బీజేపీ పశ్చిమ బెంగాల్ క్యాంపస్ లను లక్ష్యం చేసుకుందా?

ఈ ప్రయత్నానికి తాజా నిదర్శనం శుక్రవారం నాడు కనిపించింది. జాదవ్‌పూర్ విశ్వవిద్యాలయం సమీపంలో జరిగిన “వందేమాతరం” కార్యక్రమంలో ముఖ్యమంత్రి సువేందు అధికారి పాల్గొన్నారు. ప్రతికూల వాతావరణాన్ని సైతం లెక్కచేయకుండా వేలాది మంది ఈ గీతాన్ని ఆలపించారు.

రాఖీ బంధన్ రోజున జరిగిన ఈ కార్యక్రమాన్ని, "దేశ వ్యతిరేక" శక్తులకు ఆశ్రయం కల్పిస్తోందని బీజేపీ నాయకులు పదేపదే ఆరోపిస్తున్న జాదవ్‌పూర్ విశ్వవిద్యాలయం పరిసరాల్లో "జాతీయవాద స్ఫూర్తిని నింపే" సమీకరణగా అభివర్ణించారు. "జాదవ్‌పూర్ లోపల, వెలుపల జాతీయవాదాన్ని" స్థాపిస్తానని అధికారి ప్రకటించిన నేపథ్యంలో ఈ కార్యక్రమం జరిగింది.

బీజేపీ ఈ ప్రయత్నంలో రెండు సమాంతర విధానాలు ఉన్నాయి. వీటిలో ఒకటి పరిపాలనాపరమైనది. 247 ప్రభుత్వ-సహాయక కళాశాలల పాలక మండళ్లకు అధిపతులుగా అధికార పార్టీ ఎంపీలు, ఎమ్మెల్యేలు, మంత్రులను ప్రభుత్వం నియమించింది. దీనితో కళాశాలల పరిపాలనలో బీజేపీ ఎన్నికైన ప్రతినిధులకు ప్రత్యక్ష పాత్ర లభించింది.

విద్యాసంస్థలను రాజకీయ ప్రభావానికి దూరంగా ఉంచుతామని సీఎం సువేందు అధికారి ప్రకటించడంతో, ప్రభుత్వం మొదటగా ఉన్న పాలక మండళ్లను రద్దు చేసి, నిర్వాహకులను నియమించిన తర్వాత ఈ చర్య తీసుకుంది.

అందువల్ల, పార్టీ రాజకీయాలకు దూరంగా ఉంచుతామని వాగ్దానం చేసిన సంస్థలలో బీజేపీ ఇప్పుడు తన సొంత రాజకీయ స్థావరాన్ని ఏర్పాటు చేసుకుంటోందా అనే ప్రశ్నలను ఈ తదుపరి నియామకాలు లేవనెత్తాయి.

"ముఖ్యమంత్రి కేవలం మమతా బెనర్జీ నుంచి నేర్చుకున్న మార్గాన్నే అనుసరిస్తున్నారు. మంత్రులకు ఇప్పటికే వారి సొంత బాధ్యతలు ఉన్నప్పుడు, వారు కళాశాలలను ఎందుకు నడపాల్సిన అవసరం ఉందో నాకు అర్థం కావడం లేదు" అని సీపీఎం నాయకుడు సుజన్ చక్రవర్తి అన్నారు.

ఉన్నత విద్యాశాఖ మంత్రి జగన్నాథ్ చటోపాధ్యాయ్ ఈ నియామకాలను సమర్థించారు. మిగిలిన 200 పాలక మండళ్లకు విద్యావేత్తలు, సాంఘిక కార్యకర్తలు అధిపతులుగా ఉంటారని ఆయన అన్నారు. కళాశాలలు రాజకీయ వేదికలుగా మారకుండా చూస్తామని ప్రభుత్వం గతంలో ఇచ్చిన హామీకి, వాటి నిర్వహణలో ఎన్నికైన స్థానిక ప్రతినిధులకు ఎలాంటి పాత్ర ఉండదని అర్థం కాదని ఆయన అన్నారు.

కళాశాలలు, విశ్వవిద్యాలయాలలో విమర్శలను ఎదుర్కొంటున్న ప్రభుత్వ కార్యక్రమాలు కేవలం పాలక మండళ్లకు చేసే నియామకాలే కాదు. పాఠశాలల నుంచి విశ్వవిద్యాలయాల వరకు పాఠ్యప్రణాళికలలో శ్యామా ప్రసాద్ ముఖర్జీ జీవితం, రాజకీయ పాత్ర, పశ్చిమ బెంగాల్ ఏర్పాటుకు ఆయన చేసిన కృషిని చేర్చాలని కూడా ప్రభుత్వం నిర్ణయించింది.

ఆయన 125వ జయంతిని పురస్కరించుకుని, హిందూ-మెజారిటీ పశ్చిమ బెంగాల్ భాగాన్ని భారతదేశానికి సాధించడంలో ముఖర్జీ పోషించిన పాత్రను ప్రముఖంగా చూపే ఏడాది పొడవునా జరిగే కార్యక్రమాలలో భాగంగా ప్రకటించిన ఈ నిర్ణయం, ఒకే ఒక్క రాజకీయ నాయకుడికి ఇంత ప్రాధాన్యత ఇవ్వడంపై అధ్యాపక వర్గంలోని కొన్ని వర్గాల నుంచి ప్రశ్నలను లేవనెత్తింది.

ఈ నిర్ణయం ముఖ్యమైనది.. ఎందుకంటే బీజేపీకి రాజకీయ పూర్వగామి అయిన భారతీయ జనసంఘ్‌ను ముఖర్జీయే స్థాపించారు. అందువల్ల, ఈ చర్య రాష్ట్ర విద్యా విధానంలో పార్టీ సైద్ధాంతిక పూర్వగామికి మరింత పెద్ద స్థానాన్ని ఇస్తుందా అని విమర్శకులు ప్రశ్నిస్తున్నారు.

పశ్చిమ బెంగాల్ ఏర్పాటులో ముఖర్జీ పోషించిన పాత్రకు గాను ఆయనను పాఠ్యప్రణాళికలో చేర్చినట్లయితే, ఈ ప్రక్రియలో పాలుపంచుకున్న ఇతర రాజకీయ నాయకులకు కూడా చోటు కల్పించాలని బంగియా శిక్షక్ ఓ శిక్షకర్మి సమితి ప్రధాన కార్యదర్శి స్వపన్ మండల్ అన్నారు.

విద్యాసంస్థలలో రక్షణ శిక్షణ, జాతీయ సేవపై మరింత ప్రాధాన్యతనిచ్చేందుకు కూడా ప్రభుత్వం చర్యలు చేపట్టింది. యువత రక్షణ శిక్షణకు ఇజ్రాయెల్‌ను ఒక నమూనాగా పేర్కొంటూ, సరిహద్దు ప్రాంతాల్లోని పాఠశాలలు, కళాశాలల్లో ఎన్‌సిసి శిక్షణను తప్పనిసరి చేయాలని తమ ప్రభుత్వం కేంద్రానికి ప్రతిపాదించినట్లు అధికారి శుక్రవారం తెలిపారు.

శారీరక దృఢత్వం, క్రమశిక్షణ, సామాజిక సేవ, జాతీయ చైతన్యాన్ని పెంపొందించేందుకు 1932లో గురుసదై దత్ స్థాపించిన సామాజిక ఉద్యమం అయిన బ్రహ్మచారి ఉద్యమాన్ని, జాతీయ సేవా పథకాన్ని పునరుద్ధరించాలని కూడా ఆయన పిలుపునిచ్చారు.

రెండవ విధానం సంస్థాగతమైనది. ఆర్‌ఎస్‌ఎస్‌కు అనుబంధంగా ఉన్న అఖిల్ భారతీయ విద్యార్థి పరిషత్ (ఏబీవీపీ) రాష్ట్రంలోని క్యాంపస్‌లలో తన నెట్‌వర్క్‌ను విస్తరిస్తోంది. ఆ సంస్థ ప్రకారం.. గత నాలుగు నెలల్లో ఏబీవీపీ తన కార్యకలాపాలను గణనీయంగా విస్తరించింది.

బీజేపీ అధికారంలోకి రాకముందు సుమారు 96 కళాశాలల్లో ఉన్న దాని ఉనికి, ఇప్పుడు 400కు పైగా కళాశాలలకు పెరిగింది. అఖిల్ భారతీయ రాష్ట్రీయ శైక్షిక్ మహాసంఘ్, భారతీయ శిక్షణ మండల్ వంటి ఇతర ఆర్‌ఎస్‌ఎస్ అనుబంధ సంస్థలు కూడా బెంగాల్‌లోని ఉపాధ్యాయులు, విద్యా కార్యకర్తల మధ్య తమ ఉనికిని విస్తరిస్తున్నాయి.

క్యాంపస్ రాజకీయాలు పోరాటరూపం దాల్చాయి. బెంగాల్ క్యాంపస్‌లన్నింటిలోనూ తమ సంస్థను మరింత బలోపేతం చేయాలనుకుంటున్నట్లు ఏబీవీపీ నాయకులు తెలిపారు. వామపక్ష, తృణమూల్ మద్దతు ఉన్న విద్యార్థి సంఘాల ఆధిపత్యాన్ని సవాలు చేయడంపై, అలాగే "జాతీయవాదం"పై వారి ప్రచారం ఎక్కువగా దృష్టి సారించింది.

ఈ విస్తరణ క్యాంపస్‌లలో పదేపదే ఘర్షణలకు దారితీసింది. మేదినీపూర్ కళాశాల, కలకత్తా విశ్వవిద్యాలయం, ప్రెసిడెన్సీ విశ్వవిద్యాలయం, బరసత్‌లోని పశ్చిమ బెంగాల్ రాష్ట్ర విశ్వవిద్యాలయం తదితర చోట్ల ఏబీవీపీకి, ప్రత్యర్థి విద్యార్థి బృందాలకు మధ్య ఘర్షణలు జరిగినట్లు నివేదికలు వచ్చాయి.

ఈ ఘర్షణల చుట్టూ ఉన్న రాజకీయ వాక్చాతుర్యం మరింత తీవ్రంగా ఉంది. సీనియర్ బీజేపీ నాయకుడు, బెంగాల్ మంత్రి దిలీప్ ఘోష్, జాదవ్‌పూర్‌లో మళ్లీ "దేశ వ్యతిరేక" నినాదాలు చేస్తే మరో "సర్జికల్ స్ట్రైక్" ఉంటుందని హెచ్చరించారు.

ఏబీవీపీ కూడా ఇదే విధమైన పోరాటపూరిత భాషను ఉపయోగించింది. ఆరు నెలల్లోగా జాదవ్‌పూర్ విశ్వవిద్యాలయం నుంచి "దిమాగీ నక్సల్స్"ను తరిమివేస్తామని దాని రాష్ట్ర కార్యదర్శి నీలకంఠ భట్టాచార్య అన్నారు.

అయితే, బీజేపీలోని అన్ని వర్గాలు ఒకే విధమైన పోరాట వైఖరిని అవలంబించలేదు. ఆర్థిక మంత్రి స్వపన్ దాస్‌గుప్తా ఈ హింసను దురదృష్టకరమైనదిగా అభివర్ణించారు.

ఇలాంటి ఘర్షణలు విశ్వవిద్యాలయ ప్రతిష్టను దెబ్బతీస్తాయని హెచ్చరిస్తూ, రాజకీయ నాయకులు, అన్ని రాజకీయ నేపథ్యాలకు చెందిన ప్రజలు విద్యార్థి రాజకీయాలకు దూరంగా ఉండాలని ఆయన కోరారు. 'దేశద్రోహి' అనే ముద్రను విద్యావేత్తలు తిరస్కరించారు.

బెంగాల్ క్యాంపస్‌లలో ప్రత్యర్థి రాజకీయ వర్గాల దీర్ఘకాలిక ఆధిపత్యాన్ని సవాలు చేసే ప్రయత్నంగా ఈ విస్తృత ప్రచారాన్ని బీజేపీ సమర్థించుకుంది. అయితే, బీజేపీని వ్యతిరేకించే విద్యావేత్తలు, విద్యార్థి సంఘాలు, జాదవ్‌పూర్‌ను "దేశద్రోహ" కార్యకలాపాల కేంద్రంగా అభివర్ణించడాన్ని తిరస్కరించాయి.

జాదవ్‌పూర్ విశ్వవిద్యాలయ ఉపాధ్యాయ సంఘం, స్వదేశీ ఉద్యమంలో దాని మూలాలను, స్వాతంత్ర్య పోరాటంలో దాని పాత్రను ప్రస్తావిస్తూ, సంస్థను దేశద్రోహిగా ముద్ర వేయడాన్ని ఖండించింది.

"స్వదేశీ ఉద్యమం నుంచి పుట్టిన విశ్వవిద్యాలయం ఎన్నడూ ఏ దేశద్రోహ కార్యకలాపాలతో రాజీపడలేదు" అని అది పేర్కొంది. "ఆజాదీ" నినాదాలు చేస్తున్న విద్యార్థులను వెంటనే దేశద్రోహులుగా ముద్ర వేయకూడదని జేయూ మాజీ ప్రొఫెసర్ పవిత్ర సర్కార్ అన్నారు.

"వామపక్ష భావజాలం గల విద్యార్థులు 'ఆజాదీ' అని నినాదాలు చేసినప్పుడు, వారు నిరక్షరాస్యత నుంచి స్వేచ్ఛను కోరుకుంటారు. వారు దేశద్రోహులు కారు," అని ఆయన అన్నారు.