గోదావరి పుష్కరాలకు భారీ ఏర్పాట్లు.. రూ.1000 కోట్ల పనులు

గోదావరి పుష్కరాలకు తెలంగాణ ప్రభుత్వం భారీ ఏర్పాట్లు చేస్తోంది. 2027 జూన్ 26 నుంచి జూలై 7 వరకు పుష్కరాలు జరగనున్నాయి. భక్తులకు ఆధ్యాత్మిక అనుభూతితో పాటు ఎలాంటి ఇబ్బందులు లేకుండా అన్ని సౌకర్యాలు కల్పించాలని కేబినెట్ సబ్ కమిటీ నిర్ణయించింది. పుష్కరాల ఏర్పాట్ల కోసం వివిధ శాఖల పరిధిలో దాదాపు రూ.1000 కోట్లతో పనులు జరుగుతున్నాయి. గోదావరి పుష్కరాల ఏర్పాట్లపై కేబినెట్ సబ్ కమిటీ చైర్మన్, మంత్రి డి. శ్రీధర్‌బాబు అధ్యక్షతన కీలక సమావేశం జరిగింది. మంత్రులు కొండా సురేఖ, పొంగులేటి శ్రీనివాస్ రెడ్డి, తుమ్మల నాగేశ్వర్ రావు, పొన్నం ప్రభాకర్, వివేక్ వెంకట స్వామి, అడ్లూరి లక్ష్మణ్ కుమార్, సీతక్క, ప్రభుత్వ సలహాదారు సుదర్శన్ రెడ్డి, వివిధ శాఖల ఉన్నతాధికారులు ఇందులో పాల్గొన్నారు.

పుష్కరాల కోసం చేపట్టాల్సిన పనులు, భక్తులకు కల్పించాల్సిన సదుపాయాలు, శాఖల మధ్య సమన్వయంపై సమావేశంలో చర్చించారు. దేవాదాయ, ఆర్‌అండ్‌బీ, నీటిపారుదల, పోలీస్, టూరిజం, టీజీఎన్‌పీడీసీఎల్, వైద్యారోగ్యం, పంచాయతీరాజ్ ఇంజనీరింగ్, గ్రామీణ నీటిపారుదల శాఖల పనుల పురోగతిని మంత్రులు అడిగి తెలుసుకున్నారు. గోదావరి తీరం వెంట ఉన్న నిజామాబాద్, నిర్మల్, మంచిర్యాల్, జగిత్యాల, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం జిల్లాల్లో మొత్తం 67 కేంద్రాలను పుష్కర ఘాట్లుగా అభివృద్ధి చేయనున్నారు. వీటిని మూడు అంచెల్లో అభివృద్ధి చేయనున్నట్లు కేబినెట్ సబ్ కమిటీ కన్వీనర్, దేవాదాయ శాఖ ముఖ్యకార్యదర్శి శైలజా రామయ్యర్ వివరించారు.

ఘాట్ల అభివృద్ధి, పారిశుద్ధ్యం, తాగునీరు, రహదారులు, రవాణా, విద్యుత్, వైద్యం, భద్రతపై ప్రత్యేక దృష్టి పెట్టాలని సమావేశంలో నిర్ణయించారు. పుష్కరాలు ప్రారంభమయ్యేలోపు అన్ని పనులను నాణ్యతతో పూర్తి చేయాలని అధికారులు ఆదేశించారు. పనుల పురోగతిని అధికారులు ఎప్పటికప్పుడు సమీక్షించాలని శ్రీధర్‌బాబు సూచించారు. అవసరమైతే వర్చువల్ సమావేశాల ద్వారా కూడా సమీక్షించాలని చెప్పారు. ముఖ్యమంత్రి రేవంత్ రెడ్డి పుష్కరాలను ప్రతిష్టాత్మక కార్యక్రమంగా భావిస్తున్నందున ఎలాంటి లోటుపాట్లు ఉండకూడదని అధికారులకు స్పష్టం చేశారు.

పుష్కరాల పనులను ముఖ్యమంత్రి ఎప్పటికప్పుడు పరిశీలించేలా ప్రత్యేక డ్యాష్‌బోర్డు రూపొందించాలని శ్రీధర్‌బాబు ఆదేశించారు. ఇందులో శాఖల వారీగా చేపట్టిన పనులు, వాటి పురోగతి వివరాలు అందుబాటులో ఉండాలని సూచించారు. పుష్కరాల కోసం ప్రత్యేక నిధులు కావాలని పలువురు ప్రజాప్రతినిధులు కోరుతున్నందున ఈ అంశాన్ని ముఖ్యమంత్రితో చర్చిస్తామని తెలిపారు. తెలంగాణలో గోదావరి తీరం సుదీర్ఘంగా ఉన్నందున అన్ని శాఖలు సమన్వయంతో పనిచేయాలని సూచించారు.

దేవాదాయ శాఖ మంత్రి కొండా సురేఖ పుష్కర ప్రాంతాల్లో ప్రత్యేక అలంకరణలు, స్వాగత ద్వారాలు ఏర్పాటు చేయాలని సూచించారు. ఆయా క్షేత్రాల చారిత్రక, ఆధ్యాత్మిక విశిష్టతను భక్తులకు తెలియజేసేలా సమాచార బోర్డులు, దృశ్యరూప ప్రదర్శనలు ఏర్పాటు చేయాలని చెప్పారు. పంచాయతీరాజ్, ఆర్‌అండ్‌బీ, విద్యుత్ శాఖలు ఒకే పనిని మళ్లీ చేయకుండా సమన్వయంతో ముందుకు వెళ్లాలని సూచించారు. భక్తులకు ఆరోగ్య సమస్యలు వస్తే వెంటనే చికిత్స అందేలా వైద్యారోగ్య శాఖ ఏర్పాట్లు చేయాలని సురేఖ సూచించారు.

అవసరమైతే ముందుకు వచ్చే ప్రైవేట్ ఆసుపత్రుల సహకారం కూడా తీసుకోవాలని చెప్పారు. పుష్కరాల్లో భక్తులు పితృదేవతలకు తర్పణాలు, పిండప్రదానాలు చేయడంతో పాటు కొబ్బరికాయలు కొడతారు. ఈ సందర్భంగా ప్లాస్టిక్ కవర్లు, ఇతర ప్లాస్టిక్ వస్తువులు గోదావరి నీటిలో కలవకుండా అవగాహన కల్పించాలని సురేఖ సూచించారు. ప్రత్యామ్నాయ పద్ధతులను ప్రోత్సహించాలని, నీటిలో కలిసిన ప్లాస్టిక్‌ను ఎప్పటికప్పుడు తొలగించాలని ఆదేశించారు.

లక్షలాది మంది భక్తులు వచ్చే అవకాశం ఉన్నందున ట్రాఫిక్ నిర్వహణపై కూడా దృష్టి పెట్టనున్నారు. ట్రాఫిక్ పోలీసులు సమర్థంగా విధులు నిర్వహించాలని మంత్రి అడ్లూరి లక్ష్మణ్ కుమార్ సూచించారు. వీఐపీ, వీవీఐపీల కోసం ప్రత్యేక బారికేడ్లు, స్నాన ఘాట్లు ఏర్పాటు చేయాలని చెప్పారు. గతంలో ఆంధ్రప్రదేశ్‌లో జరిగిన తోపులాట ఘటనలను దృష్టిలో పెట్టుకుని ఏర్పాట్లు చేస్తున్నట్లు పోలీస్ అధికారులు తెలిపారు.

పుష్కరాల ప్రచారాన్ని ముందుగానే ప్రారంభించాలని మంత్రి పొంగులేటి శ్రీనివాస్ రెడ్డి ఐ అండ్ పీఆర్ స్పెషల్ కమిషనర్ ముకుంద రెడ్డికి సూచించారు. భద్రాచలం, ధర్మపురి వంటి ప్రముఖ ఆధ్యాత్మిక ప్రాంతాల్లో పుష్కర ఏర్పాట్లు ముందుగానే పూర్తి చేయాలని మంత్రి తుమ్మల నాగేశ్వర్ రావు ఆదేశించారు. భక్తుల రద్దీని దృష్టిలో పెట్టుకుని తాత్కాలిక బస్ షెల్టర్లు, ప్రయాణికుల వెయిటింగ్ సదుపాయాలు, పార్కింగ్ ఏర్పాట్లు చేయాలని సూచించారు.

శాశ్వత ఆర్టీసీ బస్ స్టేషన్లు లేని ప్రాంతాల్లో తాత్కాలిక బస్ స్టేషన్లు ఏర్పాటు చేయాలని మంత్రి పొన్నం ప్రభాకర్ ఆర్టీసీ అధికారులకు సూచించారు. ప్రయాణికుల హోల్డింగ్ ఏరియాలు, పార్కింగ్ సదుపాయాలు కూడా ఏర్పాటు చేయాలని చెప్పారు. బస్ స్టేషన్లను గోదావరి పుష్కరాల ప్రత్యేకత కనిపించేలా సుందరంగా తీర్చిదిద్దాలని సూచించారు. భక్తులకు రహదారులు, తాగునీరు, పారిశుద్ధ్యం, మరుగుదొడ్లు వంటి సదుపాయాలు ముందుగానే అందుబాటులోకి రావాలని మంత్రి సీతక్క సూచించారు. ఘాట్లు, గ్రామాల పరిసరాల్లో పరిశుభ్రతను నిరంతరం పర్యవేక్షించాలని చెప్పారు.

పుష్కరాలు ముగిసే వరకు పారిశుద్ధ్య నిర్వహణకు ప్రత్యేక ప్రణాళిక అమలు చేయాలని సీతక్క ఆదేశించారు. ఘాట్ల వద్ద రద్దీకి అనుగుణంగా ఏర్పాట్లు చేయాలని, అత్యవసర పరిస్థితుల్లో వెంటనే స్పందించేలా సిబ్బంది, వనరులను సిద్ధంగా ఉంచాలని సూచించారు. అన్ని పనుల్లో నాణ్యతకు ప్రాధాన్యం ఇవ్వాలని, నిర్ణయించిన గడువులోగా పనులు పూర్తి చేయాలని అధికారులను ఆదేశించారు. మొత్తంగా, 2027 గోదావరి పుష్కరాల కోసం ఘాట్ల నుంచి రవాణా వరకు, పారిశుద్ధ్యం నుంచి వైద్యం వరకు అన్ని విభాగాల్లో ఏర్పాట్లు కొనసాగుతున్నాయి. పుష్కరాలు ప్రారంభమయ్యే నాటికి అన్ని పనులు పూర్తి చేసి భక్తులకు అవసరమైన సౌకర్యాలు అందుబాటులోకి తీసుకురావడమే లక్ష్యంగా ప్రభుత్వం చర్యలు చేపడుతోంది.