హైదరాబాద్ ఆర్ఆర్ఆర్‌కు గ్రీన్ సిగ్నల్, పనులు స్టార్ట్

హైదరాబాద్ రీజినల్ రింగ్ రోడ్(RRR) ఉత్తర భాగానికి ఎట్టకేలకు గ్రీన్ సిగ్నల్ వచ్చింది. దాదాపు ఏడాది పాటు నిలిచిపోయిన ఈ ప్రాజెక్ట్‌కు కేంద్రం భారీ బడ్జెట్ ఆమోదం ఇవ్వడంతో పనులు ప్రారంభానికి సిద్ధమైంది. కేంద్ర ఆర్థిక మంత్రిత్వ శాఖకు చెందిన కమిటీ ₹23,995.60 కోట్లను ఆమోదించింది. దీంతో పెండింగ్‌లో ఉన్న టెండర్లు తెరవడానికి అధికారులు సిద్ధమయ్యారు. ఇప్పటికే భూసేకరణ పూర్తయినా, అనుమతుల ఆలస్యంతో ప్రాజెక్ట్ ఆగిపోయింది. ఇప్పుడు ఆ అడ్డంకి తొలగింది. మొదట ఈ ప్రాజెక్ట్ ఖర్చు ₹15,000 కోట్లుగా అంచనా వేశారు. తాజా సవరణతో దాదాపు ₹9,000 కోట్లు పెరిగింది. మూడు సంవత్సరాల్లో పనులు పూర్తికాకపోతే ఖర్చు ఇంకా పెరిగే అవకాశం ఉందని అధికారులు భావిస్తున్నారు.

ఈ రహదారి మొత్తం 161.518 కిలోమీటర్ల పొడవుగా ఉంటుంది. తొమ్మిది చోట్ల జాతీయ, రాష్ట్ర రహదారులతో కలుస్తుంది. ప్రతి జంక్షన్ వద్ద 100 నుంచి 120 ఎకరాల్లో పెద్ద ఇంటర్‌చేంజ్‌లు నిర్మించనున్నారు. ప్రాజెక్ట్‌ను రెండు భాగాలుగా విభజించారు. సంగారెడ్డి జిల్లా గిర్మాపూర్ నుంచి సిద్ధిపేట జిల్లా ప్రగ్నాపూర్ వరకు ఒక భాగం, అక్కడి నుంచి యాదాద్రి-భువనగిరి జిల్లా తంగెడ్‌పల్లి వరకు మరో భాగం ఉంటుంది. మొదట ఎనిమిది లేన్లుగా భావించిన రోడ్డును ఇప్పుడు ఆరు లేన్లకు తగ్గించారు. రోడ్డు వెడల్పు కూడా 100 మీటర్ల నుంచి 90 మీటర్లకు తగ్గించారు. మిగిలిన భూమిని రాష్ట్ర ప్రభుత్వానికి అప్పగించనున్నారు.

ఈ ప్రాజెక్ట్‌ను హైబ్రిడ్ అన్యుటీ మోడల్‌లో నిర్మించనున్నారు. మొత్తం ఖర్చులో 40 శాతం కేంద్రం భరిస్తుంది. మిగిలిన 60 శాతం కాంట్రాక్టర్ సమకూర్చాలి. 15 ఏళ్ల ఒప్పందంలో ఎన్‌హెచ్ఏఐ కాంట్రాక్టర్‌కు వడ్డీతో చెల్లింపులు చేస్తుంది. ఈ కాలంలో రహదారి నిర్వహణ బాధ్యత కూడా కాంట్రాక్టర్‌దే. ఈ ప్రాజెక్ట్‌లో 44 ప్రధాన వంతెనలు, 127 చిన్న వంతెనలు, 1,262 బాక్స్ కల్వర్ట్లు, 4 రోడ్ ఓవర్ బ్రిడ్జ్‌లు, 44 అండర్‌పాస్‌లు, ఒక వాహన ఓవర్‌పాస్ నిర్మించనున్నారు.

ఖర్చులో సివిల్ పనులకు ₹8,106.19 కోట్లు, యుటిలిటీ మార్పులకు ₹5,357.59 కోట్లు, భూసేకరణకు ₹5,349.26 కోట్లు కేటాయించారు. ఇక దక్షిణ భాగానికి సంబంధించిన మార్గం ఇంకా ఖరారు కాలేదు. రాష్ట్రం ప్రతిపాదించిన 208 కిలోమీటర్ల మార్గాన్ని ఎన్‌హెచ్ఏఐ పరిశీలిస్తోంది. పూర్తి వివరాలు త్వరలో వెలువడే నివేదికలో స్పష్టమయ్యే అవకాశం ఉంది.