కేసీఆర్ను కేంద్రమే కాపాడుతోంది: రేవంత్
కాళేశ్వంలో మైనస్లు ప్రజలకు తెలియకుండా చేయడం కోసమే జగిత్యాల సభ పెట్టారన్న సీఎం.
కాళేశ్వరం అంశంలో కేసీఆర్ను కేంద్రమే కాపాడుతోందని సీఎం రేవంత్ రెడ్డి పరోక్షంగా విమర్శనాస్త్రాలు సంధించారు. కాళేశ్వరం ప్రాజెక్ట్ను సోమవారం ఉన్నతాధికారులతో కలిసి పరిశీలించామని, ఇది పొలిటికల్ విజిట్ కాదని రేవంత్ వివరించారు. కాళేశ్వరం బొక్కలు బయటపడతాయన్న భయంతో ప్రజలను డైవర్ట్ చేయడం కోసమే ఇదే రోజు జగిత్యాలలో బీఆర్ఎస్.. భారీ బహిరంగ సభను ఏర్పాటు చేసుకుందని చురకలంటించారు. కానీ తాము అనుమతులు ఇచ్చామని, కేసీఆర్ పాపాలను ప్రకృతే బట్టబయలు చేస్తోందని ఘాటు వ్యాఖ్యలు చేశారు.
మేడిగడ్డ విజిట్ను తాము పొలిటికల్గా చేయలేదని రేవంత్ అన్నారు. అధికారులు తెలంగాణలో ఉండరని, వారికి నెలల క్రితమే లేఖలు రాసి పిలిస్తే సోమవారం వచ్చారని వివరించారు రేవంత్. కానీ దీనిపై బీఆర్ఎస్ దుష్ప్రచారం చేస్తోందని అన్నారు. కాళేశ్వరం అంశం తమ చేతికి ఇస్తే 48 గంటల్లో చర్యలు తీసుకుంటామని, తప్పు చేసిన వారిని జైలులో పెడతామన్న కేంద్రం, సీబీఐ ఇప్పుడెందుకు మౌనం పాటిస్తోందని విమర్శించారు.
గోదావరి జలాలతో ఉత్తర తెలంగాణ అభివృద్ధి కోసం 1975లో జలగం వెంగళరావు ఒప్పందం కుదుర్చుకున్నారని గుర్తు చేసినట్టు తెలిపారు. ఆ తర్వాత 2009లో వైఎస్ హయాంలో ప్రాణహిత-చేవెళ్ల ప్రాజెక్టు ప్రారంభమైందని వివరించారు. ఈ ప్రాజెక్టుకు భారీగా ఖర్చు చేసినప్పటికీ, తర్వాత కెసీఆర్ ప్రభుత్వం రీడిజైన్ పేరుతో అంచనాలు పెంచిందని ఆయన పేర్కొన్నట్టు సమాచారం. వ్యయం లక్షా యాభై వేల కోట్లకు చేరిందని తెలిపారు.
2016లో ప్రారంభమైన మేడిగడ్డ బ్యారేజ్ను 2019లో పూర్తి చేసినట్టు ప్రకటించి, ఎన్నికల్లో లబ్ధి పొందారని విమర్శించారు. అయితే 2023లో బ్యారేజ్ కుంగిపోవడం వల్ల అసలు నిజాలు బయటపడ్డాయని చెప్పారు. ప్రాజెక్టులో సమస్యలపై ఎన్డీఎస్ఏ ప్రాథమిక నివేదిక నవంబర్ 2023లోనే వచ్చినప్పటికీ, అప్పటి ప్రభుత్వం పట్టించుకోలేదని ఆయన ఆరోపించినట్టు వెల్లడైంది. పీసీ ఘోష్ కమిటీ పూర్తి నివేదిక కూడా దోపిడీని వెల్లడించిందని పేర్కొన్నారు.
ఈ అంశంపై సీబీఐ విచారణకు కేంద్రానికి రాష్ట్ర ప్రభుత్వం తీర్మానం పంపినట్టు చెప్పారు. గతంలోనే కేసీఆర్, హరీష్పై చర్యలు తీసుకోవాలని డిమాండ్ వచ్చినప్పటికీ, కేంద్రం స్పందించలేదని విమర్శించారు. కాళేశ్వరం ప్రాజెక్టుతో ఇప్పటివరకు లక్ష ఎకరాలకు కూడా నీరు అందలేదని, దాన్ని రిపేర్ చేయాలని ప్రభుత్వం నిర్ణయించిందని తెలిపారు. అధికారులతో, నిపుణులతో సమావేశాలు నిర్వహిస్తున్నట్టు చెప్పారు. విచారణ భయం వల్లనే ప్రతిపక్షం రాజకీయ సమావేశాలు నిర్వహిస్తోందని ఆయన వ్యాఖ్యానించినట్టు తెలిసింది. హరీష్ రావు ఢిల్లీ పర్యటనపై కూడా ప్రశ్నలు లేవనెత్తారు.
బీజేపీ మద్దతుతో అవినీతి కేసుల నుంచి తప్పించుకోవాలని ప్రయత్నిస్తే ప్రభుత్వం ఊరుకోదని స్పష్టం చేశారు. అవసరమైన చర్యలతో ముందుకు వెళతామని పేర్కొన్నారు. శ్రీపాద ఎల్లంపల్లి ప్రాజెక్టు ప్రాధాన్యతను ప్రస్తావిస్తూ, రాష్ట్రంలో సాగు విస్తరణకు అది కీలకమని వివరించారు. చివరగా, కాళేశ్వరం ప్రాజెక్టులో తప్పిదాలకు బాధ్యులపై చర్యలు తప్పవని తెలిపారు. ప్రాజెక్టును పునరుద్ధరించి నీరు అందించే దిశగా ప్రభుత్వం చర్యలు కొనసాగిస్తుందని స్పష్టం చేశారు.
