మమతా బెనర్జీకి దెబ్బ మీద దెబ్బ తగులుతూనే ఉన్నాయి. ఇప్పటికే టీఎంసీ తరఫున ఎన్నికైన ఎమ్మెల్యేలు వేరుకుంపటి పెట్టగా, తాజాగా ఎంపీలు సైతం బీజేపీలో చేరడానికి చర్చలు జరుపుతున్నట్లు తెలిసింది. ఓ నివేదిక ప్రకారం, కనీసం 20 మంది టీఎంసీ పార్లమెంట్ సభ్యులు బీజేపీతో అత్యున్నత స్థాయిలో చురుకుగా చర్చలు జరుపుతున్నారని, ఇది పార్లమెంట్లో మమతా బెనర్జీ పార్టీని చీల్చగల ఫిరాయింపునకు సంకేతమని ఆరోపణలు ఉన్నాయి.
టీఎంసీకి ఉన్న మొత్తం 41 మంది పార్లమెంటేరియన్ల బలంలో 28 మంది లోక్సభలో, 13 మంది రాజ్యసభలో ఉన్నారు. వీరిలో దాదాపు సగం మందిని కోల్పోవడం బెనర్జీకి తీరని దెబ్బ అవుతుంది. ఇదీ టీఎంసీ చరిత్రలోనే అతిపెద్ద సంక్షోభం. ఢిల్లీ రాజకీయాలపై, అలాగే ప్రతిపక్ష ఇండి కూటమిపై ఇది తీవ్ర ప్రభావం చూపే అవకాశం కనిపిస్తోంది. వీరంతా పార్టీ మారడంతో పార్టీ గుర్తుపై కూడా రెబెల్ సభ్యులు పట్టు సాధించే అవకాశం ఉంది. దీనిపై సుదీర్ఘంగా న్యాయ పోరాటాలు జరిగే అవకాశం కనిపిస్తోంది.
ప్రతిపక్ష పలుకుబడి క్షీణించే అవకాశం
ప్రస్తుతం టీఎంసీ పార్లమెంటులో రెండవ అతిపెద్ద ప్రతిపక్ష కూటమిగా ఉంది. ఈ స్థాయి తిరుగుబాటు టీఎంసీ పలుకుబడిని, అలాగే ప్రతిపక్ష శాసనపరమైన పలుకుబడిని కూడా తీవ్రంగా క్షీణింపజేస్తుంది. సీనియర్ ఎంపీలు ప్రస్తుతం జరుగుతున్న పరిణామాలపై మౌనం వహిస్తున్నారు లేదా వ్యాఖ్యానించడానికి నిరాకరిస్తున్నారు. మరోవైపు, టీఎంసీ నాయకత్వం రాబోయే వర్షాకాల సమావేశాలకు ముందు "పార్టీని ఐక్యంగా ఉంచడం"పై ప్రత్యేకంగా దృష్టి సారించి, సుదీర్ఘమైన, ఆందోళనకరమైన వ్యూహాత్మక సమావేశాలను నిర్వహిస్తోంది.
అధికార పార్టీ చేపట్టినట్లు ఆరోపించబడుతున్న 'ఆపరేషన్ లోటస్' ఎత్తుగడల వల్లే పార్టీ ఫిరాయింపుల ముప్పు పొంచి ఉందని కొందరు ఎంపీలు ఆరోపిస్తున్నారు. టీఎంసీ పశ్చిమ బెంగాల్ శాసనసభ పక్షం ఇప్పటికే చీలిపోయిన నేపథ్యంలో ఈ పరిణామం చోటుచేసుకుంది.
రితబ్రత బెనర్జీ నేతృత్వంలోని 60 మంది ఎమ్మెల్యేల తిరుగుబాటు వర్గం తామే 'అసలైన' తృణమూల్ అని చెప్పుకుంటోంది. మమత ఎంచుకున్న అభ్యర్థిని బహిరంగంగా సవాలు చేసిన రితబ్రత వర్గం, అతడిని ప్రతిపక్ష నాయకుడిగా నియమించేందుకు అసెంబ్లీ స్పీకర్ నుంచి అధికారికంగా ఆమోదం పొందింది.
కొన్ని వారాలుగా పెరుగుతున్న బలహీనతల నేపథ్యంలో పార్టీలో ఈ చీలిక ఏర్పడింది. అవినీతి ఆరోపణలు, ఎన్నికల ఎదురుదెబ్బలు, ఆర్.జి. కార్ ఆసుపత్రి దుర్ఘటనను పార్టీ వివాదాస్పదంగా నిర్వహించిన తీరుపై అసంతృప్తి క్రమంగా పెరిగింది. గత వారం, బీజేపీ నాయకుడు, ముఖ్యమంత్రి సువేందు అధికారి ఏర్పాటు చేసిన వ్యూహాత్మక సమావేశానికి పలువురు టీఎంసీ శాసనసభ్యులు కూడా హాజరయ్యారు.
టీఎంసీ రాజకీయ పలుకుబడిని కోల్పోనుందా?
మూడుసార్లు ముఖ్యమంత్రిగా మమతా బెనర్జీకి ఉన్న అఖండ వారసత్వం, చారిత్రాత్మకంగా టీఎంసీని ఒక ఆధిపత్య ప్రాంతీయ శక్తిగా, జాతీయ స్థాయిలో ఇండ కూటమిలో రెండవ అతిపెద్ద ప్రతిపక్ష పార్టీగా నిలబెట్టింది. ఇప్పుడు, ఈ తీవ్రమైన ఎదురుదెబ్బలు, బెంగాల్లో ఆమె పార్టీ చీలిపోవడంతో, టీఎంసీ ఈ అపారమైన రాజకీయ పలుకుబడిని కోల్పోవడం ఖాయమని విశ్లేషకులు పేర్కొంటున్నారు. అదే సమయంలో, దేశీయంగా టీఎంసీ బలహీనపడటంతో ఏర్పడిన శూన్యాన్ని పూరిస్తూ, కూటమిలో కాంగ్రెస్ పార్టీ పలుకుబడి గణనీయంగా పెరిగే అవకాశం ఉంది.
సుదీర్ఘ విరామం తర్వాత విస్తృత ఇండియా కూటమి జూన్ 8న తొలిసారిగా సమావేశం కానుంది. గందరగోళం నెలకొన్నప్పటికీ, తమకు జాతీయ ప్రతిపక్ష మద్దతు కూడగట్టేందుకు మమతా బెనర్జీ, అభిషేక్ బెనర్జీ ఇద్దరూ ప్రస్తుతం ఈ సమావేశానికి హాజరు కావాలని యోచిస్తున్నారు. ఈ సమావేశంలో పొత్తుల సమీకరణాలు మారనున్నాయి. ఉదాహరణకు, మరో కీలక భాగస్వామి అయిన డీఎంకే, తమిళనాడులో కాంగ్రెస్తో విభేదించింది. దీనితో జూన్ ఎనిమిదిన జరిగే సమావేశానికి తాను హజరు కావాలా వద్దా అనే ఇంకా డీఎంకే ధృవీకరించలేదు.
