సంజయ్ రౌత్
ఆరుగురు ఎంపీలపై అనర్హత వేటు వేస్తాం: సంజయ్ రౌత్
పార్టీకి ద్రోహం చేశారని విమర్శలు
ఇప్పటికే ఒకసారి చీలిపోయిన శివసేన(యూబీటీ) మరోసారి చీలిపోయే ప్రమాదం కనిపిస్తుండటంతో చీలిక వర్గం ముందు జాగ్రత్త చర్యలు చేపట్టింది. ఎంపీ అనిల్ దేశాయ్ పిలిచినా సమావేశానికి రాకుండా ఉన్న ఆరుగురు ఎంపీలకు షోకాజ్ నోటీస్ జారీ చేస్తున్నట్లు తెలిసింది.
తద్వారా వీరిపై లోక్ సభ స్పీకర్ ద్వారా అనర్హత వేటు వేయించాలని ఆలోచిస్తున్నట్లు సమాచారం. సమావేశం ముగిసిన వెంటనే విలేకరులతో మాట్లాడిన పార్టీ లోక్సభ ఎంపీ అనిల్ దేశాయ్, "సమావేశం ఇప్పుడే ముగిసింది, ఈరోజు షో-కాజ్ నోటీసు పంపారు" అని అన్నారు.
దేశాయ్తో పాటు వచ్చిన రాజ్యసభ ఎంపీ సంజయ్ రౌత్, పార్టీ విప్ గురించి పూర్తిగా తెలిసి కూడా దానిని ఉల్లంఘించినందున, ఆ ఎంపీలపై త్వరలోనే చర్యలు తీసుకుంటామని చెప్పారు.
"ఈరోజు ఉదయం 11 గంటలకు మా పార్లమెంటరీ పార్టీ కార్యాలయంలో మా లోక్సభ నాయకుడు అరవింద్ సావంత్, మా చీఫ్ విప్ అనిల్ దేశాయ్ ఎంపీలతో సమావేశం ఏర్పాటు చేశారు. ఈ సమావేశానికి అరవింద్ సావంత్ జీ, రాజాభౌ వాజే, అనిల్ దేశాయ్ అనే ముగ్గురు లోక్సభ ఎంపీలు హాజరయ్యారు. నేను రాజ్యసభ సభ్యుడిని అయినప్పటికీ, ఈ సమావేశం లోక్సభకు చాలా ముఖ్యమైనది" అని రౌత్ అన్నారు.
"ఈ సమావేశానికి హాజరుకాని సభ్యులు పార్టీ విప్ను ఉల్లంఘించారని మేము భావిస్తున్నాము. వారు పార్టీ ఆదేశాలను పాటించలేదు. అందుకే, వారిపై చర్యలు తీసుకునే ప్రక్రియ ప్రారంభమైంది" అని ఆయన తెలిపారు.
ద్రోహం చేశారు..
పార్టీ పిలిచిన సమావేశానికి గైర్హాజర్ అయిన ఎంపీలపై రౌత్ విమర్శలు గుప్పించారు. "ద్రోహం, నిజాయితీ లేకపోవడం, కుట్ర, మోసం" వంటి వాటికి పాల్పడ్డారని తిరుగుబాటు ఎంపీలపై ఆరోపణలు చేశారు. లోక్సభ స్పీకర్ ఓం బిర్లాతో వారు జరిపిన సమావేశం ఫోటోను విడుదల చేయాలని రౌత్ సవాలు విసిరారు.
"వారికి షో-కాజ్ నోటీసు ఇస్తాం, సమాధానాలు కోరతాం, వారి సభ్యత్వాన్ని రద్దు చేసే దిశగా చర్యలు తీసుకుంటాం. వారు నిన్న స్పీకర్ను కలిసి విలీనం కోరారు. నేను, అరవింద్ సావంత్, అనిల్ దేశాయ్ - మేమూ స్పీకర్ను కలిశాం. మా ఫోటో కూడా ప్రచురితమైంది.
ఆ ఆరుగురు ఆయనను కలిస్తే, వారి ముఖాలు చూపించండి. వారు దీనిని వ్యూహం అంటారు, మేం దీనిని ద్రోహం, నిజాయితీ లేకపోవడం, కుట్ర, మోసం అంటాం," అని రౌత్ వ్యాఖ్యానించారు. సేన (యూబీటీ) ఎంపీలు అరవింద్ సావంత్, అనిల్ దేశాయ్, రాజభౌ వాజేలతో పాటు, పార్టీ ఏకైక రాజ్యసభ ఎంపీ సంజయ్ రౌత్ కూడా ఈ సమావేశానికి హాజరయ్యారు.
విలీన ప్రయత్నం...
ఈ సమావేశానికి గైర్హాజరైన ఎంపీలు నాగేష్ ఆష్టికార్, సంజయ్ దేశ్ముఖ్, సంజయ్ జాదవ్, సంజయ్ దీనా పాటిల్, ఓంప్రకాష్ రాజేనింబాల్కర్, భావుసాహెబ్ వాక్చౌరే ఉన్నారు. పీటీఐ నివేదిక ప్రకారం, ఆరుగురు అసమ్మతి ఎంపీలు షిండే నేతృత్వంలోని సేనలో విలీనం కోరుతూ ఒక లేఖపై సంతకాలు చేసి లోక్సభ స్పీకర్ ఓం బిర్లాకు సమర్పించారు.
అయితే, ఈ ప్రక్రియ ఇంకా పూర్తి కాలేదు, ఎందుకంటే ధృవీకరణ కోసం కొంతమంది ఎంపీలు స్వయంగా హాజరు కావాలని స్పీకర్ కార్యాలయం కోరుతున్నట్లు తెలిసింది. అది "రాబోయే రోజుల్లో జరుగుతుందని భావిస్తున్నారు" అని వారు తెలిపారు. ప్రస్తుతం సంతకాల ధృవీకరణ జరుగుతోందని ఆ నివేదిక పేర్కొంది.
Next Story