‘కొండా సురేఖను మంత్రిగా తప్పించాలి’

తెలంగాణ కాంగ్రెస్‌లో అంతర్గత రాజకీయం మరోసారి వేడెక్కింది. సీఎం రేవంత్‌రెడ్డిపై సొంత పార్టీ నేతల నుంచి వస్తున్న విమర్శలు కొత్త వివాదానికి దారితీశాయి. ముఖ్యంగా మంత్రి కొండా సురేఖ కుమార్తె కొండా సుస్మిత వ్యాఖ్యలపై ప్రభుత్వ విప్‌లు తీవ్రంగా స్పందించారు. కొండా సురేఖను మంత్రివర్గం నుంచి తప్పించాలని డిమాండ్ చేశారు. సీఎల్పీలో ప్రభుత్వ విప్‌లు బల్మూరి వెంకట్‌, బీర్ల అయిలయ్య, వేముల వీరేశం మీడియాతో మాట్లాడారు. సుస్మిత చేసిన వ్యాఖ్యలు పార్టీ క్రమశిక్షణకు విరుద్ధమని వారు అన్నారు.

సుస్మిత వ్యాఖ్యలను మంత్రి కొండా సురేఖ ఖండించాలని విప్‌లు డిమాండ్ చేశారు. ప్రభుత్వానికి మద్దతుగా నిలవాలని కోరారు. సుస్మిత వ్యాఖ్యలతో తనకు సంబంధం లేదని చెబుతున్నప్పుడు.. వాటిని మంత్రి ఎందుకు ఖండించలేదని ప్రశ్నించారు. సీఎం రేవంత్‌రెడ్డిపై ఎవరైనా తప్పుడు ఆరోపణలు చేస్తే కఠిన చర్యలు తీసుకోవాలని పీసీసీ అధ్యక్షుడు, కాంగ్రెస్ అధిష్ఠానాన్ని కోరుతున్నట్లు తెలిపారు. సీఎం నిర్ణయాలను వ్యతిరేకించే వారికి పార్టీలో చోటు ఉండకూడదని వ్యాఖ్యానించారు.

ఇలాంటి పరిస్థితుల్లో సంబంధిత వ్యక్తులను కేబినెట్‌లో కొనసాగించవద్దని సీఎం రేవంత్‌రెడ్డిని కోరుతున్నట్లు విప్‌లు తెలిపారు. పార్టీ అంతర్గత విషయాలను పార్టీ వేదికపైనే చర్చించుకోవాలని సూచించారు. కానీ కొండా సురేఖ కుటుంబం పదేపదే బహిరంగంగా విమర్శలు చేయడం సరికాదని అన్నారు. సీనియర్ ఎమ్మెల్యేపై అభ్యంతరకర వ్యాఖ్యలు చేస్తే చూస్తూ ఊరుకోబోమని హెచ్చరించారు. చివరగా సీఎం రేవంత్‌రెడ్డికి మంత్రి కొండా సురేఖ బహిరంగంగా క్షమాపణ చెప్పాలని డిమాండ్ చేశారు.

ఇదే సమయంలో తెలంగాణలో 22A భూముల వ్యవహారంపైనా బల్మూరి వెంకట్ స్పందించారు. ఈ అంశంపై బీఆర్‌ఎస్ అసత్య ప్రచారం చేస్తోందని ఆరోపించారు. అధికారుల తప్పిదాలను ప్రభుత్వం సరిదిద్దుతోందని చెప్పారు. పేదలకు అంతర్జాతీయ ప్రమాణాలతో విద్య అందకూడదనే ఉద్దేశంతో బీజేపీ, బీఆర్‌ఎస్ కలిసి కుట్ర చేస్తున్నాయని వెంకట్ ఆరోపించారు. సీఎం రేవంత్‌రెడ్డి అమెరికా పర్యటన రద్దు వెనుక కూడా ఆ రెండు పార్టీల కుట్ర ఉందని ఆరోపించారు.

బీఆర్‌ఎస్ చేసిన తప్పులను సరిదిద్దుతూ ప్రభుత్వం సంక్షేమ కార్యక్రమాలను అమలు చేస్తోందని తెలిపారు. అయితే సొంత పార్టీలో ఉంటూ ప్రభుత్వంపై విమర్శలు చేయడాన్ని ఖండిస్తున్నామని స్పష్టం చేశారు. ఈ పరిణామాలతో తెలంగాణ కాంగ్రెస్‌లో అంతర్గత విభేదాలు మరోసారి బహిరంగ చర్చకు వచ్చాయి. తాజా వివాదంపై పార్టీ అధిష్ఠానం, సంబంధిత నేతల నుంచి తదుపరి స్పందన ఎలా ఉంటుందన్నది ఇప్పుడు కీలకంగా మారింది.