మెట్రోకి కలిసొచ్చిన ఆర్టీసీ స్ట్రైక్

ఆర్టీసీ సమ్మె హైదరాబాద్ మెట్రోకు కలిసొచ్చింది. ఇంతకాలం ప్రయాణికుల సంఖ్య విషయంలో మెట్రో కాస్తంత ఆందోళనగా ఉండగా.. ఇప్పుడు ఆర్టీసీ సమ్మెతో.. మెట్రో ప్రయాణికుల సంఖ్య ఆకాశమేహద్దుగా పెరిగింది. మొన్నటి వరకు రోజుకు 4.5 లక్షల మంది వరకు మెట్రో సేవలను వినియోగించుకున్నారు. కాగా ఇప్పుడు ఆ సంఖ్య 5-6 లక్షల వరకు చేరినట్లు తెలుస్తోంది. బస్సులు డిపోలకే పరిమితం కావడంతో చాలా మంది ప్రయాణికులు మెట్రో బాట పట్టారు. దీంతో దాదాపు ప్రతి మెట్రో స్టేషన్‌లో రద్దీ భారీగా పెరిగింది. ఆర్టీసీ సమ్మె రెండో రోజు కొనసాగుతున్న క్రమంలో మెట్రో రద్దీ మరింత పెరిగింది. ఈ రద్దీ మరింత పెరిగే అవకాశం కూడా ఉందని కొందరు నిపుణులు అభిప్రాయపడుతున్నారు.

ఉదయం, సాయంత్రం పీక్ టైమ్‌లో స్టేషన్లు కిక్కిరిసిపోయాయి. చాలా మార్గాల్లో ట్రైన్లు నిండుగా నడిచాయి. ప్రయాణికులు ఎక్కువసేపు వేచి చూడాల్సిన పరిస్థితి ఏర్పడింది. రద్దీని నియంత్రించేందుకు అధికారులు కీలక స్టేషన్లలో అదనపు సిబ్బందిని ఏర్పాటు చేశారు. ప్రయాణికుల కదలికను సవ్యంగా నిర్వహించే చర్యలు తీసుకున్నారు. ఇక ప్రైవేట్ వాహనాలపై కూడా డిమాండ్ పెరిగింది. ఆటోలు, క్యాబ్‌లకు ఎక్కువగా డిమాండ్ రావడంతో ఛార్జీలు పెరిగాయి. ఇది ప్రయాణికులకు మరింత భారంగా మారింది. మెట్రో సేవలను అధికారులు దగ్గరగా గమనిస్తున్నట్లు తెలిపారు. అవసరమైతే అదనపు ట్రిప్‌లు నడపాలని అధికారులు నిర్ణయించారు.

అంతేకాకుండా మెట్రో రైళ్ల ఫ్రీక్వెన్సీని కూడా పెంచారు అధికారులు. ఇప్పటి వరకు ప్రతి 15 నిమిషాలకు ఒక మెట్రో వస్తుండగా ఒక్కసారిగా పెరిగిన రద్దీతో ప్రతి 3-5 నిమిషాలకు ఒక ట్రైన్ వచ్చేలా అధికారులు చర్యలు తీసుకున్నారు. ఇందుకోసం అదనపు రైళ్లను కూడా రంగంలోకి దించారు. దీంతో గరిష్టంగా 56 రైళ్లను నడపనున్నట్లు తెలిపారు. అంతేకాకుండా మెట్రో వేళల్లో కూడా మార్పులు తీసుకొచ్చారు. రాత్రి 11 గంటల తర్వాత కూడా మెట్రో సేవలు అందుబాటులో ఉండనున్నాయి. తెలంగాణ ఆర్టీసీ సమ్మె నడిచినంత కాలం మెట్రో అదనపు గంటలు నడుస్తుందని అధికారులు చెప్పారు.