తెలంగాణలో SIR ప్రక్రియ పూర్తి.. కోటి ఓట్లు డేంజర్‌లో?

ర‌చ్చ‌ - రాజ‌కీయం @ 5 పి.ఎం.

1) తెలంగాణలో SIR ప్రక్రియ పూర్తి.. కోటి ఓట్లు డేంజర్‌లో?

2) పేద పిల్లల గుండెకు ఊపిరి.. నిమ్స్‌లో ఉచిత ఆపరేషన్లు

3) పంజాగుట్ట శ్మశానవాటికలో పసికందు మృతదేహం మాయం..

1) పేద పిల్లల గుండెకు ఊపిరి.. నిమ్స్‌లో ఉచిత ఆపరేషన్లు

పుట్టిన బిడ్డ నవ్వు చూడాలని ప్రతి తల్లితండ్రి కోరుకుంటారు. కానీ అదే బిడ్డ పుట్టుకతోనే గుండె సమస్యతో బాధపడితే.. ఆ కుటుంబం పరిస్థితి ఎలా ఉంటుంది? గుండెలో రంధ్రం.. కవాటాల్లో లోపం.. రక్త ప్రసరణలో సమస్య.. శరీరానికి సరిపడా ఆక్సిజన్ అందకపోవడం.. ఇలాంటి పుట్టుకతో వచ్చే గుండె లోపాలు చిన్నారుల జీవితాన్నే ప్రభావితం చేస్తాయి. కొన్ని సమస్యలకు మందులతో చికిత్స సాధ్యమవుతుంది. కానీ కొన్ని తీవ్రమైన లోపాలకు మాత్రం శస్త్రచికిత్స తప్పనిసరి.

ఇక్కడే అసలు సమస్య మొదలవుతుంది. చిన్నారి ప్రాణాలను కాపాడేందుకు ఆపరేషన్ అవసరం. కానీ ఆ ఆపరేషన్ ఖర్చు పేద కుటుంబానికి అందనంత దూరంలో ఉంటుంది. ప్రైవేట్ ఆసుపత్రుల్లో పీడియాట్రిక్ కార్డియాక్ చికిత్స ఖరీదైనదిగా మారడంతో.. ఆర్థిక స్థోమత లేని కుటుంబాలు ప్రభుత్వ ఆసుపత్రులు, ఆరోగ్య పథకాలపై ఆధారపడాల్సి వస్తోంది. అలాంటి కుటుంబాలకు ఇప్పుడు నిమ్స్ ఒక పెద్ద ఆశాకిరణంగా మారుతోంది.

పుట్టుకతో వచ్చే గుండె లోపాలను వైద్య పరిభాషలో కాంజెనిటల్ హార్ట్ డిసీజ్ – CHD అంటారు. ఇవి పిల్లల్లో కనిపించే ముఖ్యమైన జన్యు/పుట్టుకతో వచ్చే లోపాల్లో ఒకటి. ప్రపంచవ్యాప్తంగా ప్రతి వంద జననాల్లో సుమారు ఒక శిశువుకు ఏదో ఒక రకమైన కాంజెనిటల్ హార్ట్ డిఫెక్ట్ ఉండొచ్చని వైద్య పరిశోధనలు సూచిస్తున్నాయి.

తెలంగాణలో ఏటా వేలాది మంది చిన్నారులు పుట్టుకతో గుండె లోపాలతో జన్మిస్తున్నారని వైద్య వర్గాల అంచనాలు చెబుతున్నాయి. అందులో ప్రతి ఒక్కరికీ ఆపరేషన్ అవసరం ఉండదు. కొంతమందికి రెగ్యులర్ ఫాలోఅప్ సరిపోతుంది. మరికొందరికి మందులు లేదా క్యాథెటర్ ఆధారిత చికిత్స అవసరం కావచ్చు. కానీ తీవ్రమైన లోపాలతో పుట్టిన పిల్లలకు మాత్రం సమయానికి శస్త్రచికిత్స చేయకపోతే ప్రాణాపాయం కూడా ఉంటుంది. అందుకే ఇక్కడ సంఖ్య కంటే ముఖ్యమైన విషయం.. సమయానికి చికిత్స అందడం. ఒక చిన్నారి గుండె సమస్యను గుర్తించిన తర్వాత.. ఆపరేషన్ అవసరమని వైద్యులు చెప్పినప్పుడు.. ఆ కుటుంబానికి డబ్బు లేకపోతే.. చికిత్స ఆలస్యం అయ్యే ప్రమాదం ఉంటుంది. ఈ గ్యాప్‌ను ప్రభుత్వ వైద్య వ్యవస్థ ఎంతవరకు భర్తీ చేస్తుందన్నదే అసలు ప్రశ్న.

చిన్నారుల్లో పుట్టుకతో వచ్చే గుండె సమస్యలు ఒక్క రకంగా ఉండవు. గుండెలోని గదుల మధ్య రంధ్రాలు ఉండటం. గుండె కవాటాలు సరిగా పనిచేయకపోవడం. గుండె నుంచి రక్తం బయటకు వెళ్లే మార్గంలో అడ్డంకులు ఉండటం. గుండెకు వెళ్లే లేదా గుండె నుంచి వచ్చే రక్తనాళాల్లో లోపాలు ఉండటం. ఇలా అనేక రకాల సమస్యలు ఉంటాయి. కొన్ని సమస్యలను పుట్టిన వెంటనే గుర్తించవచ్చు. మరికొన్ని పిల్లలు పెరుగుతున్న కొద్దీ బయటపడతాయి.

పిల్లల్లో తరచుగా కనిపించే లక్షణాల్లో..తరచూ శ్వాస తీసుకోవడంలో ఇబ్బంది..పాలు తాగేటప్పుడు త్వరగా అలసిపోవడం.. బరువు పెరగకపోవడం.. చర్మం లేదా పెదవులు నీలిరంగులోకి మారడం..తరచూ ఇన్ఫెక్షన్లు రావడం..వంటివి ఉండవచ్చు.

అయితే ఈ లక్షణాలన్నీ గుండె సమస్యకే సంకేతాలని అనుకోవడం సరికాదు. అందుకే అనుమానం వచ్చినప్పుడు పిల్లల వైద్యుడు లేదా పీడియాట్రిక్ కార్డియాలజిస్ట్‌ను సంప్రదించి అవసరమైన పరీక్షలు చేయించుకోవాలి. ఇప్పుడు ఈ సమస్యతో బాధపడుతున్న పేద కుటుంబాలకు కీలకమైన అవకాశం వచ్చింది. హైదరాబాద్‌లోని నిమ్స్‌లో ఆగస్టు 13 నుంచి చిన్నారులకు ఉచిత గుండె శస్త్రచికిత్సలు నిర్వహించనున్నారు. పుట్టుకతో గుండె సమస్యలున్న పిల్లలను ముందుగా పరీక్షిస్తారు.అవసరమైన వారికి తదుపరి చికిత్స, శస్త్రచికిత్సపై వైద్యులు నిర్ణయం తీసుకుంటారు.

ఈ కార్యక్రమంలో లండన్‌కు చెందిన పీడియాట్రిక్ కార్డియాక్ సర్జన్ డాక్టర్ రమణ దన్నపనేని నేతృత్వంలోని నిపుణుల బృందం పాల్గొంటుందని తాజా సమాచారం చెబుతోంది.అంటే.. ఒకవైపు నిమ్స్‌లో ఉన్న వైద్య నైపుణ్యం.. మరోవైపు విదేశాల నుంచి వచ్చే నిపుణుల అనుభవం..ఇవి రెండూ కలిసే ప్రయత్నం.

గతంలో కూడా నిమ్స్‌లో UK వైద్య నిపుణులతో కలిసి చిన్నారులకు ఉచిత గుండె శస్త్రచికిత్సల క్యాంపులు నిర్వహించారు. అవసరమైన పిల్లలను స్క్రీనింగ్ చేసి, చికిత్సకు ఎంపిక చేసిన సందర్భాల్లో ఆరోగ్యశ్రీ ద్వారా ఉచితంగా శస్త్రచికిత్సలు అందించారు.

గుండె ఆపరేషన్‌తో సమస్య పూర్తిగా ముగిసిపోదు. ఆపరేషన్ తర్వాత ICU కేర్.. మందులు.. ఫాలోఅప్ పరీక్షలు..ఎకో పరీక్షలు.. పోషకాహారం.. డాక్టర్ సూచనలు.. ఇవన్నీ కూడా చాలా ముఖ్యం. ముఖ్యంగా చిన్నారుల్లో గుండె శస్త్రచికిత్సలు అత్యంత ప్రత్యేకమైన వైద్య నైపుణ్యం, పీడియాట్రిక్ కార్డియాలజీ, కార్డియాక్ సర్జరీ, అనస్థీషియా, ICU వంటి అనేక విభాగాల సమన్వయంతో జరుగుతాయి. నిమ్స్‌లో ఇప్పటికే ప్రత్యేకమైన పీడియాట్రిక్ కార్డియాక్ ICU ఏర్పాటు చేసి సేవలు అందిస్తున్నారు.

ఇలాంటి కార్యక్రమాలు కేవలం ఉచిత ఆపరేషన్ వరకే పరిమితం కాకుండా.. స్క్రీనింగ్ నుంచి ఆపరేషన్.. ఆ తర్వాత ఫాలోఅప్ వరకు పూర్తి చికిత్సా వ్యవస్థను బలోపేతం చేయాలి.గుండె సమస్యతో పుట్టడం ఆ చిన్నారి తప్పు కాదు. డబ్బు లేకపోవడం వల్ల చికిత్స దూరం కావడం మాత్రం ఆ చిన్నారి భవిష్యత్తును నిర్ణయించకూడదు. ఆ చిన్న గుండెకు.. చికిత్స అందాలి. అవకాశం రావాలి. ఆశ ఉండాలి.అందుకే.. పేద పిల్లల గుండెకు నిమ్స్ ఇప్పుడు ఒక కొత్త ఊపిరిలా మారాలి.

2) పంజాగుట్ట శ్మశానవాటికలో పసికందు మృతదేహం మాయం..

హైదరాబాద్‌లోని పంజాగుట్ట హిందూ శ్మశానవాటికలో కలకలం రేపిన ఘటన ఇది. ఆరు నెలల పసికందు మృతదేహాన్ని కుటుంబ సభ్యులు అంత్యక్రియలు నిర్వహించి ఖననం చేశారు. కానీ.. రెండో కవల శిశువు అంత్యక్రియల కోసం అదే ప్రదేశానికి వెళ్లిన కుటుంబ సభ్యులకు ఊహించని దృశ్యం కనిపించింది. మొదటి చిన్నారిని పూడ్చిన ప్రదేశం ధ్వంసమై ఉంది. గుంత తీసిన ఆనవాళ్లు కనిపించాయి. కానీ.. అందులో ఉండాల్సిన పసికందు మృతదేహం మాత్రం కనిపించలేదు. దీంతో తీవ్ర ఆందోళనకు గురైన కుటుంబ సభ్యులు వెంటనే పోలీసులను ఆశ్రయించారు. అసలు పూడ్చిన మృతదేహం ఎలా మాయమైంది? ఎవరు తీసుకెళ్లారు? ఎందుకు తీసుకెళ్లారు? ఈ ప్రశ్నల చుట్టూనే ఇప్పుడు పోలీసుల దర్యాప్తు కొనసాగుతోంది.

ఈ ఘటన వెనుక ఉన్న కుటుంబ విషాదం కూడా తీవ్రంగా కలచివేస్తోంది. చార్మినార్ పరిధిలోని ఘాన్సీబజార్‌కు చెందిన దంపతులకు నెలలు నిండకుండానే కవల పిల్లలు జన్మించారు. పుట్టినప్పటి నుంచే ఇద్దరు చిన్నారులకు అనారోగ్య సమస్యలు ఉండటంతో హైదరాబాద్‌లోని బంజారాహిల్స్‌లో ఉన్న ఓ కార్పొరేట్ ఆసుపత్రిలో చికిత్స అందించారు. అయితే పరిస్థితి విషమించడంతో మొదటి శిశువు శనివారం మృతి చెందింది. దీంతో కుటుంబ సభ్యులు తీవ్ర విషాదంలో మునిగిపోయారు. మృతదేహాన్ని తీసుకొచ్చి పంజాగుట్ట హిందూ శ్మశానవాటికలో ఖననం చేశారు.

అయితే ఆ విషాదం నుంచి కుటుంబం కోలుకోకముందే మరో విషాదం చోటుచేసుకుంది. మొదటి శిశువు మరణించిన మరుసటి రోజే.. రెండో కవల శిశువు కూడా అనారోగ్యంతో చికిత్స పొందుతూ కన్నుమూసింది. దీంతో ఇద్దరు పిల్లలను కోల్పోయిన కుటుంబం మరింత విషాదంలో మునిగిపోయింది.రెండో చిన్నారి మృతదేహాన్ని కూడా మొదటి శిశువును ఖననం చేసిన ప్రదేశంలోనే పూడ్చాలని కుటుంబ సభ్యులు నిర్ణయించారు. సోమవారం శ్మశానవాటికకు వెళ్లారు. కానీ అక్కడ వారికి ఊహించని పరిస్థితి ఎదురైంది. మొదటి చిన్నారిని ఖననం చేసిన ప్రదేశం ధ్వంసమై కనిపించింది. మట్టిని తొలగించినట్లు.. గుంత తీసినట్లు ఆనవాళ్లు కనిపించాయి. అందులో ఉండాల్సిన మృతదేహం మాత్రం కనిపించలేదు. దీంతో కుటుంబ సభ్యులు తీవ్ర భయాందోళనకు గురయ్యారు.

ఇది సాధారణంగా మట్టి కదిలిన ఘటన కాదని భావించి.. శ్మశానవాటిక సిబ్బందిని ప్రశ్నించారు. అయితే తమకు సరైన సమాధానం లభించలేదని కుటుంబ సభ్యులు ఆరోపించారు. దీంతో చివరకు పోలీసులను ఆశ్రయించారు. కుటుంబ సభ్యుల ఫిర్యాదుతో బంజారాహిల్స్ పోలీసులు రంగంలోకి దిగారు. శ్మశానవాటిక సిబ్బందిని విచారించిన పోలీసులు.. కొందరిని అదుపులోకి తీసుకున్నట్లు సమాచారం. అసలు మృతదేహాన్ని ఎవరు బయటకు తీశారు? ఎప్పుడు తీశారు? ఎందుకు తీశారు? దానికి సంబంధించి శ్మశానవాటిక సిబ్బందికి ఏమైనా సమాచారం ఉందా? లేదా బయటి వ్యక్తులు రాత్రి సమయంలో అక్కడికి వచ్చారా? అనే కోణాల్లో పోలీసులు దర్యాప్తు చేస్తున్నారు.

మరోవైపు.. మూఢనమ్మకాలు లేదా ఇతర కారణాలతో మృతదేహాన్ని బయటకు తీసి ఉండొచ్చా అనే కోణాన్ని కూడా పోలీసులు పరిశీలిస్తున్నారు. అయితే దర్యాప్తు పూర్తయ్యే వరకు అసలు కారణంపై స్పష్టత వచ్చే అవకాశం లేదు.ఈ ఘటనతో పంజాగుట్ట శ్మశానవాటికలో భద్రతా ఏర్పాట్లపై కూడా ప్రశ్నలు తలెత్తుతున్నాయి. మృతదేహాలను ఖననం చేసిన ప్రాంతంలోకి అనుమతి లేకుండా ఎవరైనా వెళ్లే అవకాశం ఉందా? రాత్రి వేళల్లో అక్కడ భద్రత ఎలా ఉంటుంది? సీసీ కెమెరాలు పనిచేస్తున్నాయా? శ్మశానవాటికలోకి వచ్చే, వెళ్లే వ్యక్తుల వివరాలు నమోదు చేస్తున్నారా? అనే ప్రశ్నలకు సమాధానాలు రావాల్సి ఉంది.

ముఖ్యంగా.. ఇద్దరు చిన్నారులను కోల్పోయిన కుటుంబానికి ఇది ఇప్పటికే తీరని విషాదం. అలాంటి సమయంలో మొదటి చిన్నారి మృతదేహం కూడా కనిపించకపోవడం కుటుంబ సభ్యులకు మరింత వేదన కలిగించే విషయం. ఇప్పుడు పోలీసుల దర్యాప్తులో అసలు నిజం బయటపడాల్సి ఉంది. మృతదేహాన్ని ఎవరు బయటకు తీశారు? ఎందుకు తీశారు? ఈ ఘటన వెనుక మూఢనమ్మకాలున్నాయా? లేదా మరేదైనా కారణమా? ఈ ప్రశ్నలన్నింటికీ పోలీసుల దర్యాప్తే సమాధానం చెప్పాలి. పసికందు మృతదేహం మాయం ఘటనలో నిజం వెలుగులోకి రావడంతోపాటు.. భవిష్యత్తులో ఇలాంటి ఘటనలు పునరావృతం కాకుండా శ్మశానవాటికల భద్రతపై కూడా అధికారులు దృష్టి పెట్టాల్సిన అవసరం ఉంది.

3) తెలంగాణలో SIR ప్రక్రియ పూర్తి.. కోటికి పైగా ఓట్లు ఔట్ అవుతాయా?

తెలంగాణలో ఓటర్ల జాబితా ప్రత్యేక సమగ్ర సవరణ.. అంటే SIR ప్రక్రియలో కీలక దశ పూర్తయింది. ఎన్యూమరేషన్ ఫారాల స్వీకరణ, వాటి డిజిటలైజేషన్ ప్రక్రియ ఆగస్టు 10తో ముగిసింది. రాష్ట్రంలో మొత్తం 3.38 కోట్లకు పైగా ఓటర్లు ఉండగా.. దాదాపు 2.64 కోట్ల మంది ఓటర్లకు సంబంధించిన ఎన్యూమరేషన్ ఫారాల డిజిటలైజేషన్ పూర్తయింది. అంటే సుమారు 78.26 శాతం ప్రక్రియ పూర్తయినట్లు ఎన్నికల అధికారులు వెల్లడించారు. అయితే.. మిగిలిన దాదాపు 74 లక్షల మంది ఓటర్లకు సంబంధించిన ఫారాలు డిజిటైజ్ కాలేదు. ఇదే ఇప్పుడు పెద్ద చర్చకు కారణమవుతోంది.

ఎందుకంటే.. ఈ ఓటర్లలో కొంతమంది స్థానిక చిరునామాలో లేకపోవడం, వలస వెళ్లడం, మరణించడం, ఒకటి కంటే ఎక్కువ చోట్ల ఓటు కలిగి ఉండటం వంటి కారణాలతో జాబితా నుంచి తొలగించే ప్రక్రియలో ఉండొచ్చు. కానీ ఇక్కడ ఒక విషయాన్ని స్పష్టంగా గుర్తుంచుకోవాలి. ఫారం డిజిటైజ్ కాలేదంటే ఓటు వెంటనే తొలగిపోయినట్లు కాదు. తదుపరి దశల్లో క్లెయిమ్స్, అభ్యంతరాలు, నోటీసుల ప్రక్రియ ఉంటుంది.SIR ప్రక్రియలో సుమారు 73.5 లక్షల ఓటర్ల ఎన్యూమరేషన్ ఫారాలు డిజిటైజ్ కాలేదని సమాచారం. ఈ సంఖ్య రాష్ట్ర మొత్తం ఓటర్లలో దాదాపు 21 నుంచి 22 శాతానికి సమానం. దీంతో.. “ఈ 73 లక్షల ఓట్లు ఇక ఉండవా?” అనే చర్చ మొదలైంది.

కానీ వాస్తవ పరిస్థితి అంత సింపుల్ కాదు. ఫారం అందకపోవడానికి అనేక కారణాలు ఉండొచ్చు. ఓటరు ఇంట్లో లేకపోవచ్చు. వేరే ప్రాంతానికి తాత్కాలికంగా వెళ్లి ఉండొచ్చు. శాశ్వతంగా వలస వెళ్లి ఉండొచ్చు. ఓటరు మరణించి ఉండొచ్చు. లేదా ఒకే వ్యక్తికి వేర్వేరు ప్రాంతాల్లో ఓట్లు ఉండొచ్చు. ఇలాంటి సందర్భాల్లో ఓటర్లను గుర్తించి.. జాబితాను శుద్ధి చేయడం SIRలో ప్రధాన ఉద్దేశం. అందుకే ప్రస్తుతం కనిపిస్తున్న సంఖ్యలను “తొలగించిన ఓట్లు”గా కాకుండా.. పరిశీలనలో ఉన్న ఓట్లుగా చూడాలి.

ఇక్కడ మరో కీలకమైన అంశం ఉంది. ఎన్యూమరేషన్ ఫారాల డిజిటైజేషన్‌తో పాటు.. ఓటర్ల వివరాల్లో తేడాలు ఉన్నట్లు గుర్తించిన అనామలీస్ జాబితా కూడా ఉంది. ఈ జాబితాలో దాదాపు 61 లక్షల మంది ఓటర్లు ఉన్నట్లు సమాచారం. పేరు, వయసు, చిరునామా, ఇతర వివరాల్లో వ్యత్యాసాలు ఉండటం వంటి కారణాలతో వీటిని పరిశీలనకు తీసుకుంటారు. అంటే.. ఈ 61 లక్షల ఓట్లన్నీ కూడా తొలగిపోతాయని ఇప్పుడే చెప్పలేం. అధికారులు వివరాలను పరిశీలించాలి. అవసరమైతే ఓటర్లకు నోటీసులు ఇవ్వాలి. వారి నుంచి క్లెయిమ్స్, అభ్యంతరాలు స్వీకరించాలి. ఆ తర్వాతే తుది నిర్ణయం తీసుకుంటారు. దీనికి తోడు 2002 నాటి ఓటర్ల జాబితాతో మ్యాపింగ్ కాని ఓట్లు కూడా ఉన్నాయి. వీటిపై కూడా తదుపరి దశలో పరిశీలన జరగనుంది.

అందుకే.. 73 లక్షలు + 61 లక్షలు + అన్‌మ్యాప్డ్ ఓట్లు = కోటికి పైగా ఓట్లు వెంటనే తొలగిపోతాయి అని చెప్పడం సరైన అర్థం కాదు. ఈ సంఖ్యలన్నీ వేర్వేరు కేటగిరీలకు చెందినవి.SIR ప్రభావం ఎక్కువగా కనిపిస్తున్న ప్రాంతం గ్రేటర్ హైదరాబాద్ పరిధి. హైదరాబాద్, మేడ్చల్–మల్కాజ్‌గిరి, రంగారెడ్డి జిల్లాల్లో కలిపి దాదాపు 1.14 కోట్ల మంది ఓటర్లు ఉన్నారు. వీరిలో సుమారు 71.05 లక్షల మంది మాత్రమే ఎన్యూమరేషన్ ఫారాలను సమర్పించినట్లు సమాచారం. దీంతో దాదాపు 43 లక్షల మంది ఓటర్ల ఫారాలు అందలేదనే పరిస్థితి కనిపిస్తోంది. ఇదే ఇప్పుడు ప్రధాన చర్చగా మారింది.

ఎందుకంటే హైదరాబాద్ నగరంలో భారీగా వలసలు ఉంటాయి. ఉద్యోగాలు, విద్య, వ్యాపారం కోసం నగరానికి వచ్చిన వారు..కొంతకాలం తర్వాత తమ స్వస్థలాలకు వెళ్లిపోతుంటారు.అలాగే ఒకే వ్యక్తి ఒకటి కంటే ఎక్కువ ప్రాంతాల్లో ఓటు నమోదు చేసుకున్న సందర్భాలు కూడా ఉండొచ్చు. ఇలాంటి డూప్లికేట్, శాశ్వతంగా వలస వెళ్లిన, మరణించిన ఓటర్లను తొలగించడం ఓటర్ల జాబితా శుద్ధిలో సాధారణ ప్రక్రియ. కానీ..నిజంగా హైదరాబాద్‌లోనే నివసిస్తున్న ఓటరు పొరపాటున జాబితా నుంచి తొలగిపోకుండా చూడటం కూడా అంతే ముఖ్యం.

SIR ఎన్యూమరేషన్ ఫారాల డిజిటైజేషన్‌లో జిల్లాల మధ్య కూడా భారీ తేడాలు కనిపిస్తున్నాయి. యాదాద్రి భువనగిరి జిల్లా అత్యధికంగా ముందుంది. అక్కడ సుమారు 94.31 శాతం ఎన్యూమరేషన్ ఫారాల డిజిటైజేషన్ పూర్తయినట్లు సమాచారం. అదే సమయంలో హైదరాబాద్ చివరి స్థానంలో ఉంది. హైదరాబాద్‌లో కేవలం 58.89 శాతం ఫారాల డిజిటైజేషన్ మాత్రమే పూర్తయింది. దీంతో హైదరాబాద్‌లో మిగిలిపోయిన ఓటర్లపై ప్రత్యేక దృష్టి అవసరమవుతోంది.

ఎందుకంటే నగరంలో వలస జనాభా ఎక్కువగా ఉంటుంది. ఓటరు నిజంగా ప్రాంతం మారాడా? లేదా ఇంట్లో లేకపోవడంతో ఫారం అందలేదా? లేదా ఏదైనా సాంకేతిక, పరిపాలనా సమస్య కారణంగా ఫారం నమోదు కాలేదా? ఇవన్నీ పరిశీలించాల్సి ఉంటుంది. అందుకే తుది జాబితా వచ్చే వరకు పరిస్థితి పూర్తిగా మారే అవకాశం ఉంది.

ఇక SIRలో అసలు కీలకమైన దశ ఇప్పుడు మొదలుకాబోతోంది. ఎన్నికల సంఘం సవరించిన షెడ్యూల్ ప్రకారం ఆగస్టు 17న ముసాయిదా ఓటర్ల జాబితా విడుదల కానుంది. ఆ తర్వాత.. ఆగస్టు 17 నుంచి సెప్టెంబర్ 16 వరకు.. ఓటర్లు తమ పేర్లు, వివరాలను పరిశీలించుకోవచ్చు. ఏదైనా తప్పు ఉంటే క్లెయిమ్ లేదా అభ్యంతరం దాఖలు చేయవచ్చు. అదే సమయంలో ఆగస్టు 17 నుంచి అక్టోబర్ 15 వరకు నోటీసుల జారీ, అభ్యంతరాల పరిష్కార ప్రక్రియ కొనసాగుతుంది. ఆ తర్వాత అక్టోబర్ 19న తుది ఓటర్ల జాబితా ప్రచురించనున్నారు.

అంటే.. ఇప్పటివరకు కనిపిస్తున్న సంఖ్యలు ఫైనల్ కాదు. ముసాయిదా జాబితా వచ్చిన తర్వాతే అసలు పరిస్థితి మరింత స్పష్టమవుతుంది. క్లోజింగ్: ఓటు పోయిందా? ఇంకా అవకాశం ఉంది! కాబట్టి తెలంగాణలో SIR ప్రక్రియ పూర్తయిందనే వార్తతో.. కోటికి పైగా ఓట్లు ఇప్పటికే తొలగిపోయాయని భావించాల్సిన అవసరం లేదు. 73 లక్షల డిజిటైజ్ కాని ఫారాలు..61 లక్షల అనామలీస్..2002 జాబితాతో మ్యాపింగ్ కాని ఓట్లు..ఇవన్నీ వేర్వేరు దశల్లో పరిశీలించాల్సిన కేటగిరీలు.ఇప్పుడు అత్యంత కీలకమైనది..ఆగస్టు 17న విడుదలయ్యే ముసాయిదా ఓటర్ల జాబితా.

ప్రతి ఓటరూ తమ పేరు ఉందో లేదో చెక్ చేసుకోవాలి.పేరు లేకపోతే..తప్పులు ఉంటే..నిర్దేశిత గడువులో క్లెయిమ్ లేదా అభ్యంతరం దాఖలు చేయాలి.ఎందుకంటే..ఓటర్ల జాబితా శుద్ధి ఎంత ముఖ్యమో.. అర్హుడైన ఒక్క ఓటరు కూడా జాబితా నుంచి బయటకు వెళ్లకుండా చూడటం అంతే ముఖ్యం. అసలు ఎంతమంది ఓట్లు తొలగుతాయి? ఎంతమంది తమ ఓటును తిరిగి నిరూపించుకుంటారు?హైదరాబాద్‌లో 43 లక్షల ఓట్ల పరిస్థితి ఏమిటి? దీనికి తుది సమాధానం.. అక్టోబర్ 19న వచ్చే ఫైనల్ ఓటర్ల జాబితాతోనే తేలనుంది.