తెలంగాణ 12 జిల్లాల్లో నేడు తేలికపాటి వర్షాలు: ఎల్లో అలెర్ట్ జారీ

తెలంగాణ రాష్ట్రంలోని పలు జిల్లాల్లో మూడు రోజుల పాటు తేలికపాటి నుంచి మోస్తరు వర్షాలు అక్కడక్కడ కురిసే అవకాశం ఉందని వాతావరణశాఖ శాస్త్రవేత్తలు వెల్లడించారు. ఈ వర్షాల వల్ల తెలంగాణ రాష్ట్రంలో గరిష్ఠ ఉష్ణోగ్రతలు రానున్న నాలుగు రోజుల్లో క్రమంగా రెండు నుంచి నాలుగు డిగ్రీలు తగ్గే అవకాశం ఉందని ఐఎండీ అధికారులు అంచనా వేశారు.

నైరుతి రుతుపవనాలు నైరుతి, ఆగ్నేయ అరేబియా సముద్రంలోని మిగిలిన ప్రాంతాలు, పశ్చిమ-మధ్య, తూర్పు-మధ్య అరేబియా సముద్రంలోని కొన్ని ప్రాంతాలు, లక్షద్వీప్ దీవులు పూర్తిగా, కేరళ , మాహే, కర్ణాటకలోని కొన్ని ప్రాంతాలు, తమిళనాడు, కొమొరిన్ ప్రాంతంలోని మిగిలిన భాగాలు, ఆగ్నేయ బంగాళాఖాతం,నైరుతి, పశ్చిమ-మధ్య, తూర్పు-మధ్య, ఈశాన్య బంగాళాఖాతంలోని మరికొన్ని ప్రాంతాల్లోకి మరింత ముందుకు విస్తరించాయని ఐఎండీ అధికారులు చెప్పారు. రాగల 2-3 రోజుల్లో నైరుతి రుతుపవనాలు మధ్య అరేబియా సముద్రంలోని మరికొన్ని ప్రాంతాలు, గోవా అంతటా, మహారాష్ట్ర ఆంధ్రప్రదేశ్‌లోని కొన్ని ప్రాంతాలు, కర్ణాటకలోని మరికొన్ని ప్రాంతాలు, తమిళనాడులోని మిగిలిన భాగాలు, నైరుతి బంగాళాఖాతం, పశ్చిమ-మధ్య, తూర్పు-మధ్య, ఈశాన్య బంగాళాఖాతంలోని మరికొన్ని ప్రాంతాలు, అలాగే ఈశాన్య రాష్ట్రాల్లోని కొన్ని ప్రాంతాలలోకి మరింత ముందుకు సాగడానికి పరిస్థితులు అనుకూలంగా ఉన్నాయని ఐఎండీ డైరెక్టర్ డాక్టర్ కె నాగరత్న తెలిపారు.సగటు సముద్ర మట్టానికి 5.8 కిలోమీటర్ల ఎత్తులో మరఠ్వాడా ప్రాంతంలో ఏర్పడిన ఉపరితల చక్రవాత ఆవర్తనం నుంచి కొంకణ్ గోవా మీదుగా నైరుతి అరేబియా సముద్రం వరకు ఒక ద్రోణి కొనసాగుతోందన్నారు.