గొంతు చించుకుంటే ప్రజాదరణ రాదు రేవంత్: హరీష్ రావు

ప్రజాదరణ అనేది గొంతు చించుకుంటే రాదన్న విషయాన్ని సోమవారం కేసీఆర్ సభకు పోటీగా పెట్టిన రేవంత్ సభ స్పష్టం చేసిందంటూ హరీష్ రావు ఎద్దేవా చేశారు. సభ, ప్రసంగం అనేవి జగిత్యాలలో కేసీఆర్ సమక్షంలో జరిగిన సభలా హుందాగా సాగాలని హరీష్ రావు హితవు పలికారు. హరీష్ వ్యాఖ్యలతో రాష్ట్ర రాజకీయాల్లో మళ్లీ మాటల యుద్ధం ముదిరింది. బీఆర్ఎస్ నేత హరీశ్‌రావు ఢిల్లీ పర్యటనపై వస్తున్న రూమర్లకు క్లారిటీ ఇస్తూనే సీఎం రేవంత్ రెడ్డిపై తీవ్ర స్థాయిలో విరుచుకుపడ్డారు. హైదరాబాద్ తెలంగాణ భవన్‌లో జరిగిన మీడియా సమావేశంలో ఆయన మాట్లాడారు.

తాను ఢిల్లీకి వెళ్తే సీఎంవో నుంచి లీకులు ఇస్తున్నారని ఆరోపిస్తూ, విషయం లేని వాళ్లే ఇలాంటి పనులు చేస్తారని విమర్శించారు. తాను వినోద్ కుమార్, వద్దిరాజు రవిచంద్రతో కలిసి ఢిల్లీకి వెళ్తున్నట్లు తెలిపారు. కాళేశ్వరం ప్రాజెక్టుపై హైకోర్టు తీర్పు రానుందని పేర్కొన్నారు. న్యాయం జరుగుతుందని నమ్మకం వ్యక్తం చేశారు. ఒకవేళ అనుకూలంగా రాకపోతే సుప్రీంకోర్టులో కేవియట్ పిటిషన్ వేయడానికి సీనియర్ న్యాయవాదులను సంప్రదించినట్లు వెల్లడించారు.

ఫిరాయింపు ఎమ్మెల్యేల కేసుపై కూడా చర్చించినట్లు తెలిపారు. అదే రోజు సుప్రీంకోర్టులో ఓటుకు నోటు కేసు విచారణ ఉండబోతుందని చెప్పారు. ఈ కేసులో రేవంత్ రెడ్డి పట్టపగలు డబ్బులతో పట్టుబడ్డారని ఆరోపించారు. హోంమంత్రి, ముఖ్యమంత్రి, ముద్దాయి అన్నీ ఒకరేనని విమర్శించారు. కేసు నుంచి బయటపడేందుకు ప్రముఖ న్యాయవాదులను నియమించుకున్నారని, ప్రభుత్వం తరఫున కూడా వేరే న్యాయవాది ఉన్నారని పేర్కొన్నారు.

తమ పార్టీ తరఫున బలమైన న్యాయవాదులను ఏర్పాటు చేసేందుకు ఢిల్లీ వెళ్తున్నట్లు చెప్పారు. నాలుగున్నరేళ్లుగా స్టే మీద ఉన్నారని, అది తొలగితే జైలుకు వెళ్లే పరిస్థితి వస్తుందని హెచ్చరించారు. జగిత్యాల సభల అంశాన్ని ప్రస్తావిస్తూ, కేసీఆర్ సభకు పోటీగా రేవంత్ సభ పెట్టడం సంకుచిత రాజకీయమని విమర్శించారు. కేసీఆర్ మాట్లాడే సమయానికే సభ నిర్వహించారని ఎద్దేవా చేశారు. సోషల్ మీడియాలో కేసీఆర్ ప్రసంగాన్ని లక్షలాది మంది వీక్షించగా, రేవంత్ సభకు తక్కువ స్పందన వచ్చిందని తెలిపారు.

కేసీఆర్ ప్రసంగం హుందాగా సాగిందని, వ్యక్తిగత విమర్శలు చేయలేదని చెప్పారు. అయితే రేవంత్ ప్రసంగం ఆవేశంతో నిండిందని వ్యాఖ్యానించారు. ప్రజల స్పందనలోనే పరిస్థితి స్పష్టమైందని అన్నారు. రైతు భరోసా అంశంపై కూడా ప్రభుత్వాన్ని నిలదీశారు. ఎన్నికల కోడ్ ముగిసిన వెంటనే నిధులు ఇస్తామని చెప్పినా పూర్తిగా అమలు కాలేదని తెలిపారు. ఇప్పటివరకు కొంత మొత్తమే జమైందని, ఇంకా భారీ మొత్తం ఇవ్వాల్సి ఉందని పేర్కొన్నారు.

రైతులకు డబ్బులు ఇవ్వడంలో ఆలస్యం ఎందుకని ప్రశ్నించారు. కాళేశ్వరం ప్రాజెక్టుపై కూడా స్పందించారు. ముందుగా తీవ్ర విమర్శలు చేసిన ప్రభుత్వం ఇప్పుడు మాట మార్చిందని చెప్పారు. ఇది బహుళ ప్రయోజన ప్రాజెక్టు అని, కోట్ల మందికి నీటి సరఫరా అందిందని వివరించారు. రెండు పిల్లర్లు కుంగినా ప్రాజెక్టు మొత్తం దెబ్బతినలేదని స్పష్టం చేశారు. కాళేశ్వరం పరిధిలోని ఇతర ప్రాజెక్టులు, పంపులు, నీటి సరఫరా వ్యవస్థలన్నీ పనిచేస్తున్నాయని తెలిపారు.

ప్రాజెక్టుపై అవగాహన లేకుండా వ్యాఖ్యలు చేస్తున్నారని విమర్శించారు. ఎల్లంపల్లి ప్రాజెక్టు గురించి కూడా ప్రస్తావించారు. శంకుస్థాపన నుంచి పూర్తి వరకు తమ పాత్ర ఉందని చెప్పారు. బీఆర్ఎస్ హయాంలో సాగునీటి విస్తీర్ణం గణనీయంగా పెరిగిందని తెలిపారు. చివరగా, కోర్టు తీర్పులు, ప్రభుత్వ చర్యలు, రైతు సంక్షేమంపై వచ్చే రోజుల్లో పరిణామాలు కీలకంగా మారనున్నాయని రాజకీయ వర్గాలు గమనిస్తున్నాయి.