ఆరుగురు మహిళా రెజ్లర్లు, భారత రెజ్లింగ్ సమాఖ్య(డబ్ల్యూఎఫ్ఐ) మాజీ చీఫ్ బ్రిజ్ భూషణ్ శరణ్ సింగ్ పై చేసిన లైంగిక ఆరోపణల కేసును ఢిల్లీ కోర్టు కొట్టివేసింది. ఈ కేసులో ఆయనను నిర్ధోషిగా ప్రకటించింది. ఈ కేసులో డబ్ల్యూఎఫ్ఐ కార్యదర్శి వినోద్ తోమర్ పై ఎఫ్ఐఆర్ ఫైల్ అయింది.
రౌస్ అవెన్యూ కోర్టుల అదనపు చీఫ్ జ్యుడీషియల్ మేజిస్ట్రేట్ (సీజేఎం) అశ్విని పన్వార్ జూలై 2న తీర్పుపై ఉత్తర్వులను రిజర్వ్ చేసిన తర్వాత ఈ పరిణామం చోటుచేసుకుంది. రెండు వారాల్లోగా తమ లిఖితపూర్వక వాదనలను సమర్పించాలని సీజేఎం ప్రాసిక్యూషన్, డిఫెన్స్లను కూడా ఆదేశించారు.
సింగ్పై సెక్షన్లు 354 (మహిళ గౌరవానికి భంగం కలిగించే ఉద్దేశ్యంతో ఆమెపై దాడి లేదా నేరపూరిత బలప్రయోగం), 354ఎ (లైంగిక వేధింపులు) 506(1) (నేరపూరిత బెదిరింపు) కింద కేసులు నమోదు చేయగా, సహ నిందితుడు తోమర్పై నేరపూరిత బెదిరింపుల అభియోగాలు మోపారు. ఈ నేరాలకు గరిష్టంగా ఐదేళ్ల జైలు శిక్ష విధించవచ్చు.
మహిళా రెజ్లర్ల నిరసనలు..
2023 జనవరిలో ఢిల్లీలోని జంతర్ మంతర్ వద్ద ప్రముఖ మహిళా రెజ్లర్లు నిరసనలు తీయడంతో బ్రిజ్ భూషణ్ తో పాటు తోమర్ లపై కేసు నమోదు చేశారు. దాదాపు దశాబ్ద కాలంగా సింగ్ పలువురు మహిళా రెజ్లర్లను లైంగికంగా వేధించారని ఆ క్రీడాకారులు ఆరోపించారు. WFI చీఫ్ పదవి నుంచి తొలగించడంతో పాటు, ఆయనను అరెస్టు చేయాలని కూడా వారు డిమాండ్ చేశారు.
ఈ ఆరోపణల నేపథ్యంలో, అప్పట్లో ఉత్తరప్రదేశ్లోని కైసర్గంజ్ నుండి బీజేపీ ఎంపీగా ఉన్న సింగ్, ఫెడరేషన్ అత్యున్నత పదవి నుంచి వైదొలగగా, ఆయనకు సన్నిహితుడిగా భావించే తోమర్ను కూడా సస్పెండ్ చేశారు. కేంద్ర క్రీడా మంత్రిత్వ శాఖ విచారణ కమిటీని ఏర్పాటు చేస్తామని హామీ ఇవ్వడంతో నిరసనలు కొద్దికాలం పాటు నిలిచిపోయాయి. అయితే, ఎటువంటి నిర్దిష్ట చర్యలు తీసుకోలేదని రెజ్లర్లు ఆరోపించడంతో 2023 ఏప్రిల్లో అవి తిరిగి ప్రారంభమయ్యాయి.
దర్యాప్తు.. విచారణ
సుప్రీంకోర్టు జారీ చేసిన ఆదేశాల మేరకు, ఢిల్లీ పోలీసులు ఏప్రిల్ 28, 2023న రెండు ఎఫ్ఐఆర్లను నమోదు చేశారు. వాటిలో ఒకటి సింగ్, తోమర్లపై ఆరుగురు వయోజన మహిళా రెజ్లర్లు చేసిన ఫిర్యాదులకు సంబంధించింది కాగా, రెండవది ఒక మైనర్ రెజ్లర్ ఫిర్యాదుపై పోక్సో (POCSO) చట్టంలోని నిబంధనలను ప్రయోగించింది. రెండు ఎఫ్ఐఆర్లు 2012, 2022 మధ్య జరిగిన సంఘటనలను ఆరోపించాయి.
నిందితులపై విచారణ జరపడానికి తగిన సాక్ష్యాలు ఉన్నాయని పేర్కొంటూ పోలీసులు జూన్ 2023లో ఛార్జిషీట్ దాఖలు చేశారు. సింగ్ ఈ ఆరోపణలను ఖండించారు, వాటిని "ప్రేరేపితమైనవి" అని "తనను డబ్ల్యూఎఫ్ఐ (WFI) పదవి నుంచి తొలగించే ప్రయత్నం" అని అభివర్ణించారు.
అంతేకాకుండా, విచారణ సమయంలో బాధితులు తమ వాంగ్మూలాన్ని మార్చారని కూడా ఆయన పేర్కొన్నారు. చాలామంది బాధితులు మొదట చేసిన ఆరోపణల సమయంలో బ్రిజ్ భూషణ్ అసలు ఆరోజు కార్యాలయంలోనే లేరని వెల్లడైంది. కిందిస్థాయి టోర్నమెంట్ లో ఆడితేనే జాతీయ, అంతర్జాతీయ స్థాయిలో ఆడటానికి అనుమతి ఇస్తామనే నిబంధన తీసుకురావడంతో సీనియర్లంతా కలిసి ఈ కుట్ర చేసినట్లు బ్రిజ్ భూషణ్ మద్దతుదారులు వాదించారు. ప్రస్తుతం ఆయనను నిర్దోషిగా కోర్టు విడుదల చేయడం వారి వాదనను సమర్థించినట్లు అయింది.
