గ్రేట్ నికోబార్ ఎందుకు సురక్షితం కాదు?

ఈ ప్రాజెక్టు ద్వీపంలోని దాదాపు 166 చదరపు కిలోమీటర్ల విస్తీర్ణంలో ఉంటుంది. ఇందులో కేవలం అటవీ భూమి 130.75 చదరపు కిలోమీటర్ల మేర ఉంటుంది. ప్రభుత్వ అంచనాల ప్రకారం, ప్రాజెక్టును ప్రారంభించడానికి ఆ ప్రాంతంలోని దాదాపు 18.65 లక్షల చెట్లలో 7.11 లక్షల చెట్లను దశలవారీగా నరికివేయనున్నారు.

రూ. 1 లక్ష కోట్ల (10 బిలియన్ యూఎస్ డాలర్లు) ఈ ప్రాజెక్టులో భాగంగా లోతైన పోర్టును నిర్మించనున్నారు. ఇది విస్తరిస్తున్న నావికాదళానికి ప్రత్యర్థులపై వ్యూహాత్మక ఆధిక్యాన్ని ఇవ్వగలదు. ఈ ఓడరేవును అంతర్జాతీయ కంటైనర్ ట్రాన్స్‌షిప్‌మెంట్ పోర్ట్ (ICTP)గా కూడా అభివృద్ధి చేయనున్నారు. దీనివల్ల సింగపూర్, కొలంబోలపై భారతదేశానికి ఉన్న లాజిస్టికల్ ఆధారపడటం గణనీయంగా తగ్గుతుంది.

గ్రేట్ నికోబార్ ద్వీపంలో ఈ ఓడరేవుకు సమీపంలో ఒక అంతర్జాతీయ విమానాశ్రయం, ఒక విద్యుత్ ప్లాంట్, 160 చదరపు కిలోమీటర్ల టౌన్‌షిప్ ఉంటాయి. అయితే, ఈ ప్రతిష్టాత్మక ప్రాజెక్టుకు మద్దతిస్తున్న కొందరు వ్యూహాత్మక నిపుణులు దీనిని "మునిగిపోని సహజ విమాన వాహక నౌక" అని అభివర్ణించగా, మరికొందరు ఇంత పెద్ద కంటైనర్ పోర్టును సైనిక ప్రయోజనాల కోసం ఉపయోగించడంలో అనివార్యమైన వైరుధ్యం ఉందని ఎత్తి చూపుతున్నారు. వ్యూహాత్మక ముద్ర ఆందోళనలను రేకెత్తిస్తోంది.

కొందరు మాజీ నావికాదళ, నిఘా అధికారులు గ్రేట్ నికోబార్ ప్రాజెక్టును ఒక భారంగా అభివర్ణించారు. కొత్త వలసదారులు, బహుశా విదేశీయులతో సహా, జనాభాను అనివార్యంగా పెంచే ఒక ప్రధాన వాణిజ్య, పర్యాటక కేంద్రంలో అధునాతన సముద్ర నిఘా కేంద్రాన్ని, పెద్ద నావికా స్థావరాన్ని ఏర్పాటు చేయడం మంచిది కాదని వారు వాదించారు. ఈ ప్రాజెక్టును విమర్శించే మరికొందరు, భారీ వాణిజ్య విస్తరణను సమర్థించుకోవడానికి కేంద్రం జాతీయ భద్రతా కోణాన్ని వాడుకుంటోందని ఆరోపించారు.

ఇటీవలి ఒక వ్యాసంలో, భౌగోళిక రాజకీయ విశ్లేషకుడు సుశాంత్ సింగ్ ఇలా రాసుకొచ్చారు. “ప్రభుత్వం సముద్ర పోటీ, జాతీయ ప్రయోజనాల భాషలో మాట్లాడుతుంది. కానీ ఈ ప్రాజెక్ట్‌లో ఒక పెద్ద ఓడరేవు, విమానాశ్రయం, టౌన్‌షిప్, ఇంధన మౌలిక సదుపాయాలు ఉన్నాయి. ఇవి అనివార్యంగా లాజిస్టిక్స్, నిర్మాణం, భూమి విలువ పెరుగుదల, దీర్ఘకాలిక రియల్ ఎస్టేట్ అభివృద్ధికి అవకాశాలను సృష్టిస్తాయి.

భారతీయ మెగా-ప్రాజెక్టులు తరచుగా విమర్శలతో ముందుకుసాగుతుంటాయి. తరువాత వీటిని ప్రభుత్వం వ్యూహత్మకమైనది చిత్రీకరించడం ద్వారా విమర్శకుల గొంతు నొక్కే ప్రయత్నం చేస్తుంది. ఇది అనుమతి పొందడానికి ఒక మార్గంగా చేస్తుంటారు. మిశ్రమ ముద్రలతో ముందుకు సాగుతాయి, ఎందుకంటే ఒకసారి భద్రతా చట్రం జోడించబడిన తర్వాత, పరిశీలన కష్టతరం అవుతుంది.”

కానీ సాటిలేని జీవవైవిధ్యం కలిగిన ఒక ముఖ్యమైన జీవావరణ రిజర్వ్‌ను నాశనం చేసి, దానిని ఒక వాణిజ్య కేంద్రంగా మార్చడంపై ఉన్న బలమైన పర్యావరణ ఆందోళనలతో పాటు, గ్రేట్ నికోబార్ ప్రాజెక్టుపై అసలైన ఆందోళన ఏమిటంటే, అది ఇండోనేషియాలోని బండా ఆచెకు ప్రమాదకరంగా దగ్గరగా ఉండటం.

2004లో రిక్టర్ స్కేలుపై 9.2 తీవ్రతతో సంభవించి, చరిత్రలో ఎన్నడూ చూడని విధ్వంసకర సునామీని సృష్టించిన విపత్కర మెగా భూకంపానికి బండా ఆచె కేంద్ర బిందువు. ఈ ప్రాంతంలోనే భారత ఫలకం తూర్పు భాగం ఆగ్నేయాసియా కిందకు జారుతుంది. 2004 నాటి భూకంపం 15-20 కిలోమీటర్ల లోతులో సంభవించి, దాదాపు 1,200 కిలోమీటర్ల ఫలక సరిహద్దును చీల్చివేసింది.

ఇది ట్రిలియన్ల టన్నుల శిలలను సముద్రం కిందకు నెట్టివేసి, భారీ సునామీని సృష్టించింది. ఇతర ప్రభావిత ప్రాంతాలతో పోలిస్తే భూకంప కేంద్రానికి దగ్గరగా ఉన్న గ్రేట్ నికోబార్, మూడు నుంచి నాలుగు మీటర్ల మేర ఆకస్మిక భూకంప కుంగుబాటుకు గురైంది. తరచుగా సూక్ష్మ ప్రకంపనలకు ఇది కేంద్రంగా మారింది.

సింగపూర్ లేదా హాంగ్‌కాంగ్ వంటి ప్రాంతాలు స్థిరమైన భూగర్భ నిర్మాణం ప్రయోజనాలను పొందుతుండగా, గ్రేట్ నికోబార్ ప్రాంతం నెమ్మదిగా పైకి లేవడం, ఆకస్మికంగా కుంగిపోవడం వంటి కదలికలకు గురవుతుందని భూ-శాస్త్రవేత్తలు అంటున్నారు.

ఇది ఓడరేవు, విమానాశ్రయం మరియు నగరం వంటి పెద్ద మౌలిక సదుపాయాలపై భారీ ప్రతికూల ప్రభావాన్ని చూపవచ్చు. "ఇంధన ప్లేట్ టెక్టోనిక్స్‌ను ఇంజనీరింగ్ అధిగమించగలదనే భ్రమపై బిలియన్ల కొద్దీ జూదం ఆడటమే, ఇంత అస్థిరమైన నేలపై భారీ ఎత్తున, శాశ్వత మౌలిక సదుపాయాలను నిర్మించడం" అని శాస్త్రవేత్త సి.పి. రాజేంద్రన్ అన్నారు. టెక్టోనిక్ ఒత్తిడి నెమ్మదిగా పైకి లేవడానికి దారితీస్తుందని, ఆ తర్వాత 2004 నాటి పెద్ద భూకంపం వంటి దాని సమయంలో పేరుకుపోయిన ఒత్తిడి విడుదలయ్యి, ఆకస్మికంగా గణనీయంగా కుంగిపోవడానికి దారితీస్తుందని సూచించడానికి ఆయన విస్తృతమైన GPS మరియు టైడ్-గేజ్ డేటాను ఉదహరించారు.

ప్రాజెక్ట్‌ను ఖరారు చేయడానికి ముందు అవసరమైన పర్యావరణ ప్రభావ అంచనా, భార-భరిత విశ్లేషణలు నిర్వహించామని భారత ప్రభుత్వం చెబుతున్నప్పటికీ, భౌగోళిక ప్రమాదాలను తగినంతగా పరిగణనలోకి తీసుకోలేదని శాస్త్రవేత్తలు అంటున్నారు.

గ్రేట్ నికోబార్ ప్రాజెక్టును నడిపిస్తున్న కారకాల్లో ఒకటి, బహుశా అండమాన్-నికోబార్ ద్వీపసమూహంలోని హైడ్రోకార్బన్ అవకాశాలపై ఉన్న ఆశావాదం. ఇప్పటివరకు ఏ భారీ వాణిజ్య చమురు, గ్యాస్ క్షేత్రాలు చురుకుగా ఉత్పత్తి చేయనప్పటికీ, ఒక ప్రధాన అన్వేషణ కార్యక్రమం గణనీయమైన సహజ వాయు నిల్వలను ధృవీకరించింది.

ఇది భారతదేశ దీర్ఘకాలిక ఇంధన భద్రతకు ఈ ద్వీపసమూహాన్ని ఒక కీలక ఆస్తిగా నిలుపుతోంది. విజయపురం-2 వంటి కొన్ని అన్వేషణా బావులు, అండమాన్ లోతట్టు జల ప్రాంతంలో సహజ వాయువు ఉనికిని ధృవీకరించాయి. భారతదేశ హైడ్రోకార్బన్ వనరుల అంచనా అధ్యయనం ప్రకారం, అండమాన్ బేసిన్‌లో దాదాపు 371 మిలియన్ మెట్రిక్ టన్నుల ఆయిల్ ఈక్వివలెంట్ (MMTOE) నిల్వలు ఉన్నాయని అంచనా.

ఈ ఆస్తులను అభివృద్ధి చేయడానికి అయ్యే ఖర్చు గణనీయంగా ఉంటుంది, అది అందుబాటులో ఉన్న హైడ్రోకార్బన్ వనరుల వినియోగాన్ని గణనీయంగా ఆలస్యం చేయవచ్చు. ఇక్కడ కూడా, భౌగోళిక ప్రమాదాలు ఇటువంటి ప్రాజెక్టులపై తీవ్ర ప్రభావం చూపుతాయని శాస్త్రవేత్తలు అంటున్నారు.