కాంగ్రెస్కు మళ్ళీ ఛాన్స్ లేదు: కేటీఆర్
రాష్ట్ర రాజకీయాలపై కేటీఆర్ కీలక వ్యాఖ్యలు చేశారు. బీజేపీ నిర్ణయాలు, గ్యాస్ ధరల పెంపు, పార్టీ బలోపేతంపై దిశానిర్దేశం ఇచ్చారు.
తెలంగాణలో కాంగ్రెస్ ప్రభుత్వం మళ్ళీ రాదంటూ మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ ఘాటు వ్యాఖ్యలు చేశారు. రెండున్నరేళ్ల పాలనలో కాంగ్రెస్ ఇచ్చిన హామీలు అమలు కాలేదని, ప్రజలు నిరాశకు గురయ్యారని ఆయన పేర్కొన్నారు. కాంగ్రెస్ పాలనలో అవినీతి పెరిగిపోయిందని కేటీఆర్ ఆరోపించారు. ప్రతి అంశంలో కమీషన్ల కోసమే చూస్తున్నారని విమర్శించారు. భూములు, మైనింగ్ వ్యవహారాల్లో కూడా అవకతవకలు జరుగుతున్నాయని చెప్పారు. ఈ పరిస్థితులను చూసి ప్రజలు ఆగ్రహంగా ఉన్నారని తెలిపారు. ఉమ్మడి రంగారెడ్డి జిల్లా నేతలతో నంది నగర్లో జరిగిన సమావేశంలో కేటీఆర్ ఈ వ్యాఖ్యలు చేశారు.
ఇక కేంద్రంలోని బీజేపీపై కూడా కేటీఆర్ విమర్శలు చేశారు. ప్రజలకు భారం పెంచే నిర్ణయాలు తీసుకుంటున్నారని అన్నారు. గ్యాస్ సిలిండర్ ధర ఒక్కసారిగా పెరగడం దీనికి ఉదాహరణగా పేర్కొన్నారు. గ్యాస్, పెట్రోల్, డీజిల్ ధరల పెంపుతో నిత్యావసరాల ఖర్చు పెరిగిందని ఆయన ఆవేదన వ్యక్తం చేశారు. ఈ నిర్ణయాలపై పార్టీ నాయకులు ఎక్కడికక్కడ నిరసనలు చేపట్టాలని సూచించారు. పెంచిన ధరలను వెంటనే వెనక్కి తీసుకోవాలని కేంద్రాన్ని కోరారు.
పార్టీ బలోపేతంపై కూడా కేటీఆర్ దృష్టి సారించారు. సభ్యత్వ నమోదు కార్యక్రమాన్ని త్వరలో ప్రారంభించాలని చెప్పారు. కమిటీల నిర్మాణంలో జాగ్రత్తగా ముందుకు సాగాలని సూచించారు. ఓటర్ల జాబితా సవరణలో పార్టీ చురుకుగా ఉండాలని తెలిపారు. ప్రతి యువకుడికి ఓటు హక్కు కల్పించేలా చూడాలని అన్నారు. అక్రమ ఓట్లు నమోదు కాకుండా జాగ్రత్తలు తీసుకోవాలని సూచించారు. మున్సిపల్ ఎన్నికలకు సిద్ధంగా ఉండాలని కూడా కేటీఆర్ సూచించారు. గత ఎన్నికల్లో సాధించిన విజయాలను గుర్తు చేస్తూ పార్టీ నేతలను అభినందించారు.
