‘రీళ్లు చూస్తే ఆకలి తీరుతుందా?’ విజయ్‌పై స్టాలిన్ సంచలన వ్యాఖ్యలు

తమిళనాడులో పెరుగుతోన్న నిత్యావసరాల ధరలపై డీఎంకే అధినేత ఎంకే స్టాలిన్.. ముఖ్యమంత్రి సి. జోసెఫ్ విజయ్‌పై విమర్శలు గుప్పించారు. ప్రజలు పెరిగిన ఖర్చులతో ఇబ్బంది పడుతుంటే.. సీఎం మాత్రం రాజకీయ ప్రచారం, పార్టీ విస్తరణపై దృష్టి పెడుతున్నారని ఆరోపించారు. అక్టోబర్ 6న జరగనున్న ధారపురం అసెంబ్లీ ఉప ఎన్నిక ప్రచారంలో భాగంగా.. స్టాలిన్ తిరుప్పూర్ జిల్లాలోని ధారపురంలో పర్యటించారు. ఓ కిరాణా దుకాణంలో వ్యాపారులు, స్థానికులతో మాట్లాడి.. నిత్యావసరాల ధరలు, వారి రోజువారీ సమస్యలను అడిగి తెలుసుకున్నారు. గత నాలుగు నెలలుగా నిత్యావసరాల ధరలు భారీగా పెరిగాయని స్టాలిన్ పేర్కొన్నారు. / దీంతో సామాన్య కుటుంబాలు రోజువారీ ఖర్చులు భరించేందుకు ఇబ్బంది పడుతున్నాయని అన్నారు.

ప్రభుత్వ ప్రచార కార్యక్రమాలను ప్రస్తావిస్తూ.. ‘రీళ్లు చూస్తే ఆకలితో ఉన్న కుటుంబాల కడుపులు నిండుతాయా?’ అని స్టాలిన్ ప్రశ్నించారు. ‘షాపింగ్‌లో బిజీగా ఉన్న ముఖ్యమంత్రికి.. కనీస నిత్యావసరాలు కొనలేక ఇబ్బంది పడుతున్న ప్రజల పరిస్థితి తెలుసా?’ అని నిలదీశారు.

తమిళనాడు ఆర్థిక పరిస్థితిపైనా స్టాలిన్ ఆందోళన వ్యక్తం చేశారు. జాతీయ స్థాయిలో జీఎస్టీ ఆదాయం పెరుగుతున్నప్పటికీ.. రాష్ట్రంలో వరుసగా మూడు నెలలుగా ఆదాయం తగ్గిందని ఆయన పేర్కొన్నారు. రాష్ట్ర పెట్టుబడుల వాతావరణంపైనా ఆయన ప్రశ్నలు లేవనెత్తారు.పెట్టుబడులను ఆకర్షించే గైడెన్స్ టీఎన్ సంస్థ నుంచి అనుభవజ్ఞులైన నిపుణులు ఇతర రాష్ట్రాలకు వెళ్లిపోతున్నారంటూ వచ్చిన నివేదికలను ఆయన ప్రస్తావించారు.

ఆర్థిక వ్యవస్థ, నిత్యావసరాల ధరలు, విద్యుత్ సరఫరా, పారిశ్రామిక ఉత్పత్తి, శాంతిభద్రతలు, ఆరోగ్య సంరక్షణ, పాడి పరిశ్రమ వంటి పలు రంగాల్లో రాష్ట్రం వెనుకబడుతోందని స్టాలిన్ ఆరోపించారు. ప్రభుత్వం పాలనా సమస్యలపై దృష్టి పెట్టకుండా.. ప్రాజెక్టులపై ‘విజయ చిహ్నాలు’ వేయడానికే పరిమితమవుతోందని విమర్శించారు. ప్రజా సంబంధాల ప్రచారానికి బదులు.. ప్రజలు ఎదుర్కొంటున్న సమస్యలకు పరిష్కారాలు చూపాలని సూచించారు.

ధారపురం ఉప ఎన్నిక.. ఏఐఏడీఎంకే ఎమ్మెల్యే పి. సత్యభామ రాజీనామా చేసి టీవీకేలో చేరడంతో అనివార్యమైంది. ఈ ఎన్నికలో డీఎంకే తరఫున న్యాయవాది ఎస్. సుగన్య పోటీ చేస్తున్నారు. సత్యభామ టీవీకే అభ్యర్థిగా.. ఆ పార్టీ ‘విజిల్’ గుర్తుపై ఉప ఎన్నికలో బరిలోకి దిగుతున్నారు.