విజయ్ గెలుపుతో రెండుగా చీలిపోయినా అన్నాడీఎంకే

ముఖ్యమంత్రి చంద్రశేఖరన్ జోసెఫ్ విజయ్ నేతృత్వంలోని తమిళగ వెట్రి కజగం (టీవీకే) ప్రభుత్వం, వారం రోజుల పాటు పొత్తులు కుదుర్చుకోవడానికి, ఎమ్మెల్యేల సంఖ్యాబలం కోసం వ్యూహలు రచించింది.

ఈ రోజు (మే 13) తమిళనాడు శాసనసభలో విశ్వాస తీర్మానాన్ని సునాయాసంగా నెగ్గించుకుంది. అయితే, రెండేళ్ల పార్టీ సాధించిన ఈ విజయం, ఐదు దశాబ్దాల చరిత్ర కలిగిన ఏఐఏడీఎంకేకు తీవ్ర సంక్షోభాన్ని తెచ్చిపెట్టింది. ఈ తీర్మానానికి అనుకూలంగా 144 ఓట్లు, వ్యతిరేకంగా 22 ఓట్లు రాగా, ఐదుగురు ఓటింగ్‌కు దూరంగా ఉన్నారు.

అనుకూలంగా వచ్చిన 144 ఓట్లలో, 120 ఓట్లు టీవీకే దాని మద్దతు కోసం చేర్చుకున్న కాంగ్రెస్, సీపీఐ, సీపీఐ(ఎం), వీసీకే, ఐయూఎంఎల్ పార్టీల నుంచి వచ్చాయి. మిగిలిన 24 ఓట్లు ఏఐఏడీఎంకే రెబెల్ ఎమ్మెల్యేల నుంచి రావడంతో, పార్టీలో అప్పటికే రాజుకుంటున్న అంతర్గత విభేదాలు బహిరంగమయ్యాయి.

ఎడప్పాడి పళనిస్వామి (ఈపీఎస్) ఆయన పార్టీకి చెందిన 21 మంది ఎమ్మెల్యేలు విశ్వాస తీర్మానానికి వ్యతిరేకంగా ఓటు వేయగా, 24 మంది పార్టీ రెబెల్స్ టీవీకే ప్రభుత్వానికి మద్దతుగా ఫిరాయించారు. ఏఐఏడీఎంకేలో చీలిక అధికారికమైంది. ఈ బలపరీక్ష ఏఐఏడీఎంకేలో బహిరంగ నిలువు చీలికను స్పష్టం చేసింది. ఇప్పుడు అసెంబ్లీలో రెండు సమాంతర వర్గాలు స్పష్టంగా పనిచేస్తున్నాయి. ఒక వర్గం సీనియర్ నాయకులు సివి షణ్ముగం, ఎస్పి వేలుమణి నాయకత్వంలో పనిచేస్తుండగా, మరొకటి ఈపీఎస్‌కు విధేయంగా ఉంది.

సంస్థాగత స్థాయిలో రెండు వర్గాలు ఈపీఎస్‌ను పార్టీ ప్రధాన కార్యదర్శిగా గుర్తిస్తున్నప్పటికీ, ముఖ్యంగా డీఎంకేతో ఏదైనా అవగాహనకు సంబంధించిన వ్యూహాత్మక, సైద్ధాంతిక విభేదాల కారణంగానే ఈ తిరుగుబాటు చెలరేగిందని సమాచారం.

రెబెల్ ఎమ్మెల్యేల నిర్ణయాన్ని షణ్ముగం గట్టిగా సమర్థించారు. ఈపీఎస్‌పై తీవ్ర ఆరోపణలు చేశారు. “మేము ఏఐఏడీఎంకే విప్‌ను ఉల్లంఘించామని చెప్పడం తప్పు. అసెంబ్లీ పార్టీ మాత్రమే తన నాయకుడిని, విప్‌ను ఎన్నుకోగలదు. ప్రధాన కార్యదర్శి ఏకపక్షంగా ఒకరిని నియమించలేరు” అని ఆయన మీడియాతో అన్నారు.

ఈపీఎస్ ఏర్పాటు చేశారని చెబుతున్న ఏఐఏడీఎంకే శాసనసభ పక్ష సమావేశం ప్రామాణికతను ఆయన ప్రశ్నించారు. సమావేశ మినిట్స్ లేదా తీర్మానాలను సమర్పించాలని సవాలు విసిరారు. అంతేకాకుండా, గత వారం పుదుచ్చేరిలోని ఒక ప్రైవేట్ రిసార్ట్‌లో బస చేస్తున్న తిరుగుబాటు ఎమ్మెల్యేలను ఈపీఎస్ కలుసుకుని, డీఎంకే, బహుశా బీజేపీ నుంచి బయటి మద్దతుతో తాను నేతృత్వం వహించే ప్రభుత్వంలో వారికి మంత్రి పదవులు ఆఫర్ చేశారని ఆయన ఆరోపించారు.

"ఆయన అగ్ర నాయకత్వంతో మాట్లాడారని, వారు అంగీకరించారని మాకు చెప్పారు. డీఎంకే బాహ్య మద్దతుతో తాను ముఖ్యమంత్రి అవుతానని ఆయన అన్నారు" అని షణ్ముగం పేర్కొన్నారు. డీఎంకేతో ఎలాంటి పొత్తును అయినా రెబెల్స్ గట్టిగా వ్యతిరేకిస్తున్నారని, దానిని ఒక "విధ్వంసక శక్తి"గా అభివర్ణిస్తున్నారని, వాస్తవానికి దానిని ఎదుర్కోవడానికే ఏఐఏడీఎంకే ఏర్పడిందని ఆయన తెలిపారు.

మే 8న, రెబెల్ ఎమ్మెల్యేలు తమ సొంత సమావేశం నిర్వహించి, మెజారిటీ ఓట్లతో వేలుమణిని ఏఐఏడీఎంకే శాసనసభ పక్ష నాయకుడిగా ఎన్నుకున్నారని కూడా ఆయన వెల్లడించారు. ఈ బృందం తమ మెజారిటీని నొక్కిచెబుతూ, తమ కార్యవర్గ సభ్యులకు గుర్తింపు ఇవ్వాలని డిమాండ్ చేస్తూ స్పీకర్‌కు ఒక వినతిపత్రాన్ని సమర్పించింది. పార్టీకి వరుసగా ఎదురవుతున్న ఎన్నికల పరాజయాల నేపథ్యంలో ఆత్మపరిశీలన చేసుకోవాలన్న డిమాండ్‌ను వేలుమణి కూడా పునరుద్ఘాటించారు.

"పార్టీని విచ్ఛిన్నం చేసే ఉద్దేశం మాకు లేదు. వరుస ఓటములను మనం విశ్లేషించుకోవాలి," అని ఆయన అన్నారు. పార్టీని బలోపేతం చేయడానికి, మాజీ మంత్రులు కేఏ సెంగోట్టయ్యన్, ఓ పన్నీర్‌సెల్వం (ఓపీఎస్), వీకే శశికళ, టీటీవీ దినకరన్‌లతో సహా బహిష్కరించబడిన సీనియర్ నాయకులను తిరిగి పార్టీలోకి తీసుకురావాలన్న తన చిరకాల డిమాండ్‌ను ఆయన పునరుద్ఘాటించారు. ఇటువంటి రాజీ ప్రయత్నాలను నిరంతరం తిరస్కరిస్తున్నందుకు ఆయన ఈపీఎస్‌ను విమర్శించారు.

'ముఖ్యమంత్రి పదవికి తిరుమావళన్‌ను పరిగణించారు' వీసీకేకు చెందిన తోల్ తిరుమావళవన్‌ను ఏకగ్రీవ ముఖ్యమంత్రి అభ్యర్థిగా అంగీకరించి, క్యాబినెట్‌లో ఏఐఏడీఎంకేకు గణనీయమైన ప్రాతినిధ్యం కల్పించే ప్రత్యామ్నాయ ఏర్పాటును కూడా తాము ప్రతిపాదించామని రెబెల్స్ పేర్కొన్నారు.

కానీ, తాను ముఖ్యమంత్రి అవుతానో లేదా ప్రతిపక్షంలో కూర్చుంటానో తేల్చుకోలేక, ఈపీఎస్ దానిని పూర్తిగా తిరస్కరించారని వారు తెలిపారు. తమ మద్దతు టీవీకే ప్రభుత్వానికి డీఎంకేను ఎదుర్కోవాలనే ఉమ్మడి లక్ష్యం మీదే తప్ప, ఏ మంత్రి పదవి ఆశయం మీద ఆధారపడి లేదని అసమ్మతి ఎమ్మెల్యేలు స్పష్టం చేశారు.

మరోవైపు, 47 స్థానాల్లో పార్టీ విజయాన్ని ఒక ముఖ్యమైన విజయంగా ఈపీఎస్ గతంలో అభివర్ణించగా, ఆ వాదనను రెబెల్స్ కొట్టిపారేశారు. ఓటములకు బాధ్యత వహించిన మాజీ నాయకురాలు జె. జయలలితలా కాకుండా, 2019, 2024 లోక్‌సభ ఎన్నికల పనితీరు విషయంలో గానీ, 2021, 2026 అసెంబ్లీ ఎన్నికల పనితీరు విషయంలో గానీ ఈపీఎస్ ఎన్నడూ అలా చేయలేదని వారు ఎత్తి చూపారు. ఈపీఎస్, ఓపీఎస్‌లు నాయకత్వం కోసం హోరాహోరీగా పోరాడిన జయలలిత మరణం తర్వాత ఏఐఏడీఎంకేలో ఇది అత్యంత తీవ్రమైన బహిరంగ చీలికను సూచిస్తోంది.