‘‘ఎగ్జిట్ పోల్స్ ఎగ్జాట్ పోల్స్ అయ్యే అవకాశాలు తక్కువ’’

తమిళనాడులో నటుడు విజయ్ కొత్తగా పార్టీ పెట్టి అసెంబ్లీ ఎన్నికలలో పోటీ చేసిన టీవీకే పార్టీపై భిన్నమైన అంచనాలు వెలువడ్డాయి. ఈ భారీ వ్యత్యాసం చాలా ఆశ్చర్యంగా ఉంది. కొన్ని పోల్స్ విజయ్ ఘన విజయం సాధిస్తుందని చెప్పగా ఇంకొన్ని డబుల్ డిజిట్ కే పరిమితం అవుతుందని విశ్లేషించాయి.

మెజారిటీ సర్వే సంస్థలు మాత్రం డీఎంకే తిరిగి అధికారంలోకి వస్తుందని అంచనా వేస్తున్నాయి. ద్రవిడ పార్టీల నిర్మాణాత్మక బలాన్ని అంత త్వరగా తలకిందులు చేయలేరని వాదిస్తూ, శ్రీనివాసన్ ఈ అసాధారణ అంచనాను "చాలా అసంభవమైన దృశ్యం"గా అభివర్ణించారు.

"దశాబ్దాలుగా ఉన్న కేడర్ ఆధారిత రాజకీయాలు... ఒక నటుడి కొన్ని పర్యటనల వల్ల తుడిచిపెట్టుకుపోతాయని మనం చెప్పడానికి ప్రయత్నిస్తున్నామా?" అని ఆయన ప్రశ్నించారు. యువతలో విజయ్‌కు ఉన్న ఆదరణను, ఒక “మూడవ శక్తి” ఆవిర్భవించే అవకాశాన్ని అంగీకరించినప్పటికీ, పరిమిత ప్రచార పరిధి, సంస్థాగత లోతు కారణంగా, కనీసం ప్రస్తుత ఎన్నికలలో స్పష్టమైన అభివృద్ధి సాధించడం అసంభవం అని శ్రీనివాసన్ అభిప్రాయపడ్డారు.

కేరళలో అధికారంలో ఉన్న లెఫ్ట్ డెమోక్రటిక్ ఫ్రంట్ (LDF) నుంచి యునైటెడ్ డెమోక్రటిక్ ఫ్రంట్ (UDF) వైపు అధికారం బదలా అవుతుందని సర్వే సంస్థలు అంచనా వేశాయి. అయితే ఇది ప్రభుత్వ వ్యతిరేకత కాదని శ్రీనివాసన్ చెప్పారు. రెండు ఫ్రంట్‌లలోని అంతర్గత విభేదాలను, పెరుగుతున్న గుర్తింపు రాజకీయాల ప్రాముఖ్యతను ప్రస్తావిస్తూ, “ఇది ఒక కీలకమైన ఎన్నిక... ఇది భవిష్యత్తును నాటకీయంగా మార్చగలదు” అని ఆయన అన్నారు.

ఒకవేళ UDF తిరిగి అధికారంలోకి వచ్చినా, నాయకత్వం, సమైక్యతపై ప్రశ్నలు పాలనను ప్రభావితం చేయగలవు. పశ్చిమ బెంగాల్‌లో హోరాహోరీ పోరు ఉంటుందని ఎగ్జిట్ పోల్స్ సూచిస్తున్నప్పటికీ, శ్రీనివాసన్ రెండు ముఖ్యమైన అంశాలను ప్రముఖంగా ప్రస్తావించారు.

అందులో ఒకటి ఓటర్ల జాబితాల స్పెషల్ ఇంటెన్సివ్ రివిజన్ (SIR) కాగా రెండోది కేంద్ర బలగాల భారీ మోహరింపు. ఇవి అనిశ్చితికి కేంద్రంగా ఉన్నాయని చెప్పారు.

"ఇవి ఎలా పరిణమించాయో మనకు నిజంగా తెలియదు" అని ఆయన అన్నారు. ఓటు హక్కు కోల్పోతామనే భయాలు, అలాగే నిశ్శబ్ద ఓటర్లు ఫలితాలను వక్రీకరించే అవకాశం రెండూ ఉన్నాయని ఆయన పేర్కొన్నారు.

బెంగాల్, అస్సాం ఎగ్జిట్ పోల్స్ తీవ్ర చర్చకు దారితీశాయి. బీజేపీ క్లీన్ స్వీప్ అంచనాలను నిపుణులు ప్రశ్నిస్తున్నారు. దీనికి విరుద్ధంగా, అస్సాంలో ఫలితాలు మరింత ఊహించదగినవిగా కనిపిస్తున్నాయి. హిమంత బిస్వా శర్మ నాయకత్వంలో బీజేపీ తిరిగి అధికారంలోకి వస్తుందని అంచనాలు సూచిస్తున్నాయి. అయినప్పటికీ, ఇక్కడ కూడా ప్రతిపక్షంలోని అంతర్గత విభేదాలు, సంస్థాగత లోపాలు కీలకమైన అంశాలని శ్రీనివాసన్ చెప్పారు.

ఎగ్జిట్ పోల్స్ విశ్వసనీయతపై శ్రీనివాసన్ ప్రశ్నించారు. "ఎన్నికల విశ్లేషణ... నిరూపితమైన శాస్త్రం కాదు" అని ఆయన అన్నారు. శాంప్లింగ్ సవాళ్లు, ప్రతిస్పందించేవారి పక్షపాతం, తప్పుడు సమాచారం ప్రభావం వంటివాటిని ఆయన ఉదహరించారు. ఓటర్లు నిజం చెప్పడానికి విముఖత చూపుతుండటంతో, ఎన్నికల అంచనాలు మరింత కష్టమవుతున్నాయి. ప్రస్తుతానికి, భారత్ వంటి వైవిధ్యమైన, సంక్లిష్టమైన దేశంలో ఎగ్జిట్ పోల్స్ "గొప్ప వినోదాన్ని" అందిస్తాయి కానీ, వాటిలో కచ్చితత్వం చాలా తక్కువని ఆయన ముగించారు.