వ్యూహ సమావేశానికి 23 మంది గైర్హాజరు.. ఎంవీఏ ఐక్యతపై సందేహాలు

మహారాష్ట్ర అసెంబ్లీ వర్షాకాల సమావేశాలకు ముందు జరిగిన కీలక సమావేశానికి ప్రతిపక్ష కూటమి మహా వికాస్ అఘాడి (ఎంవీఏ)కి చెందిన ఎమ్మెల్యేలు ఎక్కువమంది గైర్హాజరు కావడంతో, కూటమి భవిష్యత్తుపై మరోసారి సందేహాలు వ్యక్తమవుతున్నాయి.

బుధవారం సాయంత్రం జరిగిన ఈ సమావేశానికి ఎంవీఏకి చెందిన 60 మంది ఎమ్మెల్యేలలో 23 మంది హాజరు కాలేదు. గైర్హాజరైన వారిలో ఎన్సీపీ (శరద్ పవార్ వర్గం) అధినేత శరద్ పవార్, సీనియర్ నేత జయంత్ పాటిల్ కూడా ఉన్నారని సమాచారం. వ్యక్తిగత కారణాల వల్ల వీరు హాజరు కాలేదని వర్గాలు తెలిపాయి.

గైర్హాజరు కేవలం ఎన్సీపీ వరకే పరిమితం కాలేదు. కాంగ్రెస్ సీనియర్ నేతలు నానా పటోలే, విజయ్ వడెట్టివార్ కూడా సమావేశానికి రాలేదు. వడెట్టివార్ గైర్హాజరుకు ఆరోగ్య కారణాలే కారణమని ఆయన కార్యాలయం తెలిపింది.

అయితే, అసెంబ్లీ సమావేశాల సమయంలో ప్రతిపక్షాల వైఖరిని సమన్వయం చేసేందుకు ఏర్పాటు చేసిన ఈ సమావేశానికి కాంగ్రెస్ రాష్ట్ర అధ్యక్షుడు హర్షవర్ధన్ సప్కల్, శివసేన (యూబీటీ) నేత సంజయ్ రౌత్ హాజరయ్యారు.

ఇటీవలే ఉద్ధవ్ థాకరే వర్గానికి చెందిన ఆరుగురు ఎంపీలు ఏక్‌నాథ్ షిండే శివసేనలో చేరిన నేపథ్యంలో, ఈ తక్కువ హాజరు ఎంవీఏలో అంతర్గత ఐక్యతపై కొత్త చర్చకు దారితీసింది.

“మనం నిజంగా కలిసే ఉన్నామా?”.. థాకరే ప్రశ్న

కూటమి సమన్వయంపై వస్తున్న సందేహాల నడుమ ఉద్ధవ్ థాకరే బహిరంగంగానే కీలక వ్యాఖ్యలు చేశారు. “మనం కలిసి ఉన్నామని చెబుతున్నాం.. కానీ నిజంగా కలిసి ఉన్నామా?” అని ఆయన ప్రశ్నించారు.

అసెంబ్లీలో మహా వికాస్ అఘాడిగా నిజంగా ఐక్యంగా వ్యవహరిస్తున్నామా? సమస్యలను ఉమ్మడిగా లేవనెత్తుతున్నామా? అనే ప్రశ్నలను ఆయన సహచరుల ముందుంచారు.

తన పార్టీలో జరిగిన తిరుగుబాటును ప్రస్తావిస్తూ, పార్టీని విడిచిపోయిన వారిపై దృష్టి పెట్టకుండా, విధేయులుగా మిగిలిన వారిని బలోపేతం చేయాలని థాకరే సూచించారు. “వెళ్లిపోయిన వారిని వెళ్లనివ్వండి” అని ఆయన వ్యాఖ్యానించారు. అయితే, ఇదే సమయంలో ఎంవీఏ భవిష్యత్తుపై విశ్వాసం కూడా వ్యక్తం చేశారు. “ఎంవీఏగా మనం ఇప్పటికీ ఒక ప్రధాన శక్తిగానే ఉన్నాం” అని పేర్కొంటూ, ఉమ్మడి ప్రచారాలు, సమన్వయంతో కూడిన ప్రజా కార్యక్రమాలు చేపట్టాలని పిలుపునిచ్చారు.

చర్చల్లో లేని ఫిరాయింపు ప్రస్తావన..

షిండే శిబిరంలోకి వెళ్లిన ఆరుగురు ఎంపీల అంశం ఈ సమావేశంలో ప్రధాన చర్చగా రాలేదు. దాని బదులు, అసెంబ్లీ వర్షాకాల సమావేశాల్లో అనుసరించాల్సిన వ్యూహంపైనే నాయకులు దృష్టి పెట్టారు.

శివసేన-బీజేపీ మధ్య విభేదాల తర్వాత 2019లో శివసేన, కాంగ్రెస్, ఎన్సీపీ కలిసి మహా వికాస్ అఘాడిని ఏర్పాటు చేశాయి. ఆ తర్వాత కూటమి అనేక రాజకీయ సంక్షోభాలను ఎదుర్కొంది. 2022లో శివసేన చీలిక, ఆపై ఏడాది తర్వాత ఎన్సీపీ విభజన ఎంవీఏ బలంపై ప్రభావం చూపాయి.

ఇప్పుడు మరోసారి తక్కువ హాజరు, అంతర్గత అసమన్వయం, ఫిరాయింపుల వరుసతో ఎంవీఏ భవిష్యత్తుపై ప్రశ్నలు మళ్లీ బలంగా వినిపిస్తున్నాయి. పెరుగుతున్న రాజకీయ సవాళ్ల మధ్య ఈ కూటమి నిజంగా ఐక్యంగా నిలబడగలదా అన్నదే ఇప్పుడు ప్రధాన చర్చగా మారింది.