కరీఫ్‌కు కసరత్తులు.. విత్తనాలపై తుమ్మల ఆదేశాలు

కరీఫ్ 2026 సీజన్‌కు ముందే తెలంగాణ ప్రభుత్వం అప్రమత్తమైంది. విత్తనాల లభ్యత, నాణ్యతపై వ్యవసాయ మంత్రి తుమ్మల నాగేశ్వరరావు కీలక ఆదేశాలు జారీ చేశారు. సచివాలయంలో జరిగిన సమీక్షలో అధికారులు, సీడ్ కార్పొరేషన్, విత్తన కంపెనీలతో కలిసి ఆయన సమగ్రంగా చర్చించారు. ఈ సీజన్‌లో సుమారు 134.66 లక్షల ఎకరాల్లో సాగు జరుగుతుందని అంచనా. ఇందుకు 19.42 లక్షల క్వింటాళ్ల విత్తనాలు అవసరమవుతాయి.

ప్రస్తుతం రాష్ట్రంలో 38.21 లక్షల క్వింటాళ్ల విత్తనాలు అందుబాటులో ఉన్నాయని అధికారులు తెలిపారు. అవసరానికి దాదాపు రెండింతలు నిల్వలు ఉన్నాయని మంత్రి పేర్కొన్నారు. పత్తి పంట విషయంలో కూడా అధిక లభ్యత ఉందని వెల్లడైంది. 52 లక్షల ఎకరాల లక్ష్యానికి 104 లక్షల ప్యాకెట్లు అవసరమైతే, ప్రస్తుతం 212.11 లక్షల ప్యాకెట్లు సిద్ధంగా ఉన్నాయని చెప్పారు. గతంతో పోలిస్తే ఇది రైతులకు నమ్మకం పెంచుతుందని మంత్రి భావించారు.

నకిలీ విత్తనాలపై కఠిన చర్యలు

నకిలీ విత్తనాల విషయంలో ఎలాంటి రాజీ ఉండదని మంత్రి స్పష్టం చేశారు. వాటి తయారీ, రవాణా, అమ్మకాలపై కఠిన చర్యలు తీసుకోవాలని పోలీస్ శాఖతో సమన్వయం చేయాలని ఆదేశించారు. జీరో టాలరెన్స్ విధానం పాటించాలని చెప్పారు. జిల్లా నుంచి మండల స్థాయికి ప్రత్యేక టాస్క్ ఫోర్స్ బృందాలు ఏర్పాటు చేయాలని సూచించారు. రాష్ట్ర సరిహద్దుల్లో కఠిన నిఘా ఉంచి అక్రమ హెచ్‌టి పత్తి విత్తనాలు, లూజ్ సీడ్స్ రాకుండా అడ్డుకోవాలని ఆదేశించారు.

రైతులకు మంచి దిగుబడి వచ్చే నాణ్యమైన విత్తనాలే అందించాలని మంత్రి చెప్పారు. హైబ్రిడ్ విత్తనాల సరఫరాను రైతుల డిమాండ్‌కు అనుగుణంగా చేయాలని కంపెనీలకు సూచించారు. సీడ్ టెస్టింగ్ ల్యాబ్‌ల ద్వారా నాణ్యత తనిఖీలు కఠినంగా చేయాలని ఆదేశించారు. గతంలో నిబంధనలు ఉల్లంఘించిన కంపెనీల లైసెన్సులు రద్దు చేసిన విషయాన్ని గుర్తుచేశారు. ప్రతి నెల స్టాక్ వివరాలు ప్రభుత్వానికి సమర్పించాలని, స్వీయ ధృవీకరణ విత్తనాల వల్ల వచ్చే నష్టాలను కంపెనీలే భరించాలని తెలిపారు.

బ్రాండింగ్‌పై ఫోకస్

కో-మార్కెటింగ్‌లో ఉన్న లోపాలను మంత్రి గుర్తించారు. విత్తనాల గుర్తింపు, బ్రాండింగ్ స్పష్టంగా ఉండాలని చెప్పారు. రైతులను తప్పుదారి పట్టించే చర్యలను సహించబోమని హెచ్చరించారు. అవసరమైతే కో-మార్కెటింగ్‌ను నిషేధించే అంశాన్ని పరిశీలించాలని సూచించారు. GOT పరీక్షలో విఫలమైన పత్తి విత్తనాలను రైతులకు ఇవ్వకుండా నిలిపివేయాలని ఆదేశించారు. లైసెన్సింగ్ వ్యవస్థను మరింత బలపరచాలని చెప్పారు.

భూమి ఉర్వరత పెంచేందుకు గ్రీన్ మేన్యూర్ విత్తనాల పంపిణీకి ప్రత్యేక చర్యలు తీసుకుంటున్నారు. కరీఫ్ 2026లో 1.95 లక్షల క్వింటాళ్ల విత్తనాలు పంపిణీ చేయాలని, ఇందుకు రూ.134 కోట్లు ఖర్చు చేయాలని ప్రణాళిక రూపొందించారు.