మధ్యప్రదేశ్ లో మత ఉద్రిక్తతలు
పోలీసులపై రాళ్లు రువ్విన ఒక వర్గం, రోడ్డు విస్తరణలో మసీద్ కూల్చివేతకు నిరసనలు
ఉజ్జయిని లో 2028 లో నిర్వహించే సింహాస్థ ఉత్సవాలు లేదా ఉజ్జయిని కుంభమేళా కోసం రోడ్డు విస్తరణ పై వివాదం చెలరేగింది. రోడ్డు విస్తరణ కోసం షాహీ మసీద్ లోని కొంత భాగాన్ని తొలగించాలనే ప్రతిపాదనపై మధ్యప్రదేశ్ లో సోమవారం ఉద్రిక్తతలకు దారితీసింది.
రోడ్డు విస్తరణ పనుల సందర్భంగా నిరసనకారులు పోలీసులపై రాళ్లు రువ్వినట్లు వార్తలు వచ్చాయి. మసీదు పరిసరాల్లో ఉద్రిక్తతలు పెరగడంతో, గుంపును చెదరగొట్టడానికి పోలీసులు బాష్పవాయువు ప్రయోగించి, లాఠీఛార్జ్ చేసి, రాపిడ్ యాక్షన్ ఫోర్స్ (RAF)ను మోహరించారు.
రాళ్లు రువ్వడం, ప్రజాశాంతికి భంగం కలిగించడం వంటి ఆరోపణలపై 10 మందిని గుర్తించి, వారిపై ఎఫ్ఐఆర్ నమోదు చేసినట్లు పోలీసులు తెలిపారు. "సోమవారం ఉదయం జరిగిన అల్లర్ల అనంతరం ఎఫ్ఐఆర్‌లో పేర్కొన్న 10 మందిలో ఐదుగురు సోషల్ మీడియా ఇన్‌ఫ్లుయెన్సర్లు ఉన్నారు.
వారు తప్పుడు సమాచారం వ్యాప్తి చేయడం, శాంతికి భంగం కలిగించడం వంటి ఆరోపణలు ఎదుర్కొంటున్నారు," అని ఒక సీనియర్ పోలీసు అధికారి తెలిపారు. నిరసనకారులను చెదరగొట్టే క్రమంలో క్రైమ్ బ్రాంచ్ అధికారి పుష్పా పంచల్ గాయపడ్డారు. పరిస్థితి ఉద్రిక్తంగా ఉండటంతో మహిళలు కూడా రోడ్డును దిగ్బంధించారు.
రోడ్డు విస్తరణకు ప్రతిపాదనలు..
ఉజ్జయిన్ మున్సిపల్ కార్పొరేషన్ కాంతల్ చౌరహా, గోపాల్ మందిర్ మధ్య రోడ్డు విస్తరణ ప్రాజెక్ట్‌ను చేపట్టింది. ప్రతిపాదిత అలైన్‌మెంట్ కోసం షాహీ మసీదులోని కొంత భాగాన్ని తొలగించాల్సి ఉంటుంది. అయితే ఈ ప్రతిపాదనను ముస్లింలు వ్యతిరేకిస్తున్నారు. ఈ ప్రాజెక్ట్ వల్ల లక్షలాది మంది భక్తులకు సౌకర్యంగా ఉంటుందని కూడా ప్రభుత్వం భావిస్తోంది.
ప్రతిపాదిత 15 మీటర్ల వెడల్పు గల రోడ్డు అలైన్‌మెంట్ పరిధిలోకి వచ్చే మసీదు భాగం చుట్టూ ఈ వివాదం కేంద్రీకృతమై ఉంది. ఈ తొలగింపు ప్రణాళికలో ప్రార్థనా మందిరంలోని కొంత భాగం, ఒక మినార్, మసీదుకు సంబంధించిన ఇతర నిర్మాణాలు ఉన్నాయి. శతాబ్దాల నాటిదని భావిస్తున్న ఈ మసీదు, వక్ఫ్ ఆస్తిగా నమోదై ఉంది.
ఘర్షణకు దారితీసిన కారణం ఏమిటి?
మసీదులోని సదరు భాగాన్ని తొలగించడానికి ఏకాభిప్రాయం కుదిరిందని, ప్రతిపాదిత రోడ్డు పరిధిలోకి వచ్చే భాగాన్ని సంఘ సభ్యులు స్వచ్ఛందంగా కూల్చివేయడం ప్రారంభించారని అధికారులు తెలిపారు. విస్తృత రహదారి విస్తరణ కార్యక్రమంలో భాగంగా, తొలగింపునకు పలు కట్టడాలను కూడా పరిపాలన యంత్రాంగం గుర్తించింది.
అయితే, స్థానికులు మసీదు వద్ద గుమిగూడి తొలగింపును వ్యతిరేకించడంతో పరిస్థితి ఉద్రిక్తంగానే ఉంది. సోమవారం, పోలీసు సిబ్బందిపై రాళ్లు విసిరారనే ఆరోపణలతో ఘర్షణ తీవ్రరూపం దాల్చింది. దీంతో బాష్పవాయువు ప్రయోగించడంతో పాటు అదనపు భద్రతా బలగాలను మోహరించాల్సి వచ్చింది.
ఉజ్జయిన్ మున్సిపల్ కార్పొరేషన్ జారీ చేసిన నోటీసులను సవాలు చేస్తూ దాఖలైన పిటిషన్లను మధ్యప్రదేశ్ హైకోర్టు గతంలో కొట్టివేసింది. రోడ్డు విస్తరణ అవసరం, సింహస్థ 2028 కోసం జరుగుతున్న సన్నాహాలను కారణంగా చూపుతూ, పాక్షిక తొలగింపుతో ముందుకు సాగడానికి ఇండోర్ బెంచ్ తన సెప్టెంబర్ 9వ తేదీ ఉత్తర్వులో అధికారులకు అనుమతి ఇచ్చింది. ఈ తొలగింపు చర్య మసీదు వెలుపల నిరసనలకు దారితీసినప్పటికీ, ఈ విషయానికి సంబంధించి సోమవారం ఇండోర్ బెంచ్ ముందు తదుపరి విచారణ జరగాల్సి ఉంది.
వ్యతిరేకిస్తున్న కాంగ్రెస్...
ఈ తొలగింపును కాంగ్రెస్ పార్టీ విమర్శించింది. కాంగ్రెస్ ఎంపీ ఇమ్రాన్ ప్రతాప్‌గర్హి ఈ చర్యను వ్యతిరేకిస్తూ, స్థానిక ప్రజల మనోభావాలను పరిగణనలోకి తీసుకోవాలని మధ్యప్రదేశ్ ప్రభుత్వం, ఉజ్జయిన్ పరిపాలనను కోరారు.
ఈ విషయం కోర్టులో విచారణలో ఉండగా మసీదులోని కొంత భాగాన్ని తొలగించాలనే నిర్ణయాన్ని ప్రతాప్‌గర్హి ప్రశ్నించారు. దానికి బదులుగా రోడ్డుకు అవతలి వైపు నుంచి భూమిని సేకరించే అవకాశాలను పరిపాలన అన్వేషించాలని సూచించారు. ఈలోగా, ఉజ్జయిన్ మున్సిపల్ కార్పొరేషన్ ఛైర్‌పర్సన్ కలవతి యాదవ్, సింహస్థ కోసం జరుగుతున్న సన్నాహాల స్థాయిని నొక్కి చెప్పారు.
మతపరమైన సమావేశానికి ముందు నగరం కొత్త ఘాట్‌లు, మళ్లింపు మార్గాలు, ఆనకట్టలు, ఇతర మౌలిక సదుపాయాలను సిద్ధం చేస్తోందని, ఈ సన్నాహాల్లో రహదారి విస్తరణ ఒక ముఖ్యమైన భాగమని ఆమె అన్నారు. ఉజ్జయిన్ కుంభమేళాగా కూడా పిలువబడే సింహస్థ, ప్రతి 12 సంవత్సరాలకు ఒకసారి షిప్రా నది ఒడ్డున జరుగుతుంది. 2028 ఎడిషన్ మార్చి 27 నుంచి మే 27 వరకు జరగనుంది.
Next Story