రేవంత్ అమెరికా టూర్పై కిషన్రెడ్డి కీలక ప్రశ్నలు
రేవంత్ అమెరికా పర్యటనపై కిషన్రెడ్డి తీవ్రంగా స్పందించారు. అనుమతి లేకుండా టూర్కు ఎందుకు వెళ్లారో సీఎం క్లారిటీ ఇవ్వాలని డిమాండ్ చేశారు.
అమెరికా పర్యటన విషయంలో సీఎం రేవంత్రెడ్డి తీరుపై కేంద్ర మంత్రి కిషన్రెడ్డి తీవ్రంగా మండిపడ్డారు. కేంద్రం అనుమతి లేకుండానే అమెరికా టూర్కు ఎలా సిద్ధమయ్యారని ప్రశ్నించారు. సీఎం స్థాయిలో ఉన్న వ్యక్తి బాధ్యతగా వ్యవహరించాలని సూచించారు. అమెరికా పర్యటనకు కేంద్రం అనుమతి ఇవ్వకపోవడంపై రేవంత్రెడ్డి చేసిన వ్యాఖ్యలను కిషన్రెడ్డి ఖండించారు. రాజకీయ కారణాలతోనే పర్యటనను అడ్డుకున్నారన్న ఆరోపణలు అర్థరహితమని అన్నారు.
విదేశీ పర్యటనలకు సంబంధించిన నిబంధనలు కొత్తగా తీసుకురాలేదని కిషన్రెడ్డి స్పష్టం చేశారు. స్వాతంత్య్రం వచ్చినప్పటి నుంచి ఉన్న విధానాలనే కేంద్రం పాటిస్తోందన్నారు. ముఖ్యమంత్రులు విదేశాలకు వెళ్లినప్పుడు ఎవరిని కలుస్తారు? ఆ భేటీల వల్ల దేశానికి ఏం ప్రయోజనం ఉంటుంది? అనే అంశాలను విదేశాంగ శాఖ పరిశీలిస్తుందని తెలిపారు. దేశ విదేశాంగ విధానం, జాతీయ ప్రయోజనాలను బట్టి అనుమతులు ఉంటాయని చెప్పారు.
గతంలో నరేంద్ర మోదీ గుజరాత్ సీఎంగా ఉన్న సమయంలో అమెరికా పర్యటనకు అప్పటి కాంగ్రెస్ ప్రభుత్వం అనుమతి ఇవ్వలేదని కిషన్రెడ్డి గుర్తు చేశారు. కాంగ్రెస్ పాలనలో కొంతమంది ముఖ్యమంత్రుల విదేశీ పర్యటనలకు కూడా అనుమతి నిరాకరించిన సందర్భాలు ఉన్నాయని తెలిపారు. అయితే రేవంత్రెడ్డికి హార్వర్డ్ బిజినెస్ కోర్సు కోసం కేంద్రం అనుమతి ఇచ్చిందని కిషన్రెడ్డి పేర్కొన్నారు. దీంతో కేంద్రం రేవంత్ విషయంలో పక్షపాతంగా వ్యవహరిస్తోందన్న వాదనకు ఆధారం లేదని అన్నారు.
అమెరికా పర్యటనకు వెళ్లకుండా కూడా తెలంగాణకు పెట్టుబడులు తీసుకురావచ్చని కిషన్రెడ్డి చెప్పారు. అవసరమైతే అధికారులను పంపించి పెట్టుబడులు, ఒప్పందాలపై చర్చలు జరపవచ్చని తెలిపారు. ఇదే సమయంలో న్యూయార్క్ మేయర్ జోహ్రాన్ మామ్దానీతో రేవంత్రెడ్డి భేటీ కావాలనుకున్నారన్న వార్తలపై కూడా కిషన్రెడ్డి ప్రశ్నలు లేవనెత్తారు. భారతదేశానికి వ్యతిరేకంగా మామ్దానీ గతంలో వ్యాఖ్యలు చేశారని ఆరోపించారు. ప్రధాని మోదీపై కూడా ఆయన తీవ్ర వ్యాఖ్యలు చేశారని గుర్తు చేశారు.
అలాంటి వ్యక్తిని సీఎం ఎందుకు కలవాలనుకున్నారో రేవంత్రెడ్డి వివరించాలని కిషన్రెడ్డి డిమాండ్ చేశారు. అమెరికా పర్యటన ఉద్దేశం, షెడ్యూల్పై సీఎం స్పష్టత ఇవ్వాలని కోరారు. ఇక తెలంగాణలో కులగణన అంశాన్ని కూడా కిషన్రెడ్డి ప్రస్తావించారు. హైదరాబాద్లో 20 శాతం ఇళ్లలో కులగణన జరగలేదని ఆరోపించారు. ఈ విషయంలో తెలంగాణ ప్రభుత్వం విఫలమైందని విమర్శించారు. మొత్తంగా అమెరికా పర్యటనపై కేంద్రం తీసుకున్న నిర్ణయం నిబంధనల ప్రకారమే జరిగిందని కిషన్రెడ్డి స్పష్టం చేశారు. ఈ అంశంపై సీఎం రేవంత్రెడ్డి మరింత స్పష్టత ఇవ్వాలని ఆయన కోరారు.
