‘మంగ్లీతో నా ప్రాణాలకే ప్రమాదం’

సింగర్ మంగ్లీకి సంబంధించిన ఆర్థిక మోసం కేసు రోజుకో మలుపు తిరుగుతోంది. తాజాగానే ఈ కేసులో ఆరోపణలు ఎదుర్కొంటున్న హేమాకాంత్ రెడ్డి సంచలన వ్యాఖ్యలు చేసి వివాదాన్ని మరింత వేడెక్కించారు. తనకు ఈ కుంభకోణంతో ఎలాంటి సంబంధం లేదని, తానే ఒక బాధితుడినని హేమాకాంత్ రెడ్డి వెల్లడించారు. మంగ్లీ, మధు కలిసి తనపై దుష్ప్రచారం చేస్తున్నారని ఆయన ఆరోపించారు. తన ప్రాణాలకు ముప్పు ఉందని, ఏదైనా జరిగితే దానికి మంగ్లీ బాధ్యత వహించాల్సి ఉంటుందని పేర్కొన్నారు.

రమావత్ మధు తనపై చేస్తున్న ఆరోపణలు అసత్యమని ఆయన తెలిపారు. తన వద్ద 10 కోట్లు ఉంటే మధు నేరుగా వచ్చి మాట్లాడాలని సవాల్ విసిరినట్లు చెప్పారు. తాను అంత మొత్తాన్ని తీసుకున్నట్లయితే ఇప్పటివరకు ఎందుకు ఫిర్యాదు చేయలేదని ప్రశ్నించారు. ఈ వ్యవహారానికి సంబంధించిన అసలు విషయాలు మంగ్లీకి పూర్తిగా తెలుసని హేమాకాంత్ రెడ్డి ఆరోపించారు. ‘గోకులనంద ఇన్ఫ్రా’ పేరుతో మధు అనేక మందిని పెట్టుబడులకు ఆకర్షించి డబ్బులు వసూలు చేశాడని చెప్పారు.

మంగ్లీ సోదరుడు శివ చౌహన్ సిమెంట్ ఫ్యాక్టరీ పెట్టుబడుల కోసం సూచనలు ఇవ్వడం వల్లే చాలా మంది డబ్బులు పెట్టారని వెల్లడించారు. మంగ్లీ సోదరుడు కూడా ఈ వ్యవహారంలో డబ్బులు తీసుకున్నారని ఆయన ఆరోపించారు. మధు ఎవరో మంగ్లీకి బాగా తెలుసని పేర్కొన్నారు. మంగ్లీ కుటుంబానికి సంబంధించిన వ్యక్తిగత విషయాలు కూడా ఈ కేసుతో ముడిపడి ఉన్నాయని సూచించారు. ఈ మొత్తం అంశంపై ఈడీకి ఫిర్యాదు చేయాలని నిర్ణయించినట్లు తెలిపారు.

ఈ వివాదం ‘గోకులనంద ఇన్ఫ్రా’ సంస్థ చుట్టూ తిరుగుతోంది. రమావత్ మధు ఈ సంస్థ ద్వారా రియల్ ఎస్టేట్, సిమెంట్ ఫ్యాక్టరీల్లో పెట్టుబడులు పెడితే భారీ లాభాలు వస్తాయని నమ్మించి సుమారు 100 మందినుంచి వందల కోట్ల రూపాయలు సేకరించినట్లు ఆరోపణలు ఉన్నాయి. ఈ ప్రక్రియలో మంగ్లీ పేరును, ఆమె ప్రజాదరణను ఉపయోగించి పెట్టుబడిదారులను ఆకర్షించారని బాధితులు చెబుతున్నారు. శివ చౌహన్ ఈ వ్యాపారంలో భాగస్వామిగా ఉండటంతోనే తాము నమ్మి డబ్బులు ఇచ్చామని వారు వివరించారు.

బాధితుల తరఫున న్యాయవాది సుబ్బారావు పంజాగుట్ట పోలీస్ స్టేషన్‌లో ఫిర్యాదు చేయడంతో ఈ విషయం వెలుగులోకి వచ్చింది. అనంతరం పోలీసులు మంగ్లీని ఐదవ నిందితురాలిగా చేర్చారు. అయితే మంగ్లీ ఈ ఆరోపణలను ఖండిస్తూ తాను నిర్దోషినని, తన పేరును ఇతరులు వాడుకుంటున్నారని ఉన్నతాధికారులకు ఫిర్యాదు చేసినట్లు సమాచారం. ఇప్పుడు హేమాకాంత్ రెడ్డి, మధు మధ్య పరస్పర ఆరోపణలు, మంగ్లీ కుటుంబం పేరు వినిపించడం వల్ల ఈ కేసు మరింత సంక్లిష్టంగా మారింది. వందల కోట్ల రూపాయల ప్రజల సొమ్ము ఎక్కడికి వెళ్లిందన్నది పోలీసుల దర్యాప్తులో తేలాల్సి ఉంది.