ఇందిరమ్మ ఇళ్ల అంశంలో రాజకీయాలకు స్థానం లేదు: పొంగులేటి

ఇందిరమ్మ ఇళ్ల విషయంలో రాజకీయాలకు స్థానం ఉండదని మంత్రి పొంగులేటి శ్రీనివాస్ రెడ్డి స్పష్టం చేశారు. అర్హులైన ప్రతి ఒక్కరికీ న్యాయం జరిగేలా ప్రభుత్వం చర్యలు తీసుకుంటుందని ఆయన తెలిపారు. ఈ సందర్భంగా కుసుమంచిలో జరిగిన ప్రజాదర్బార్‌లో మంత్రి పాల్గొన్నారు. జిల్లా పరిషత్ హైస్కూల్ ప్రాంగణంలో నిర్వహించిన ఈ కార్యక్రమంలో కలెక్టర్ దివాకర్ టీఎస్, అదనపు కలెక్టర్ డాక్టర్ శ్రీజాతో కలిసి ప్రజల నుంచి వినతులు స్వీకరించారు.

ప్రజలు తమ సమస్యల కోసం కార్యాలయాల చుట్టూ తిరగాల్సిన అవసరం లేకుండా ప్రభుత్వం నేరుగా ప్రజల వద్దకే చేరుతోందని మంత్రి చెప్పారు. ప్రతి వినతిని పరిశీలించి వెంటనే పరిష్కరించే విధంగా చర్యలు తీసుకుంటున్నట్లు వెల్లడించారు. పాలేరు నియోజకవర్గంలో ప్రజాదర్బార్‌లను మండలాల వారీగా నిర్వహిస్తున్నట్లు తెలిపారు. ఇందులో వచ్చిన అర్హులైన అన్ని దరఖాస్తులకు రాజకీయ ప్రభావం లేకుండా పరిష్కారం చూపుతామని హామీ ఇచ్చారు. సాదాబైనామా, నిషేధిత భూములు, భూసంబంధిత సమస్యలపై ఎక్కువ ఫిర్యాదులు వస్తున్నాయని మంత్రి పేర్కొన్నారు.

వీటికి శాశ్వత పరిష్కారం చూపేందుకు ప్రభుత్వం ప్రత్యేకంగా పనిచేస్తోందని తెలిపారు. ప్రజాపాలన కార్యక్రమం ద్వారా సంక్షేమ పథకాలను వేగంగా అమలు చేస్తున్నామని చెప్పారు. ప్రతి అర్హ లబ్ధిదారుడికి న్యాయం చేయడమే ప్రభుత్వ బాధ్యత అని మంత్రి స్పష్టం చేశారు. ఇందిరమ్మ ఇళ్లపై కూడా ఎక్కువ దరఖాస్తులు వస్తున్నాయని ఆయన తెలిపారు. ఇళ్ల నిర్మాణానికి నిధులు ప్రతి సోమవారం నేరుగా లబ్ధిదారుల ఖాతాల్లో జమ చేస్తున్నట్లు చెప్పారు.