తెలంగాణలో కొత్త డిస్కమ్‌కు లైసెన్స్ దరఖాస్తు

తెలంగాణలో విద్యుత్ రంగంలో కీలక పరిణామం చోటుచేసుకుంది. కొత్తగా ఏర్పడిన టీజీఆర్‌పీడీసీఎల్ సంస్థ విద్యుత్ పంపిణీ లైసెన్స్ కోసం దరఖాస్తు చేసింది. తాజాగా విడుదలైన పబ్లిక్ నోటీసుతో ఈ విషయం వెలుగులోకి వచ్చింది. మార్చి 11న రాష్ట్ర ప్రభుత్వం టీజీఆర్‌పీడీసీఎల్‌ను మూడో డిస్కమ్‌గా ఏర్పాటు చేసింది. అనంతరం ఈ సంస్థ తెలంగాణ విద్యుత్ నియంత్రణ కమిషన్‌కు దరఖాస్తు సమర్పించింది. ఎలక్ట్రిసిటీ చట్టం 2003 ప్రకారం ఈ దరఖాస్తు దాఖలైనట్లు సమాచారం.

లైసెన్స్ మంజూరైతే వ్యవసాయ వినియోగదారులు, లిఫ్ట్ ఇరిగేషన్ పథకాలు, మిషన్ భగీరథ, హెచ్‌ఎండబ్ల్యూఎస్‌ఎస్‌బీ, మున్సిపల్ నీటి కనెక్షన్లకు విద్యుత్ సరఫరా బాధ్యతలు చేపడుతుంది. అదే సమయంలో విద్యుత్ కొనుగోలు, పంపిణీ, ట్రేడింగ్, బిల్లింగ్, వసూళ్లను కూడా ఈ సంస్థ నిర్వహించనుంది. కొత్త వ్యవసాయ కనెక్షన్ల అందజేత, ట్రాన్స్‌ఫార్మర్లు మరియు లోటెన్షన్ లైన్ల నిర్వహణ బాధ్యతలు కూడా చేపట్టనుంది.

ఎనర్జీ అకౌంటింగ్, మీటరింగ్, నియంత్రణ నిబంధనల అమలు వంటి పనులు కూడా టీజీఆర్‌పీడీసీఎల్ పరిధిలో ఉంటాయి. అయితే ప్రధాన నెట్‌వర్క్ మద్దతు మాత్రం ప్రస్తుత డిస్కమ్‌ల నుంచే కొనసాగనుంది. ఈ ప్రతిపాదనపై ప్రజలు, భాగస్వాములు తమ అభిప్రాయాలు తెలియజేయాలని కమిషన్ ఆహ్వానించింది. మే 18 సాయంత్రం 5 గంటలలోగా సూచనలు, అభ్యంతరాలు సమర్పించాలని తెలిపింది.

మే 28న హైదరాబాద్‌లోని విద్యుత్ నియంత్రణ భవన్‌లో ప్రజా విచారణ నిర్వహించనున్నట్లు ప్రకటించారు. మొత్తంగా ఈ కొత్త డిస్కమ్ ఏర్పాటుతో రాష్ట్ర విద్యుత్ పంపిణీ వ్యవస్థలో మార్పులు చోటుచేసుకునే అవకాశం కనిపిస్తోంది.