రేవంత్ ప్రభుత్వంపై మండిపోతున్న యువత

నిరుద్యోగులు, విద్యార్ధులు ముఖ్యమంత్రి రేవంత్ రెడ్డి ప్రభుత్వంపై మండిపోతున్నారు. 2023 అసెంబ్లీ ఎన్నికల సమయంలో ఇచ్చిన అనేక హామీలను రేవంత్ ప్రభుత్వం తుంగలో తొక్కిందని యువత ఆరోపిస్తోంది. ఎన్నికల సమయంలో హామీలు ఇచ్చినట్లుగా ఉద్యోగాలకు నోటిఫికేషన్లు లేకపోవటంతో పాటు ఫీజు రీఎంబర్స్ మెంట్ వివాదాల్లో నలుగుతోంది. బీఆర్ఎస్ ప్రభుత్వం నుండి పేరుకుపోయిన ఫీజు రీఎంబర్స్ మెంట్ ప్రస్తుతం రు.8 వేల కోట్లకు చేరుకుంది. ఫీజు రీఎంబర్స్ మెంటు నిధులను వెంటనే విడుదల చేయాలని విద్యార్ధి సంఘాలు ఆందోళనలు చేస్తున్నా ప్రభుత్వం ఇప్పటివరకు పట్టించుకోలేదు. ఇదే సమయంలో ఖాళీగా ఉన్న ఉద్యోగాల భర్తీకి నోటిఫికేషన్లు ఇవ్వాలని నిరుద్యోగులు ఆందోళనలు చేస్తున్నారు. ప్రభుత్వం ఇటు ఫీజు రీఎంబర్స్ మెంట్ కు నిధులు విడుదల చేయకుండా అటు ఉద్యోగాల భర్తీకి నోటిఫికేషన్లు ఇవ్వకపోవటంతో యువతలో రేవంత్ ప్రభుత్వంపై అసహనం పెరిగిపోతోంది.

గత ఎన్నికల్లో కాంగ్రెస్ అధికారంలోకి రావడానికి నిరుద్యోగులు, విద్యార్థులే ప్రధాన పోషించారనేది బహిరంగ రహస్యం. అప్పట్లో బీఆర్ఎస్ ప్రభుత్వంపై ఉన్న వ్యతిరేకతను తమకు అనుకూలంగా మార్చుకోవడంలో కాంగ్రెస్ ఇచ్చిన 'జాబ్ క్యాలెండర్', సకాలంలో ఫీజుల విడుదల హామీలు కీలక పాత్ర పోషించాయి. కానీ ఇప్పుడు సీన్ రివర్స్ అయింది. అధికారంలోకి వచ్చి ఇన్నాళ్లవుతున్నా క్షేత్రస్థాయిలో యువత ఆశించిన మార్పు రాకపోగా, తమ సమస్యలు మరింత జటిలంగా మారుతున్నాయనే ఆవేదన వారిలో కనిపిస్తోంది. పక్కా ప్రణాళికతో ఉద్యోగాల భర్తీ చేపట్టకపోవడం వల్ల విద్యార్థి లోకం తీవ్ర నిరాశలో మునిగిపోయింది.