తెలంగాణకు రూ.12 లక్షల కోట్లు.. కాంగ్రెస్‌పై కిషన్ రెడ్డి ఫైర్

తెలంగాణ అభివృద్ధిపై రాజకీయ వేడి మరింత పెరిగింది. హైదరాబాద్ పరేడ్ గ్రౌండ్స్‌లో జరిగిన బీజేపీ బహిరంగ సభలో కేంద్ర మంత్రి, రాష్ట్ర బీజేపీ అధ్యక్షుడు కిషన్ రెడ్డి కాంగ్రెస్ ప్రభుత్వంపై తీవ్రస్థాయిలో విమర్శలు చేశారు. ఎన్నికల ముందు ఇచ్చిన 6 గ్యారంటీల పరిస్థితి ఏమైందో ప్రజలకు సమాధానం చెప్పాలని ఆయన డిమాండ్ చేశారు. అబద్ధపు హామీలతో ప్రజలను మోసం చేస్తున్నారని రాష్ట్ర ప్రభుత్వంపై మండిపడ్డారు.

తెలంగాణ అభివృద్ధిలో కేంద్రంలోని మోదీ ప్రభుత్వ పాత్ర ఎంతో కీలకమని కిషన్ రెడ్డి చెప్పారు. గత 11 ఏళ్లలో రాష్ట్రానికి కేంద్రం రూ.12 లక్షల కోట్ల నిధులు కేటాయించిందని తెలిపారు. జాతీయ రహదారుల అభివృద్ధికి రూ.1.85 లక్షల కోట్లు ఇచ్చినట్లు వెల్లడించారు. రాష్ట్రానికి 5 వందేభారత్ రైళ్లు అందించామని, 42 రైల్వే స్టేషన్ల అభివృద్ధి పనులు జరుగుతున్నాయని చెప్పారు. అలాగే తెలంగాణకు 3 బుల్లెట్ ట్రైన్లు కూడా కేటాయించినట్లు పేర్కొన్నారు.

సన్న బియ్యం పథకానికి అవసరమైన నిధుల్లో 80 శాతం కేంద్ర ప్రభుత్వమే ఇస్తోందని వివరించారు. ఈ సందర్భంగా కాంగ్రెస్ నాయకత్వంపై కూడా ఆయన విమర్శలు చేశారు. తెలంగాణ పదేళ్లు ఒక కుటుంబం చేతిలో ఉండగా, ఇప్పుడు గాంధీ కుటుంబం ప్రభావంలో పడిందని వ్యాఖ్యానించారు. అబద్ధపు గ్యారంటీలతో ప్రజలను మభ్యపెట్టడం కాంగ్రెస్‌కు అలవాటైందని అన్నారు. బీజేపీ మాత్రం ఇచ్చిన మాట నిలబెట్టుకుంటుందని, అందుకే కేంద్రంలో వరుసగా మూడుసార్లు అధికారంలోకి వచ్చిందని చెప్పారు.

ముఖ్యమంత్రి రేవంత్ రెడ్డి వ్యవహారశైలిపై కూడా కిషన్ రెడ్డి అభ్యంతరం వ్యక్తం చేశారు. ఓట్ల కోసం కాంగ్రెస్ మత రాజకీయాలు చేస్తోందని ఆరోపించారు. ‘SIR’ పేరుతో ప్రజల్లో భయాందోళనలు సృష్టిస్తున్నారని విమర్శించారు. దేశంలోని 21 రాష్ట్రాల్లో బీజేపీ కూటమి అధికారంలో ఉండటం తమ పనితీరుకు నిదర్శనమని కిషన్ రెడ్డి అన్నారు. గత ఎన్నికల్లో తెలంగాణలో 8 ఎంపీ స్థానాలు గెలిచామని, ఈసారి మరింత బలంగా ముందుకెళ్తామని ధీమా వ్యక్తం చేశారు. తెలంగాణ అభివృద్ధి, భవిష్యత్తు కోసం మోదీ గ్యారంటీ అవసరమని మరోసారి పేర్కొన్నారు.