తెలంగాణలో సీట్ల పెంపు లేనట్లే..!

తెలంగాణలో పార్లమెంటు సీట్ల పెంపు ఇక లేనట్లే. పార్లమెంటులో డిలిమిటేషన్, మహిళలకు చట్టసభల్లో రిజర్వేషన్ బిల్లులకు శుక్రవారం ఓటింగ్ నిర్వహించారు. కాగా వీటిలో తొలుత మహిళా బిల్లుకు ఓటింగ్ నిర్వహించగా, అది వీగిపోయింది. లోక్‌సభలో మహిళలకు 33 శాతం రిజర్వేషన్ అమలు చేయాలనే 131వ రాజ్యాంగ సవరణ బిల్లు వీగిపోయింది. తాజా ఓటింగ్‌లో అవసరమైన మెజారిటీ సాధించలేకపోవడంతో బిల్లు ఆమోదం పొందలేదు. ఈ పరిణామం రాజకీయ వర్గాల్లో చర్చనీయాంశంగా మారింది.

శుక్రవారం జరిగిన ఓటింగ్‌లో మొత్తం 528 మంది సభ్యులు పాల్గొన్నారు. బిల్లుకు అనుకూలంగా 298 మంది ఓటు వేయగా, 230 మంది వ్యతిరేకంగా ఓటేశారు. అయితే రాజ్యాంగ సవరణకు అవసరమైన మూడింట రెండొంతుల మెజారిటీ రాకపోవడంతో బిల్లు తిరస్కరించబడినట్లు లోక్‌సభ స్పీకర్ ఓం బిర్లా ప్రకటించారు. ఈ పరిణామాల నేపథ్యంలో కేంద్ర మంత్రి కిరణ్ రిజిజు ఇతర రెండు బిల్లులను వెనక్కి తీసుకుంటున్నట్లు వెల్లడించారు. డీలిమిటేషన్ బిల్లు-2026, కేంద్ర పాలిత ప్రాంతాల చట్టాల సవరణ బిల్లును ఉపసంహరించుకుంటున్నట్లు తెలిపారు.

అయితే బిల్లులను ప్రతిపాదించిన సమయంలోనే బిల్లుపై ప్రతిపక్ష నాయకులు తీవ్ర అభ్యంతరం వ్యక్తం చేశారు. మహిళా రిజర్వేషన్‌కు వ్యతిరేకం కాదని, కానీ దాన్ని ఇతర అంశాలతో ముడిపెట్టడాన్ని వ్యతిరేకించినట్లు తెలిపారు. ప్రస్తుత బిల్లు రాజకీయ నిర్మాణంపై ప్రభావం చూపే విధంగా ఉందని అభిప్రాయపడ్డారు. 2023లో ప్రవేశపెట్టిన మహిళా బిల్లును అమలు చేస్తే సహకరిస్తామని పేర్కొన్నారు. మహిళా బిల్లును ప్రస్తుత రూపంలో ప్రవేశపెట్టడాన్ని వ్యతిరేకించినట్లు మరో నాయకురాలు కూడా తెలిపారు. ఈ బిల్లు ఓటమిని కొన్ని రాష్ట్రాల నేతలు తమ విజయంగా పేర్కొన్నారు.

జాతీయ విపత్తు తొలగింది: రేవంత్

ఈ నేపథ్యంలో తెలంగాణ ముఖ్యమంత్రి రేవంత్ రెడ్డి స్పందించారు. ప్రజాస్వామ్య శక్తులు కలిసి ఒక కీలక పరిణామాన్ని అడ్డుకున్నట్లు పేర్కొన్నారు. ప్రతిపక్ష నాయకత్వంలో ఈ ఫలితం సాధ్యమైందని అభిప్రాయపడ్డారు. బిల్లును వ్యతిరేకించిన మిత్రపక్షాలకు ధన్యవాదాలు తెలిపినట్లు వెల్లడించారు. ఈ ఘటనతో మహిళా రిజర్వేషన్ అంశంపై రాజకీయ చర్చలు మరింత ముదురనున్నాయి. భవిష్యత్తులో ఈ అంశంపై ఎలా ముందుకు వెళ్తారో చూడాల్సి ఉంది.