మగ్గంపై తెలంగాణ కళా వైభవం!

ర‌చ్చ‌ - రాజ‌కీయం @ 5 పి.ఎం.

1) సిరిసిల్ల మగ్గంపై దుబాయ్ రాజుల ముఖచిత్రాలు..

2) అకున్ సబర్వాల్ రీఎంట్రీ.. టాలీవుడ్ డ్రగ్స్ కేసులో మళ్లీ కదలికలు?

3) జైలు గోడల మధ్య చదువు.. 10 మంది ఖైదీలకు పీజీ పట్టాలు!

1) సిరిసిల్ల మగ్గంపై దుబాయ్ రాజుల ముఖచిత్రాలు..

“వెళ్ది హరి ప్రసాద్ అంటే సాధారణ చేనేత కార్మికుడు కాదు.. మగ్గాన్ని కాన్వాస్‌గా మార్చి, నూలుపోగులతో చరిత్రను నేసే సిరిసిల్ల కళాకారుడు!”26 గ్రాముల వెండి పట్టు దారాలతో దుబాయ్ రాజకుటుంబ సభ్యుల ముఖచిత్రాల్ని 2 మీటర్ల పొడవు, 48 అంగుళాల వెడల్పున్న శాలువాను 15 రోజుల్లో, రోజుకు 18–20 గంటలు పనిచేసి రూపొందించారు.

గ‌తంలో, G20 లోగోను ఒకే వస్త్రంపై మగ్గంతో నేసి జాతీయ స్థాయిలో గుర్తింపు పొందారు. ఈ పనిని ప్రధాని నరేంద్ర మోదీ మన్ కీ బాత్లో ప్రశంసించారు.

సూది కన్నులోంచి వెళ్లేంత సన్నని, అగ్గిపెట్టెలో పట్టే చీర వంటి వినూత్న చేనేత ప్రయోగాలు చేశారు.

అయోధ్య సీతమ్మ కోసం బంగారు చీర, రామాయణ ఘట్టాలను చీరలోనే చూపించేలా రూపొందించారు.

సచిన్ టెండూల్కర్ దంపతుల చిత్రాలు, జాతీయ గీతాన్ని ఒకే వస్త్రంపై నేయడం వంటి ప్రత్యేక కళాఖండాలు రూపొందించారు.

దుబాయ్ రాజకుటుంబ సభ్యుల ముఖచిత్రాలతో సిరిసిల్ల నేతన్న ప్రత్యేక శాలువా రూపొందించారు. తెలంగాణ చేనేత కళకు అంతర్జాతీయ గుర్తింపు తీసుకొచ్చే అరుదైన ప్రయత్నం ఇది.

రాజన్న సిరిసిల్ల జిల్లా కేంద్రానికి చెందిన నేత కార్మికుడు వెళ్ది హరి ప్రసాద్ ఈ ప్రత్యేక శాలువాను రూపొందించారు. సాధారణంగా చీరలు, శాలువాలపై వివిధ డిజైన్లను నేసే మగ్గంపై, ఏకంగా మనుషుల ముఖచిత్రాలనే ఆవిష్కరించడం విశేషం. సుమారు 15 రోజుల పాటు శ్రమించి, నూలుపోగులతో అద్భుతమైన కళాఖండాన్ని తయారు చేశారు హరి ప్రసాద్. శాలువాపై ముఖ కవళికలు స్పష్టంగా కనిపించేలా రూపొందించడం ఆయన నైపుణ్యానికి నిదర్శనం.

ఈ ప్రత్యేక శాలువాపై దుబాయ్ పాలకుడు షేక్ మహమ్మద్ బిన్ రషీద్ అల్ మక్తూమ్, దుబాయ్ యువరాజు షేక్ హమ్దాన్ బిన్ మహమ్మద్ బిన్ రషీద్ అల్ మక్తూమ్, షేక్ మక్తూమ్ బిన్ మహమ్మద్ బిన్ రషీద్ అల్ మక్తూమ్ చిత్రాలను నేశారు.

సాధారణ మగ్గంపై ఇంత క్లిష్టమైన ముఖచిత్రాలను రూపొందించడం సిరిసిల్ల చేనేత కళాకారుడి ప్రతిభకు నిదర్శనంగా నిలుస్తోంది.

దుబాయ్ బతుకమ్మ వేడుకల్లో ప్రదర్శన!ఈ నెల 11న దుబాయ్‌లో జరగనున్న Emirates Telangana Cultural Association (ETCA) బతుకమ్మ వేడుకల్లో ఈ ప్రత్యేక శాలువాను ప్రదర్శించనున్నారు. అనంతరం దుబాయ్ రాజకుటుంబానికి ప్రత్యేక కానుకగా అందించేందుకు నిర్వాహకులు ఏర్పాట్లు చేస్తున్నారు.

తెలంగాణ నుంచి దుబాయ్‌కు వెళ్లి ఉపాధి పొందుతున్న లక్షలాది మంది కార్మికుల నేపథ్యంలో.. అక్కడి పాలక కుటుంబంపై ఉన్న గౌరవం, అభిమానానికి ప్రతీకగా ఈ కళాఖండాన్ని రూపొందించినట్లు నిర్వాహకులు తెలిపారు.

ఈ శాలువాను దుబాయ్‌కు తీసుకెళ్లేందుకు సిరిసిల్ల సీనియర్ జర్నలిస్టు బాలు కాయితి, సివిల్ కాంట్రాక్టర్ జూపల్లి వెంకట రావు సహకరిస్తున్నారు. ETCA ప్రతినిధి పిచర కిరణ్ కుమార్ ఆధ్వర్యంలో ఈ కానుకను రాజకుటుంబానికి అందించే కార్యక్రమం జరగనుంది.

ఒకప్పుడు వస్త్రాల తయారీకే ప్రసిద్ధి చెందిన సిరిసిల్ల, ఇప్పుడు వినూత్న కళాఖండాలతోనూ ప్రత్యేకత చాటుకుంటోంది. ఆధునిక సాంకేతికతకు తోడు సంప్రదాయ మగ్గంపై కళాకారులు చూపిస్తున్న ప్రతిభ తెలంగాణ చేనేతకు కొత్త గుర్తింపును తీసుకొస్తోంది. మరి, సిరిసిల్ల నేతన్న నేసిన ఈ అరుదైన శాలువా దుబాయ్ రాజకుటుంబాన్ని ఎంతగా ఆకట్టుకుంటుంది? తెలంగాణ చేనేత కళకు అంతర్జాతీయ స్థాయిలో మరింత గుర్తింపు తీసుకొస్తుందా? వేచి చూడాలి!

2) అకున్ సబర్వాల్ రీఎంట్రీ.. టాలీవుడ్ డ్రగ్స్ కేసులో మళ్లీ కదలికలు?

తెలంగాణలో సీనియర్ ఐపీఎస్ అధికారి అకున్ సబర్వాల్ రీఎంట్రీ ఇప్పుడు ఆసక్తికరంగా మారింది. కేంద్ర సర్వీసులో డిప్యుటేషన్ పూర్తి చేసుకున్న ఆయన తిరిగి తెలంగాణ క్యాడర్‌లోకి రానున్నారన్న సమాచారంతో.. 2017 నాటి టాలీవుడ్ డ్రగ్స్ కేసు మరోసారి చర్చలోకి వచ్చింది.

అసలు 2017లో ఏం జరిగింది?హైదరాబాద్‌లో LSD, MDMA వంటి డ్రగ్స్ సరఫరా వ్యవహారం అప్పట్లో సంచలనం సృష్టించింది. అప్పటి ఎక్సైజ్ ఎన్‌ఫోర్స్‌మెంట్ డైరెక్టర్‌గా ఉన్న అకున్ సబర్వాల్ నేతృత్వంలో ప్రత్యేక దర్యాప్తు బృందం రంగంలోకి దిగింది.

డ్రగ్ పెడ్లర్ల విచారణలో బయటపడ్డ సమాచారంతో దర్యాప్తులో భాగంగా సిట్‌ పలువురు సినీ ప్రముఖులకు నోటీసులు ఇచ్చి విచారించింది. వీరిలో దర్శకుడు పూరి జగన్నాథ్, నటి/నిర్మాత ఛార్మి కౌర్, న‌టులు రవితేజ, నవదీప్, తరుణ్, పి. సుబ్బరాజు, తనీష్, న‌టి ముమైత్ ఖాన్, సినిమాటోగ్రాఫర్ శ్యామ్ కె. నాయుడు, గాయకుడు నందు, ఆనంద కృష్ణ నందు, ఆర్ట్ డైరెక్టర్ చిన్ని/చిన్నా ఎన్. ధర్మారావు తదితరులు ఉన్నారు. అయితే, సినీ పరిశ్రమనే టార్గెట్ చేశారన్న విమర్శలను అప్పట్లో సబర్వాల్ ఖండించారు.

SIT మొత్తం 12 కేసులు నమోదు చేసి దర్యాప్తు చేసింది. 8 కేసుల్లో ఛార్జ్‌షీట్లు దాఖలు కాగా.. ఆరు కేసులను 2024లో కోర్టులు కొట్టివేసినట్లు అప్పటి నివేదికలు వెల్లడించాయి. తగిన ఆధారాలు లేకపోవడం సహా దర్యాప్తులోని లోపాలను కోర్టులు ప్రస్తావించినట్లు వార్తలు వచ్చాయి.

అయితే దీని అర్థం అకున్ సబర్వాల్ తిరిగి వస్తే పాత కేసు ఆటోమేటిక్‌గా రీఓపెన్ అవుతుందని కాదు.

ఇప్పుడు చర్చ ఏమిటంటే, సబర్వాల్‌కు తెలంగాణ ప్రభుత్వం ఎలాంటి పోస్టింగ్ ఇస్తుంది? డ్రగ్స్ నిరోధక విభాగంలో మళ్లీ బాధ్యతలు అప్పగిస్తుందా? అప్పటి దర్యాప్తు రికార్డులను ప్రభుత్వం సమీక్షిస్తుందా? అన్నదే ఆసక్తిగా మారింది.

ఒకవేళ ప్రభుత్వం పాత కేసులను సమీక్షించాలని నిర్ణయిస్తే.. చట్టపరంగా ఇంకా ఏమైనా చర్యలకు అవకాశం ఉందా? అప్పటి దర్యాప్తులో మిగిలిన అంశాలపై ఏం చేయొచ్చు? అన్నది కూడా కీలకంగా మారుతుంది.మొత్తానికి.. అకున్ సబర్వాల్ రీఎంట్రీతో 2017 డ్రగ్స్ కేసు మళ్లీ తెరపైకి వచ్చింది. పాత డ్రగ్స్ కేసు మళ్లీ కదిలితే.. రాజకీయంగా మాత్రం ఈ అంశం మరోసారి చర్చకు వచ్చే అవకాశం ఉంది. కేటీఆర్‌పై ఎలాంటి ప్రభావం ఉంటుంద‌నే చ‌ర్చ జ‌రుగుతోంది. కానీ కేసు నిజంగా మళ్లీ తెరుచుకుంటుందా? లేక ఇది కేవలం అధికారిక రీఎంట్రీగానే మిగిలిపోతుందా? అనేది ప్రభుత్వం తీసుకునే తదుపరి నిర్ణయాలపై ఆధారపడి ఉంటుంది.

3) జైలు గోడల మధ్య చదువు.. 10 మంది ఖైదీలకు పీజీ పట్టాలు!

జైలు శిక్ష అనుభవిస్తున్న సమయంలోనే ఉన్నత విద్య పూర్తి చేసి.. ఏకంగా పీజీ పట్టాలు అందుకున్నారు తెలంగాణకు చెందిన 10 మంది ఖైదీలు. హైదరాబాద్‌లో జరిగిన డాక్టర్‌ బీఆర్‌ అంబేడ్కర్‌ ఓపెన్‌ యూనివర్సిటీ 27వ స్నాతకోత్సవంలో గవర్నర్‌ చేతుల మీదుగా వీరు పట్టాలు అందుకున్నారు.

ఈ పది మందిలో ఎనిమిది మంది ఎంఎస్సీ సైకాలజీ, మరో ఇద్దరు ఎంఏ సోషియాలజీ పూర్తి చేశారు. వీరిలో కొందరు ఇప్పటికే ఎల్‌ఎల్‌బీ వంటి ఉన్నత విద్యను పూర్తి చేయగా.. మరొకరు బీటెక్‌ కూడా చదివారు. జైలు శిక్షలో ఉన్న సమయంలోనూ చదువును ఆపకుండా ఓపెన్‌ యూనివర్సిటీ ద్వారా పీజీ కోర్సుల్లో చేరి విద్యను కొనసాగించారు.

సాధారణ కళాశాలలకు వెళ్లే అవకాశం లేని ఖైదీలకు ఓపెన్‌ యూనివర్సిటీ కోర్సులు ఉపయోగపడుతున్నాయి. జైలు శిక్ష కాలాన్ని ఖాళీగా గడపకుండా.. విద్య, నైపుణ్యాలను పెంచుకునేలా తెలంగాణ జైళ్లు, దిద్దుబాటు సేవల శాఖ ప్రోత్సహిస్తోంది. విద్యను కేవలం డిగ్రీ కోసం కాకుండా.. జైలు నుంచి విడుదలైన తర్వాత సమాజంలో తిరిగి బాధ్యతాయుతమైన జీవితం ప్రారంభించేందుకు ఉపయోగపడే సాధనంగా అధికారులు భావిస్తున్నారు.

హైదరాబాద్‌లో జరిగిన 27వ స్నాతకోత్సవంలో తెలంగాణ జైళ్ల శాఖ అధికారులు కూడా పాల్గొని పట్టాలు అందుకున్న ఖైదీలను అభినందించారు. గవర్నర్‌ శివ ప్రతాప్‌ శుక్లా ముఖ్యఅతిథిగా హాజరయ్యారు.

జైలు గోడలు చదువుకు అడ్డుకావని నిరూపణ!తప్పు చేసిన వ్యక్తికి శిక్ష అనుభవించడం ఒక భాగమైతే.. ఆ సమయంలో తనను తాను మార్చుకునే అవకాశం కల్పించడం మరో ముఖ్యమైన అంశం. ఈ పది మంది ఖైదీల విద్యా ప్రయాణం కూడా అదే విషయాన్ని చెబుతోంది.జైలు శిక్షను కేవలం నిర్బంధ కాలంగా కాకుండా.. విద్య, నైపుణ్యాభివృద్ధి, పునరావాసానికి ఉపయోగించుకుంటే.. విడుదల తర్వాత కొత్త జీవితానికి అది బలమైన పునాది అవుతుంది. ఈ పది మంది ఖైదీల పీజీ పట్టాలు.. వారికి మాత్రమే కాదు, మార్పు కోరుకునే మరెందరికో స్ఫూర్తిగా నిలుస్తున్నాయి.