కాళేశ్వరం విషయంలో రేవంత్ ఫెయిల్: కిషన్ రెడ్డి
హైకోర్టు తీర్పుతో కమిషన్ నివేదిక నిలిపివేత, అవినీతి ఆరోపణలపై చర్యల లోపం, ప్రభుత్వంపై తీవ్ర విమర్శలు.
కాళేశ్వరం అవినీతి విచారణలో రేవంత్ రెడ్డి ప్రభుత్వం అట్టర్ప్లాప్ అయిందంటూ కేంద్రమంత్రి కిషన్ రెడ్డి ఘాటు వ్యాఖ్యలు చేశారు. బీఆర్ఎస్ను, కేసీఆర్ను కాపాడుకోవడం కోసమే కమిషన్ చేత న్యాయస్థానం తప్పుబట్టే విధంగా రిపోర్ట్ సిద్ధం చేయించారని ఆరోపించారు. పీసీ ఘోష్ కమిషన్ నివేదిక అంశంపై హైకోర్టు ఇచ్చిన తీర్పు ఈ ప్రభుత్వ వైఫల్యాన్ని మరోసారి తేటతెల్లం చేసిందని అన్నారు కిషన్. ఈ తీర్పు ప్రభుత్వ నిర్లక్ష్యం, అసమర్థతకు నిదర్శనమని కిషన్ రెడ్డి విమర్శించినట్లు తెలిపారు. భారీ అవినీతి జరిగినట్లు ఆధారాలు ఉన్నప్పటికీ, వాటిని చట్టపరంగా సమర్థవంతంగా కోర్టులో ప్రవేశపెట్టడంలో ప్రభుత్వం పూర్తిగా విఫలమైందని ఆయన ఆరోపించారు. ఎన్నికల సమయంలో కేసీఆర్, ఆయన కుటుంబ సభ్యులు, మంత్రులు, బీఆర్ఎస్ ఎమ్మెల్యేలపై కఠిన చర్యలు తీసుకుంటామని కాంగ్రెస్, రేవంత్ రెడ్డి హామీలు ఇచ్చారని ఆయన గుర్తుచేశారు.
అయితే అధికారంలోకి వచ్చి రెండున్నరేళ్లు పూర్తవుతున్నా, ఏ ఒక్క అవినీతి అంశంపై సమగ్ర దర్యాప్తు జరగలేదని ప్రశ్నించారు. కాళేశ్వరం ప్రాజెక్టులో వేల కోట్ల రూపాయల అవినీతి జరిగిందని స్వయంగా సీఎం పేర్కొన్నారని ఆయన అన్నారు. అలాగే ఫార్ములా వన్ రేస్ ఖర్చులు, డ్రగ్స్ కేసు, భూ ఆక్రమణలు, భూ కేటాయింపులు, మిషన్ భగీరథ, మిషన్ కాకతీయ వంటి పథకాలలో అవినీతి జరిగిందని ఆరోపణలు ఉన్నప్పటికీ, వాటిపై ఎలాంటి చర్యలు ఎందుకు తీసుకోలేదని నిలదీశారు. అవినీతి సొమ్మును తిరిగి రాబట్టుతామని చెప్పినా అమలు కాలేదని విమర్శించారు. కేసీఆర్ కుటుంబంపై చర్యలు తీసుకోకపోవడానికి కాంగ్రెస్, బీఆర్ఎస్ పార్టీల మధ్య ఉన్న అనుబంధమే కారణమని విమర్శించారు. ప్రజాక్షేత్రంలో రెండు పార్టీలు పోటీ పడుతున్నట్లు కనిపించినా, వాస్తవానికి ‘డూప్ ఫైటింగ్’ చేస్తున్నాయని వ్యాఖ్యానించినట్లు సమాచారం. ప్రజలను మోసం చేసే విధంగా వ్యవహరిస్తున్నాయని ఆగ్రహం వ్యక్తం చేశారు.
తెలంగాణ ప్రజలు మార్పు కోసం కాంగ్రెస్కు అవకాశం ఇచ్చారని, కానీ ఆ ఆశలు నెరవేరలేదని ఆయన అభిప్రాయపడ్డట్లు తెలిపారు. గత రెండున్నరేళ్లలో ప్రభుత్వం అవినీతి, అక్రమాలకు పాల్పడుతోందని కూడా ఆరోపించారు. ఇది పరిపాలనా వైఫల్యమని, ప్రజలకు ఇచ్చిన హామీలను విస్మరించడం ద్వారా రాజకీయ ద్రోహం చేస్తున్నారని కిషన్ రెడ్డి విమర్శించారు. హైకోర్టు తీర్పు నేపథ్యంలో కాంగ్రెస్ అగ్రనేత రాహుల్ గాంధీ, సీఎం రేవంత్ రెడ్డి ప్రజలకు సమాధానం చెప్పాలని ఆయన డిమాండ్ చేశారు. ఎన్నికల హామీలు ఎందుకు అమలు కాలేదని, అవినీతి కేసుల్లో చర్యలు ఎందుకు ఆలస్యమవుతున్నాయని ప్రశ్నించారు.
