మీరాలం చెరువులో వాటర్ స్పోర్ట్స్.. సీఎం రేవంత్ రెడ్డి కీలక ఆదేశాలు

ర‌చ్చ‌ - రాజ‌కీయం @ 5 పి.ఎం.

1) మీరాలం చెరువులో వాటర్ స్పోర్ట్స్.. సీఎం రేవంత్ రెడ్డి కీలక ఆదేశాలు

2) నగరంలో కొత్త ట్రెండ్.. 'హైబ్రిడ్ సైబర్ ఫ్రాడ్'! ఫోన్ దొంగతనం. ఆ తర్వాత బ్యాంక్ ఖాతా ఖాళీ!

3) పెద్దపల్లి నుంచి ప్రపంచానికి రాఖీలు.. పెద్దపల్లి మహిళల సక్సెస్ స్టోరీ!

1) మీరాలం చెరువులో వాటర్ స్పోర్ట్స్.. సీఎం రేవంత్ రెడ్డి కీలక ఆదేశాలు

తెలంగాణ ప్రభుత్వం హైదరాబాద్‌లోని చారిత్రక మీరాలం చెరువును అంతర్జాతీయ స్థాయి పర్యాటక ప్రాంతంగా మార్చేందుకు రూ. 430 కోట్ల బడ్జెట్‌తో భారీ అభివృద్ధి పనులను చేపట్టింది. మూసీ పునరుద్ధరణ ప్రాజెక్టులో భాగంగా జరుగుతున్న ఈ పనులను 2027 చివరి నాటికి పూర్తి చేయాలని లక్ష్యంగా పెట్టుకున్నారు. ఇందులో భాగంగా శాస్త్రిపురం నుంచి చింతలమెట్ రోడ్డును కలుపుతూ చెరువుపై 2.65 కి.మీ పొడవైన కేబుల్ బ్రిడ్జి నిర్మాణం, మురుగునీరు చేరకుండా ఎస్టీపీల ఏర్పాటు, వరద నీటి నిర్వహణ మరియు వాటర్ స్పోర్ట్స్, బోటింగ్ వంటి పర్యాటక సౌకర్యాల కల్పన వేగంగా సాగుతోంది. దుర్గం చెరువును మించేలా పాతబస్తీ ప్రాంతాన్ని ఒక ఐకానిక్ ల్యాండ్‌మార్క్‌గా మరియు ప్రధాన పర్యాటక హబ్‌గా తీర్చిదిద్దాలనే ఉద్దేశంతో ముఖ్యమంత్రి రేవంత్ రెడ్డి స్వయంగా ఈ ప్రాజెక్టుపై ప్రత్యేక ఆసక్తిని కనబరుస్తూ పనులను పర్యవేక్షిస్తున్నారు.

ముఖ్యమంత్రి రేవంత్ రెడ్డి, గురువారం ఉదయం మీరాలం చెరువును ఆకస్మికంగా సందర్శించారు. అక్కడ జరుగుతున్న అభివృద్ధి పనులను స్వయంగా పరిశీలించారు. అధికారులతో మాట్లాడి, పనుల పురోగతిపై వివరాలు అడిగి తెలుసుకున్నారు. కేవలం చెరువు అభివృద్ధి మాత్రమే కాదు, పర్యావరణ పరిరక్షణ, వరద నీటి నిర్వహణ, పర్యాటక అభివృద్ధి అన్నింటికీ ప్రాధాన్యం ఇవ్వాలని సీఎం సూచించారు.

మూసీ రివర్ ఫ్రంట్ డెవలప్‌మెంట్ కార్పొరేషన్ ఆధ్వర్యంలో మీరాలం చెరువు పరిసరాల్లో అభివృద్ధి పనులు కొనసాగుతున్నాయి. ఈ పనుల్లో ప్రధాన ఆకర్షణగా సస్పెన్షన్ బ్రిడ్జి నిర్మాణం చేపడుతున్నారు. సీఎం రేవంత్ రెడ్డి భారీ క్రేన్‌పై నుంచి చెరువు పరిసరాలను పరిశీలించారు. బ్రిడ్జి నిర్మాణ పనులతో పాటు చుట్టుపక్కల జరుగుతున్న మౌలిక వసతుల అభివృద్ధిని అధికారులను అడిగి తెలుసుకున్నారు. పనుల్లో నాణ్యత విషయంలో ఎలాంటి రాజీ ఉండకూడదని స్పష్టం చేశారు. నిర్ణయించిన గడువులోగా పనులు పూర్తి చేయాలని అధికారులను ఆదేశించారు.

సస్పెన్షన్ బ్రిడ్జి పూర్తయితే... మీరాలం చెరువుకు ప్రత్యేక ఆకర్షణ ఏర్పడే అవకాశం ఉంది. సాయంత్రం వేళల్లో నగర ప్రజలు, కుటుంబాలు, పర్యాటకులు సందర్శించే కొత్త స్పాట్‌గా ఈ ప్రాంతం మారే అవకాశం ఉందని భావిస్తున్నారు.మీరాలం చెరువును కేవలం నీటి నిల్వ ప్రాంతంగా మాత్రమే కాకుండా... ఒక వినోద, పర్యాటక కేంద్రంగా అభివృద్ధి చేయాలనే ఆలోచనతో ప్రభుత్వం ముందుకు వెళ్తోంది. చెరువులో వాటర్ స్పోర్ట్స్ నిర్వహించేందుకు ప్రత్యేక డిజైన్ రూపొందించాలని సీఎం అధికారులకు సూచించారు. అలాగే చెరువులో ఉన్న ఐలాండ్‌ను అభివృద్ధి చేయాలని కూడా ఆదేశించారు. ఐలాండ్‌ను పర్యాటకులను ఆకర్షించేలా తీర్చిదిద్దడం, చెరువు చుట్టూ అందమైన పబ్లిక్ స్పేస్‌లు ఏర్పాటు చేయడం, సందర్శకులకు అవసరమైన మౌలిక వసతులు కల్పించడం వంటి అంశాలపై అధికారులు ప్రణాళికలు సిద్ధం చేయనున్నారు.

వాటర్ స్పోర్ట్స్, సస్పెన్షన్ బ్రిడ్జి, ఐలాండ్ డెవలప్‌మెంట్ అన్నీ పూర్తయితే, మీరాలం చెరువు హైదరాబాద్‌లో మరో కీలక టూరిజం ఎంటర్‌టైన్‌మెంట్ డెస్టినేషన్‌గా మారే అవకాశం ఉంది.అయితే అభివృద్ధి అంటే కేవలం అందమైన నిర్మాణాలు మాత్రమే కాదని సీఎం స్పష్టం చేశారు. చెరువు పరిరక్షణకు కూడా అంతే ప్రాధాన్యం ఇవ్వాలని అధికారులకు సూచించారు. మీరాలం చెరువులోకి మురుగునీరు చేరకుండా పటిష్టమైన చర్యలు తీసుకోవాలని ఆదేశించారు.

చెరువు నీరు కలుషితం కాకుండా డ్రైనేజీ వ్యవస్థను మెరుగుపరచాల్సిన అవసరాన్ని ప్రస్తావించారు. మరోవైపు, భారీ వర్షాలు కురిసినప్పుడు చెరువులోకి వచ్చే వరద నీరు సాఫీగా బయటకు వెళ్లేలా చర్యలు తీసుకోవాలని సూచించారు. చెరువు నుంచి మూసీ నదిలోకి వరద నీరు వెళ్లే నాలాను విస్తరించాలని సీఎం ఆదేశించారు. వర్షాకాలంలో నీటి నిల్వలు పెరిగి ప్రజలకు ఇబ్బందులు కలగకుండా, ముందస్తు ప్రణాళికతో డ్రైనేజీ, వరద నీటి వ్యవస్థను అభివృద్ధి చేయాలని ప్రభుత్వం భావిస్తోంది.అంటే, ఒకవైపు టూరిజం అభివృద్ధి, మరోవైపు పర్యావరణ పరిరక్షణ, వరద నియంత్రణ. ఈ మూడు అంశాలను సమన్వయం చేస్తూ మీరాలం చెరువు రూపురేఖలను మార్చే ప్రయత్నం జరుగుతోంది.

సీఎం ఆకస్మిక తనిఖీతో మీరాలం చెరువు అభివృద్ధి పనులపై మరింత ఫోకస్ పెరిగింది. పనుల పురోగతి, నాణ్యత, గడువులు, భవిష్యత్ ప్రణాళికలపై అధికారులు ప్రత్యేక దృష్టి పెట్టే అవకాశం ఉంది.సస్పెన్షన్ బ్రిడ్జి...వాటర్ స్పోర్ట్స్...చెరువు మధ్యలో ఐలాండ్ డెవలప్‌మెంట్...అందమైన పరిసరాలు...ప్రజలకు పబ్లిక్ స్పేస్‌లు...ఈ ప్రణాళికలు అన్నీ అనుకున్న విధంగా పూర్తయితే... మీరాలం చెరువు హైదరాబాద్ మ్యాప్‌లో మరో ముఖ్యమైన పర్యాటక కేంద్రంగా చేరే అవకాశం ఉంది.

ఒకప్పుడు కేవలం చెరువుగా కనిపించిన ఈ ప్రాంతం, భవిష్యత్తులో కుటుంబాల విహారయాత్రలకు, యువతకు వినోదానికి, పర్యాటకులకు కొత్త అనుభూతికి వేదికగా మారవచ్చు. మొత్తానికి, మీరాలం చెరువు రూపురేఖలు మార్చేందుకు ప్రభుత్వం వేగంగా కసరత్తు చేస్తోంది. వాటర్ స్పోర్ట్స్ నుంచి ఐలాండ్ వరకు. సస్పెన్షన్ బ్రిడ్జి నుంచి పర్యావరణ పరిరక్షణ వరకు, మీరాలం చెరువు ఇప్పుడు హైదరాబాద్‌కు మరో కొత్త టూరిజం హబ్‌గా మారే దిశగా అడుగులు వేస్తోంది.

2) నగరంలో కొత్త ట్రెండ్.. 'హైబ్రిడ్ సైబర్ ఫ్రాడ్'!ఫోన్ దొంగతనం. ఆ తర్వాత బ్యాంక్ ఖాతా ఖాళీ!

జేబుదొంగతనం అంటే ఫోన్ లేదా పర్సు దొంగిలించడం అని మనకు తెలుసు. కానీ ఇప్పుడు దొంగల స్టైల్ మారిపోయింది. ముందుగా మీ ఫోన్ పిన్ లేదా ప్యాటర్న్‌ను గమనిస్తారు. ఆ తర్వాత ఫోన్‌ను దొంగిలిస్తారు. చివరకు అదే ఫోన్ ద్వారా మీ బ్యాంక్ ఖాతాను ఖాళీ చేస్తారు. ఈ కొత్త తరహా మోసాన్ని హైబ్రిడ్ సైబర్ ఫ్రాడ్ గా పోలీసులు చెబుతున్నారు. ఈ కొత్త ముఠాల పట్ల ప్రజలు అత్యంత అప్రమత్తంగా ఉండాలని హైదరాబాద్ సీపీ వీసీ సజ్జనార్ హెచ్చరించారు.ఈ ముఠాలు ముఖ్యంగా బస్టాండ్లు, రద్దీ బస్సులు, జనసంచారం ఎక్కువగా ఉండే ప్రాంతాలను టార్గెట్ చేస్తున్నాయి. మీరు ఫోన్ అన్‌లాక్ చేస్తున్నప్పుడు మీ పిన్ లేదా ప్యాటర్న్‌ను దొంగలు గమనిస్తారు. ఆ తర్వాత సరైన సమయంలో ఫోన్‌ను దొంగిలిస్తారు. ఒకవేళ ఫోన్ లాక్ తెలియకపోయినా, బాధితులను మోసం చేసి పాస్‌వర్డ్ తెలుసుకునే ప్రయత్నం చేస్తున్నారు.

ఫోన్ దొరికిందని చెప్పి కాల్ చేయడం, లేదా 'ఫోన్ ఇచ్చేస్తాం' అంటూ నమ్మించడం 'ఓనర్ వెరిఫికేషన్' పేరుతో వివరాలు అడగడం వంటి మాయమాటలు చెబుతున్నారు. ఈ సమయంలో పొరపాటున కూడా మీ స్క్రీన్ లాక్ పిన్ లేదా పాస్‌వర్డ్ చెప్పకూడదు.ఫోన్ దొరికిన తర్వాత దొంగలు ముందుగా అందులో ఉన్న వ్యక్తిగత వివరాలను పరిశీలిస్తారు. గ్యాలరీ, నోట్స్ యాప్‌లలో బ్యాంక్ కార్డులు, ఆధార్, పాన్ వంటి వివరాలు ఉన్నాయా అని చూస్తారు. ఆ తర్వాత ఫోన్‌లో ఉన్న సిమ్ ద్వారా వచ్చే ఓటీపీలను ఉపయోగించి, బ్యాంకింగ్, యూపీఐ ఖాతాల పాస్‌వర్డ్‌లను మార్చే ప్రయత్నం చేస్తారు.

తర్వాత డబ్బును ఇతర ఖాతాలకు బదిలీ చేస్తారు. అంటే ఫోన్ దొంగతనం ఒక దశ మాత్రమే. అసలు లక్ష్యం మీ బ్యాంక్ ఖాతాలోని డబ్బు. ఈ కేసుల్లో ముఖ్యంగా సీనియర్ సిటిజన్లు, సాంకేతిక పరిజ్ఞానం తక్కువగా ఉన్నవారిని టార్గెట్ చేస్తున్నట్లు పోలీసులు చెబుతున్నారు.మీ ఫోన్‌లో కొన్ని ముఖ్యమైన వివరాలను ఎప్పుడూ భద్రపరచకూడదు. డెబిట్ లేదా ఏటీఎం కార్డు ఫోటోలు బ్యాంక్ వివరాలు, ఆధార్, పాన్ కార్డుల ఫోటోలు. ఇవన్నీ ఫోన్ గ్యాలరీ లేదా నోట్స్ యాప్‌లో ఉంచడం ప్రమాదకరం. అలాగే రద్దీ ప్రాంతాల్లో ఫోన్ అన్‌లాక్ చేసేటప్పుడు మీ పిన్ ఇతరులకు కనిపించకుండా జాగ్రత్త పడాలి. ఎవరైనా ఫోన్ దొరికిందని కాల్ చేసినా, స్క్రీన్ లాక్ పిన్, ఓటీపీ, బ్యాంక్ పాస్‌వర్డ్‌ను ఎట్టి పరిస్థితుల్లోనూ చెప్పకూడదు.

మీ ఫోన్ పోయిన వెంటనే ఆలస్యం చేయకూడదు. ముందుగా సిమ్ కార్డును బ్లాక్ చేయించాలి. అలాగే బ్యాంక్, యూపీఐ సేవలను వెంటనే బ్లాక్ చేయించాలి. ఫోన్‌ను బ్లాక్ చేసేందుకు అధికారిక CEIR పోర్టల్లో ఫిర్యాదు చేయాలి. ఒకవేళ డబ్బు మోసపోయినట్లు గుర్తిస్తే, వెంటనే 1930 సైబర్ ఫ్రాడ్ హెల్ప్‌లైన్‌కు ఫిర్యాదు చేయాలి. అలాగే అధికారిక సైబర్ క్రైమ్ పోర్టల్లో కూడా కంప్లైంట్ నమోదు చేయాలి. మొత్తానికి, మీ ఫోన్ కేవలం ఫోన్ కాదు. అందులో మీ వ్యక్తిగత సమాచారం, బ్యాంకింగ్ వివరాలు కూడా ఉండొచ్చు. అందుకే ఫోన్‌ను కాపాడుకోండి. పిన్‌ను రహస్యంగా ఉంచండి. ఓటీపీని ఎవరితోనూ పంచుకోవద్దు.ఒక్క చిన్న నిర్లక్ష్యం. మీ బ్యాంక్ ఖాతాను ఖాళీ చేసే ప్రమాదం ఉంది.

3) పెద్దపల్లి నుంచి ప్రపంచానికి రాఖీలు.. పెద్దపల్లి మహిళల సక్సెస్ స్టోరీ!

రంగురంగుల దారాలు. మెరిసే పూసలు. అందమైన రాళ్లు. కొత్త కొత్త డిజైన్లు. అన్నాచెల్లెళ్ల అనుబంధానికి గుర్తుగా కట్టే చిన్న రాఖీ, ఇప్పుడు వేలాది కుటుంబాలకు ఉపాధిని అందిస్తోంది. ఒకప్పుడు రాఖీలు కావాలంటే వ్యాపారులు కలకత్తా, రాజస్థాన్ వంటి మార్కెట్లపై ఆధారపడేవారు. కానీ ఇప్పుడు పరిస్థితి మారిపోయింది. తెలంగాణలోని పెద్దపల్లి, రాఖీ తయారీకి ప్రత్యేక కేంద్రంగా ఎదిగింది.ఇక్కడ తయారవుతున్న రాఖీలు దేశంలోని 25 రాష్ట్రాలకు వెళ్తున్నాయి. అంతే కాదు, అమెరికా, బ్రిటన్, ఆస్ట్రేలియా, కెనడా సహా పలు దేశాలకు కూడా ఎగుమతి అవుతున్నాయి.

ఒక్క రోజు జరుపుకునే రాఖీ పండుగ వెనుక, నెలల తరబడి మహిళల శ్రమ ఉంది. ఆ శ్రమే ఇప్పుడు వేల కుటుంబాల జీవితాలకు ఆర్థిక భరోసాగా మారింది. పెద్దపల్లిలో రాఖీ తయారీ ఇప్పుడు ఒక చిన్న పరిశ్రమ కాదు. వేలాది డిజైన్లతో భారీ స్థాయిలో సాగుతున్న ఉపాధి రంగం. ఇక్కడ 30 వేలకుపైగా విభిన్న రకాల రాఖీ డిజైన్లు తయారవుతున్నట్లు మ‌హిళ‌లు చెబుతున్నారు. సాధారణ దారం రాఖీల నుంచి, పూసలు, ముత్యాలు, రంగురంగుల రాళ్లు, చమ్కీలు, పువ్వులు, ప్రత్యేక అలంకరణలతో తయారయ్యే డిజైనర్ రాఖీల వరకు ఎన్నో రకాల ఉత్పత్తులు ఇక్కడ తయారవుతున్నాయి.

ధర కూడా డిజైన్‌ను బట్టి మారుతుంది. సాధారణ రాఖీలు సుమారు ఒక రూపాయి నుంచి మొదలైతే. ప్రత్యేక డిజైన్లు, అలంకరణలతో తయారయ్యే రాఖీలు వందలు, వెయ్యి రూపాయల వరకు కూడా ఉంటాయి.రాఖీ పండుగ ఒక్కరోజే అయినా, దాని తయారీ మాత్రం నెలల ముందే మొదలవుతుంది. సాధారణంగా జనవరి నుంచే తయారీ పనులు ప్రారంభమై, ఆగస్టు వరకు కొనసాగుతాయి. అంటే దాదాపు ఎనిమిది నెలల పాటు మహిళలకు ఉపాధి లభిస్తోంది. ఈ పరిశ్రమ ద్వారా 3 వేల మందికి పైగా మహిళలకు సీజనల్‌గా ఉపాధి లభిస్తోందని త‌యారు చేస్తున్న మ‌హిళ‌లు చెబుతున్నారు.

ఈ రాఖీ పరిశ్రమలో అత్యంత ప్రత్యేకమైన విషయం, మహిళలు తమ ఇళ్లలో నుంచే పని చేసే అవకాశం ఉండటం. గతంలో కొంత మంది మహిళలు బీడీలు చుట్టి కుటుంబానికి ఆదాయం సంపాదించేవారు. ఇప్పుడు అదే చేతులతో అందమైన రాఖీలు తయారు చేస్తున్నారు. నిర్వాహకులు ముందుగా మహిళలకు రాఖీ తయారీపై శిక్షణ ఇస్తారు. తర్వాత అవసరమైన ముడిసరుకును వారికి అందజేస్తారు. మహిళలు ఆ సామగ్రిని ఇంటికి తీసుకెళ్లి, ఇచ్చిన డిజైన్ ప్రకారం రాఖీలు తయారు చేస్తారు. వారు తయారు చేసిన రాఖీల సంఖ్య, డిజైన్, పనిని బట్టి కూలీ చెల్లిస్తారు. రోజుకు సుమారు 300 నుంచి 500 రూపాయల వరకు ఆదాయం పొందే అవకాశం ఉందని నిర్వాహకులు చెబుతున్నారు.

ఇంటి పనులు చూసుకుంటూనే, ఖాళీ సమయంలో రాఖీలు తయారు చేయడం వల్ల గృహిణులు, యువతులు, నిరుద్యోగ మహిళలకు ఇది మంచి ఉపాధి అవకాశంగా మారింది. చిన్నపాటి దారంతో మొదలయ్యే రాఖీ, మహిళల చేతుల్లో కళాఖండంగా మారుతోంది. అదే కళ, వారి కుటుంబాలకు ఆర్థికంగా అండగా నిలుస్తోంది.ఒక రాఖీ తయారవ్వాలంటే కేవలం దారం ఉంటే సరిపోదు. రంగు రంగుల దారాలు, పూసలు, ముత్యాలు, గాజు రాళ్లు, ప్లాస్టిక్ రాళ్లు, చమ్కీలు, ప్లాస్టిక్ కాయిన్లు, పువ్వులు, ప్రత్యేక అలంకరణ సామగ్రి. ఇలా ఎన్నో వస్తువులు అవసరం. ఈ ముడిసరుకును గుజరాత్, ముంబై, రాజస్థాన్, చెన్నై, మీరట్ వంటి ప్రాంతాల నుంచి సేకరిస్తున్నారు. కొన్ని ప్రత్యేక రకాల పూసలు, అలంకరణ సామగ్రి, ప్యాకింగ్‌కు సంబంధించిన వస్తువులను విదేశాల నుంచి కూడా దిగుమతి చేసుకుంటున్నారు.

అయితే పెద్దపల్లి మహిళల పాత్ర కేవలం రాఖీలు తయారు చేయడానికే పరిమితం కాదు. ముడిసరుకు విభజించడం. కొత్త డిజైన్లను నేర్చుకోవడం. రాఖీలను తయారు చేయడం. ప్యాకింగ్ చేయడం. నిల్వ చేయడం. మార్కెటింగ్. రవాణా. ఇలా తయారీ నుంచి విక్రయం వరకు అనేక విభాగాల్లో మహిళల భాగస్వామ్యం ఉంది. కంప్యూటర్ల సహాయంతో కొత్త డిజైన్లను రూపొందిస్తూ, మార్కెట్ అవసరాలకు తగ్గట్టుగా ఎప్పటికప్పుడు కొత్త మోడళ్లను తీసుకువస్తున్నారు.

ఒకప్పుడు ఇతర రాష్ట్రాల నుంచి రాఖీలు తెప్పించుకునే పరిస్థితి ఉండేది. కానీ ఇప్పుడు పెద్దపల్లి నుంచే ఇతర ప్రాంతాలకు రాఖీలు వెళ్తున్నాయి. రెండు తెలుగు రాష్ట్రాలతో పాటు మహారాష్ట్ర, కర్ణాటక సహా దేశంలోని అనేక రాష్ట్రాలకు ఇక్కడ తయారైన రాఖీలు సరఫరా అవుతున్నాయి. మొత్తంగా 25 రాష్ట్రాలకు పెద్దపల్లి రాఖీలు చేరుతున్నాయని నిర్వాహకులు చెబుతున్నారు. అంతే కాదు... ఆన్‌లైన్ ఆర్డర్లతో ఈ వ్యాపారం మరింత విస్తరించింది. దేశ సరిహద్దులు దాటి, అమెరికా, బ్రిటన్, ఆస్ట్రేలియా, కెనడా సహా పలు దేశాలకు కూడా ఇక్కడి రాఖీలు వెళ్తున్నాయి.

అన్నాచెల్లెళ్ల ప్రేమకు గుర్తుగా కట్టే రాఖీ, ఇప్పుడు పెద్దపల్లి మహిళల ఆత్మవిశ్వాసానికి కూడా ప్రతీకగా మారింది. ఒక చిన్న రాఖీ తయారవ్వడానికి కొన్ని నిమిషాలే పట్టవచ్చు. కానీ ఆ రాఖీ వెనుక ఒక మహిళ శ్రమ ఉంది. ఒక కుటుంబం ఆశ ఉంది. ఒక ఇంటి ఆర్థిక భద్రత ఉంది. ఒక్కరోజు జరుపుకునే రాఖీ పండుగ కోసం, నెలల తరబడి శ్రమించే ఈ మహిళల కథ నిజంగా స్ఫూర్తిదాయకం.