మరో రెండు రోజులు అసెంబ్లీ..!

తెలంగాణ అసెంబ్లీ సమావేశాలు మరో రెండు రోజులు కొనసాగే అవకాశాలు కనిపిస్తున్నాయి. శుక్రవారంతో అసెంబ్లీ వర్షాకాల సమావేశాలు ముగుస్తాయనుకుంటే కొన్ని కారణాల వల్ల అసెంబ్లీని పొడిగించాలని ప్రభుత్వం భావిస్తున్నట్లు తెలుస్తోంది. ఇదే అంశాన్ని అధికార పక్షం పరిశీలిస్తోందని సన్నిహిత వర్గాలు చెప్తున్నాయి. దీనిపై సాయంత్రానికి స్పష్టత వచ్చే అవకాశం ఉంది. కాంగ్రెస్ ప్రభుత్వం అధికారంలోకి వచ్చి వెయ్యి రోజులు పూర్తవుతున్న నేపథ్యంలో.. ఈ అంశంపై అసెంబ్లీలో విస్తృత చర్చకు ప్రభుత్వం సిద్ధమవుతున్నట్లు తెలుస్తోంది.

ప్రభుత్వం చేపట్టిన కార్యక్రమాలు, ఎన్నికల హామీల అమలు, ఇప్పటివరకు సాధించిన పురోగతిని సభలో వివరించే అవకాశం ఉంది. మరోవైపు వెయ్యి రోజుల పాలనపై బీఆర్‌ఎస్‌ ఇప్పటికే ప్రభుత్వాన్ని విమర్శిస్తోంది. ఎన్నికల సమయంలో ఇచ్చిన హామీలు ఎంతవరకు అమలయ్యాయంటూ ప్రతిపక్షాలు ప్రశ్నలు లేవనెత్తుతున్నాయి. దీంతో సభా వేదికగానే వాటికి సమాధానం ఇవ్వాలని ప్రభుత్వం భావిస్తున్నట్లు సమాచారం.

రుణమాఫీ, ఇందిరమ్మ ఇళ్లు, ఉద్యోగాల భర్తీ, సంక్షేమ పథకాల అమలు వంటి అంశాలను ప్రభుత్వం ప్రస్తావించే అవకాశం ఉంది. ఇవాళ్టి సమావేశాల బ్రేక్ సమయంలో సీఎం రేవంత్‌రెడ్డి మంత్రులతో భేటీ అయ్యారు. ఈ సమావేశంలో అసెంబ్లీని మరో రెండు రోజులు కొనసాగించే అంశాన్ని ప్రస్తావించినట్లు సమాచారం. అయితే దీనిపై ఇంకా తుది నిర్ణయం తీసుకోవాల్సి ఉంది. సాయంత్రానికి ప్రభుత్వం నుంచి స్పష్టమైన ప్రకటన వచ్చే అవకాశం ఉంది.

22ఏ భూములపై నేడు చర్చ

మరోవైపు గురువారం మధ్యాహ్నం తర్వాత 22ఏ నిషేధిత భూముల అంశంపై అసెంబ్లీలో చర్చ జరిగే అవకాశం ఉంది. ఎల్‌ నినో అంశంతో పాటు 22ఏ భూములపై కూడా చర్చ జరగనుంది. ముఖ్యమంత్రి రేవంత్‌రెడ్డి ఈ అంశంపై మాట్లాడనున్నారు. 22ఏ జాబితాలో ప్రైవేటు భూములు చేరడంపై ఇప్పటికే అభ్యంతరాలు వ్యక్తమవుతున్నాయి. ఈ అంశంపై అధికార, ప్రతిపక్షాల మధ్య మాటల యుద్ధం కొనసాగుతోంది. ఈ నేపథ్యంలో 22ఏ భూముల విషయంలో ప్రభుత్వం తన వైఖరిని సభలో స్పష్టం చేయనుంది.

సమావేశాలు ఎందుకు పొడిగించాలనుకుంటోంది? వెయ్యి రోజుల పాలనపై చర్చతో పాటు.. ఎన్నికల హామీల అమలుపై ప్రభుత్వం సమగ్రంగా వివరించే అవకాశం ఉంది. బీఆర్‌ఎస్‌, బీజేపీ చేస్తున్న విమర్శలకు కూడా సభా వేదికగానే సమాధానం ఇవ్వాలని ప్రభుత్వం భావిస్తున్నట్లు సమాచారం. అయితే సమావేశాలను మరో రెండు రోజులు పొడిగించాలా? లేదా అన్నదానిపై తుది నిర్ణయం ఇంకా వెలువడలేదు. ప్రభుత్వ నిర్ణయం తర్వాత అసెంబ్లీ సమావేశాలు ఎన్ని రోజులు కొనసాగుతాయన్న దానిపై పూర్తి స్పష్టత రానుంది.