర కలకలం రేపింది. ప్రస్తుతం పోలీసులు ఈ కేసును విచారిస్తున్నారు. గ్రామస్తుల సమాచారం ప్రకారం.. వలి అనే వ్యక్తికి తన భార్యతో గత కొంతకాలంగా గొడవలు జరుగుతున్నాయి. ఈ కుటుంబ కలహాల నేపథ్యంలో తీవ్ర మనస్తాపానికి గురైన వలి దారుణ నిర్ణయం తీసుకున్నాడు. తన ఇద్దరు కుమారులు విలాస్‌ (5), వికేష్‌ (3)లను తీసుకొని పట్టణ శివారులోని పొలంలోకి వెళ్లాడు.

అక్కడ తన ఇద్దరు బిడ్డలకు ఉరివేసి నికృష్టంగా హత్య చేశాడు. కళ్ల ముందే పిల్లలు ప్రాణాలు వదులుతున్నా కనికరించని ఆ తండ్రి.. వారు మరణించాక అదే చోట తాను కూడా ఉరివేసుకుని ఆత్మహత్య చేసుకున్నాడు. మంగళవారం ఉదయం మృతదేహాలను గమనించిన స్థానికులు వెంటనే పోలీసులకు సమాచారం అందించారు. విషయం తెలిసిన వెంటనే పోలీసులు సంఘటనా స్థలానికి చేరుకున్నారు. మూడు మృతదేహాలను స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. భార్యాభర్తల మధ్య తరచూ జరుగుతున్న గొడవలే ఈ దారుణానికి అసలు కారణమని పోలీసులు ప్రాథమికంగా నిర్ధారించారు. కంటికి రెప్పలా కాపాడాల్సిన తండ్రే ఇలా చేయడంతో గ్రామంలో విషాద ఛాయలు అలుముకున్నాయి. కుటుంబ కలహాలు మూడు నిండు ప్రాణాలను బలితీసుకోవడంపై పోలీసులు కేసు నమోదు చేసి లోతుగా దర్యాప్తు చేస్తున్నారు.