ఉద్దవ్ గ్రూపులో చీలిక అనివార్యంగా మారిందా?

విశ్వసనీయ వర్గాలను ఉటంకిస్తూ ఇండియా టుడే తెలిపిన వివరాల ప్రకారం, ఎంపీలు సంయుక్త పత్రికా సమావేశంలో లోక్‌సభ స్పీకర్ ఓం బిర్లాతో తమ సమావేశానికి సంబంధించిన ఫోటోలు, వీడియో ఫుటేజ్‌ను విడుదల చేయడంతో పాటు, శివసేన (యూబీటీ) నుంచి తాము నిష్క్రమిస్తున్నట్లు పేర్కొంటూ ఆయనకు రాసిన లేఖ కాపీని కూడా విడుదల చేయబోతున్నారు.

పార్టీ నుంచి వైదొలగడానికి గల కారణాలను కూడా వారు వెల్లడించే అవకాశం ఉంది. 2022లో ఏక్‌నాథ్ షిండే నేతృత్వంలో జరిగిన తిరుగుబాటుతో చీలిపోయిన సేన (యూబీటీ), ఇప్పుడు మరో తిరుగుబాటు ముప్పుతో కుదుపులోనవుతూ ఉంది. దానికి చెందిన ఆరుగురు ఎంపీలు సంజయ్ జాదవ్, సంజయ్ దేశ్‌ముఖ్, ఓమ్రాజే నింబాల్కర్, భావుసాహెబ్ వాక్చౌరే, నాగేష్ పాటిల్ అష్టికర్, సంజయ్ దీనా పాటిల్ – పార్టీ ఫిరాయింపు కోసం షిండే వర్గంతో చర్చలు జరుపుతున్నారని వార్తలు వచ్చాయి.

పార్టీ విప్‌ను ధిక్కరిస్తూ ఈ ఎంపీలు న్యూఢిల్లీలో జరిగిన తమ పార్టీ పార్లమెంటరీ సమావేశానికి హాజరు కాకపోవడంతో, షిండే వర్గం వారిని తమ వారితో కలుపుకుంటున్నట్లు వార్తలు వచ్చాయి. దీనికి వారు ఆపరేషన్ టైగర్ అని నామకరణం కూడా చేశారు.

పార్లమెంటరీ సమావేశానికి గైర్హాజరైనందుకు ఆ ఎంపీలకు పార్టీ జూన్ 18న షో-కాజ్ నోటీసు జారీ చేసింది, కానీ వాటికి తిరుగుబాటు ఎంపీలు ఎటువంటి సమాధానం పంపలేదు.

ఉద్ధవ్ వర్గం నుంచి విడిపోవాలనే తమ నిర్ణయాన్ని తెలియజేయడానికి ఎంపీలు జూన్ 17న లోక్‌సభ స్పీకర్ ఓం బిర్లాను కలిశారు. దేశంలోని వివిధ ప్రాంతాల నుంచి ఎంపీలు ఢిల్లీకి చేరుకుని, నోయిడాలోని ఒక హోటల్‌లో బస చేశారని ఇండియా టుడే నివేదిక పేర్కొంది.

అనంతరం వారు షిండే, ఆయన కుమారుడు శ్రీకాంత్‌లతో సమావేశమయ్యారు. జూన్ 18 ఉదయం, శ్రీకాంత్, నింబాల్కర్ సుమారు 7 గంటలకు బిర్లాను కలిశారని ఆ నివేదిక తెలిపింది. సేనలోని షిండే వర్గంలో విలీనమవుతున్నట్లు ప్రకటిస్తూ, సభలో తమ సీట్లను మార్చాలని అభ్యర్థిస్తూ రాసిన లేఖను సమర్పించడానికి మిగిలిన ఐదుగురు ఎంపీలు ఉదయం 10.20 గంటలకు బిర్లాను కలిసినట్లు సమాచారం.

సమావేశం అనంతరం, ఎంపీలు చెన్నై, వారణాసి, పుణె, ముంబైలకు బయలుదేరినట్లు సమాచారం. ఆదివారం జరిగే పత్రికా సమావేశం కోసం, ఇద్దరు ఎంపీలు చెన్నై నుంచి ముంబైకి, మరో ఇద్దరు కోల్‌కతా నుంచి వస్తారని ఇండియా టుడే తెలిపింది. తిరుగుబాటు ఎంపీలలో ఒకరు పుణెలో, మరొకరు ముంబైలో ఉన్నారు. సమావేశం అనంతరం ఆరుగురు ఎంపీలు షిండేను కలవనున్నారని, అవసరమైతే బిర్లాతో మరో సమావేశం కోరవచ్చని ఆ నివేదిక పేర్కొంది.

ఈ మొత్తం ఎపిసోడ్ లో ఉస్మానాబాద్ (ధరశివ్) ఎంపీ నింబాల్కర్ పార్టీ ఫిరాయింపుతో ముందుకు వెళ్తారా లేదా అనేది ఇంకా స్పష్టం తెలియరాలేదు. ఫిరాయింపుల మధ్య, శివసేనలోని ఉద్ధవ్ వర్గం, నింబాల్కర్ పార్టీని వీడాలన్న తన నిర్ణయాన్ని పునరాలోచించుకోవచ్చని ఆశాభావం వ్యక్తం చేసింది.

ముఖ్యంగా, 2006లో జరిగిన ఆయన తండ్రి, కాంగ్రెస్ నాయకుడు పవన్‌రాజే నింబాల్కర్ హత్య కేసులో, శనివారం (జూన్ 20) ఒక ప్రత్యేక న్యాయస్థానం మాజీ ఎన్‌సిపి మంత్రి పద్మసింగ్ పాటిల్ మరో ఏడుగురిని నిర్దోషులుగా విడుదల చేసిన తర్వాత దీనిపై ఆయన పునరాలోచన చేయవచ్చని తెలుస్తోంది.

ఈ నిర్దోషత్వ ప్రకటనపై స్పందిస్తూ, నింబాల్కర్ తన నియోజకవర్గ ప్రజలతో సంప్రదించిన తర్వాతే తన రాజకీయ వైఖరిని నిర్ణయించుకుంటానని చెప్పారు. "సరిగ్గా జీవించి, ప్రవర్తించే మంచి వ్యక్తులు నిరాశను ఎదుర్కొంటారు. ఇదే కలియుగం," అని ట్రయల్ కోర్టు తీర్పుతో నిరాశ చెందిన ఆయన అన్నారు.

సేన (యూబీటీ) ఎమ్మెల్యే ఆదిత్య థాకరే అసమ్మతి ఎంపీలకు రాజీ ప్రతిపాదన చేశారు. పార్టీ అధినేత ఉద్ధవ్ థాకరేకు విశాల హృదయం ఉందని, తిరిగి రావాలనుకునే వారికి స్వాగతం పలుకుతున్నామని ఆయన అన్నారు. పార్టీకి వ్యతిరేకంగా వెళ్లే వారిపై చర్యలు తీసుకుంటామని కూడా ఆయన హెచ్చరించారు.

ఎంపీలను ఫిరాయించేలా బలవంతం చేయడానికి చట్టపరమైన, మానసిక ఒత్తిడిని ఉపయోగిస్తున్నారని సేన (యూబీటీ) రాజ్యసభ సభ్యుడు సంజయ్ రౌత్ ఆరోపించారు. నష్ట నివారణ చర్యల కోసం ఉద్ధవ్ నివాసం మాతోశ్రీలో నిర్వహించిన అత్యవసర సమావేశానికి తిరుగుబాటు ఎంపీలు గైర్హాజరైనప్పటికీ, ఫిరాయింపుల వదంతులను రౌత్ తోసిపుచ్చారు.

పార్లమెంటు సభ్యులు వర్చువల్‌గా సమావేశంలో చేరారని, వారిలో ఒకరు ఫోన్‌లో ఉద్ధవ్‌తో మాట్లాడతారని ఆయన అన్నారు. కానీ, షిండే వర్గానికి చెందిన కేంద్ర మంత్రి ప్రతాపరావు జాదవ్‌తో జాదవ్ సమావేశం కావడం కనిపించడంతో పరిస్థితి అందుకు విరుద్ధంగా మారింది.