తెలంగాణలో ఒకవైపు మండే ఎండలు..మరో వైపు చిరు జల్లుల జోరు

మండే ఎండలు, తీవ్ర వడగాలులతో అల్లాడుతున్న తెలంగాణ ప్రజలకు భారత వాతావరణ శాఖ కాస్త ఊరట కలిగించే వార్త చెప్పింది. రాష్ట్రంలోని పలు జిల్లాల్లో ఆదివారం నుంచి మే 30వతేదీ వరకు రాబోయే ఏడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉందని ఐఎండీ వెల్లడించింది. అయితే మరోవైపు పలు జిల్లాల్లో తీవ్ర వడగాలులు కొనసాగనున్నందున ప్రజలు అప్రమత్తంగా ఉండాలని హెచ్చరించింది.

ఉరుములతో కూడిన వర్షాలు

రాబోయే రోజుల్లో తెలంగాణలో వర్షాలు, వడగాలులు ఒకేసారి ప్రభావం చూపనున్న నేపథ్యంలో ప్రజలు వాతావరణ శాఖ హెచ్చరికలను పాటించడం అవసరం. ముఖ్యంగా మధ్యాహ్నం వేళల్లో బయటకు వెళ్లడాన్ని తగ్గించుకోవడంతో పాటు, ఉరుములు-మెరుపులు సంభవించే సమయంలో సురక్షిత ప్రాంతాల్లో ఉండాలని అధికారులు సూచిస్తున్నారు. వర్షాలు కురిసినా వేడి పూర్తిగా తగ్గే అవకాశం లేకపోవడంతో ప్రజలు తగిన జాగ్రత్తలు తీసుకోవాలని వాతావరణశాఖ సూచిస్తుంది.